Read KapsikiDC Ka Meha ghwə 7 Bible Online

Ka Meha ghwə 7 - KapsikiDC bible

Ka Meha ghwə 7

¹Zhɛdɛyon nya heka mbeli kaYerəwbal, feɗeghe masheke masheke le ka sewajɛa ŋkɛ. Pa hɛ lə kamenete ghedəkwəa nci terasle yitea ɗaslea Harod. Laka bela kwa gwela yitea ghedəkwəa ka Madiyan, te ŋwela, laka wəmbəa Morɛ.

²Ma ke Mahwətə sha Zhɛdɛyon: «Kewəba mbelia ŋa nyi. Kapele nda ka Madiyan 'ya ke hɛ we. Yagha ka Israyɛl katefege kageze ne, berete ta ɓəmə nde mbelete ɓə ke hɛ.

³Ma pa na sha mbelia ŋa: Ma yayata wəndə nya kebare bare va ghazlənə ne, kwiɗi ŋkɛ kajɛghɛ, dzeme laka ghweme ta Gala'ad!» Ma hwa ka sewajɛ ne, 22.000 zhili nyi kejɛghɛnji, tene zhili 10.000.

⁴Ma ke Mahwətə sha Zhɛdɛyon: «Kewəba mbelia ŋa zhɛkwa. Kwiɗi mə le hɛ kadzawa hələ, kwagha gɛ, 'ya nde tseha ŋa mbeli nyi ketelə le gha. Ma geze ŋa 'ya: za nya ne kalə ŋkɛ le gha 'ya ne, kalə ŋkɛ. Ma kegeze ŋa 'ya: Katelə za nya le gha we, a 'ya ne, katelə ŋkɛ we.»

⁵Pa yɛ Zhɛdɛyon dzawa hələ le ka sewajɛa ŋkɛ. Ma ke Mahwətə sha Zhɛdɛyon: «Ma mbeli nyi kekatse yɛmə kadzawa mɛ le dzeve ne, laka kwete ŋkwa tsene hɛ na. Ma nyi kegwəɗəŋə kasa le mɛa nci ne, laka kwete ŋkwa tsene hɛ na.»

⁶Zhili gwəmsə mahekene nyi kekatse yɛmə le dzeve kasa le ghɛni kala kelɛ. Pɛtɛ kweci kegwəɗəŋə kasa.

⁷Ma ke Mahwətə sha Zhɛdɛyon: «Le zhili gwəmsə mahekene nyi kesakɛ yɛmə nyi kala kelɛ ne, katembele ŋayɛ 'ya laka ve ka Madiyan mbe dzeve ta ŋa. Zhɛneghe geva kweci mbeli kalə sha ghɛa nci!»

⁸Pa Zhɛdɛyon kelete mbeli gwəmsə mahekene zlaɓe, pa ghweneghe kweci kalə sha ghɛa nci. Ama mba nza wəshi kezemea nyi kejɛghɛ le yɛ tereme ta nci teke. Kwagha te ŋwela ta ghedəkwəa ka Madiyan.

⁹Ma heviɗia shɛ, ma ke Mahwətə sha Zhɛdɛyon: «Sate! Dzawa kaɗa ghedəkwəa ka Madiyan, kateve hɛ 'ya mbe dzeve ta ŋa.

¹⁰Ma kezhɛ ŋa ghazlənə ne, dzawa laka ghedəkwə le Pəwra, nde mene ŋa slene.

¹¹Pa na fate ghena nyi geze hɛ. Ma tsagha ne, ghyanake tenza na kezha ɗa hɛ.» Pa Zhɛdɛyon dzawa le nde mene slene ta ŋkɛ takwa yitea ghedəkwə, te ŋkwa nya nza ka ghate ta ka sewajɛ.

¹²Ka Madiyan, ka Amalɛk ba'a mbeli nyi kese laka ŋkwa kesame ta veci, ya kwagha te ŋwela, kwele kwele kala dzale: kaɓelate zlegweməa nci wəndə we. Kala ndaleghe nya kwa hələ kwelea nci.

¹³Ma te və nya ntsehe Zhɛdɛyon ne, kageze nda ghena ta shiwə kwete wəndə ke mcɛnyɛ: «Nahe 'ya keshiwəte shiwə. Pa 'ya nakɛ ɗafa kwetɛŋe ŋa megi mbe ghedəkwəa ɓəmə kanzere te hɛɗi. Pa ŋkɛ se kampəve nda geva ke cɛ lekwesa, pa cɛa shɛ teɗenyɛ.

¹⁴Ma ke Wəndə kwelea ka sewajɛ ta ŋkɛ zhɛnete: Hwa ta Zhɛdɛyon, nde Israyɛl, wəzege ta Yowash. Kashɛ nza kakwete wəsə we! Nahe ŋkɛ keɗete kave ghedəkwəa ɓəmə pɛtɛ mbeyitere berete ta ŋkɛ.»

¹⁵Ma kwa fate ghena ta shiwəa shɛ Zhɛdɛyon le yɛ wəsə nya ɗe nde kageze, gwəɗəŋə ŋkɛ sha ghəa shene mbe hɛɗi kezha tsa nda hana ke Shala. Pa zhɛneke geva kase kadzembe ghedəkwəa ka Israyɛl. Kɛake sha lewela: Sate mə! Nahe Mahwətə kendeke ɓəmə ghedəkwəa ka Madiyan!

¹⁶Pa Zhɛdɛyon neheve zhili nyi gwəmsə mahekene nyi nza hɛ le mahekene wəvəsəa nci. Pa nehave nda tereme le wəmbete le ghwə te wəvəzə ke yayata kwete wəndəa nci.

¹⁷Ma ke sha hɛ: «Ŋkwa nya laka 'ya yanewe yɛ nda sheke yɛ kala 'ya! Kentsehe 'ya takwa yitea ghedəkwə, ma wəsə nya temene 'ya, gheŋkɛa shɛ yatemene yɛ perə.

¹⁸Ma kevɛte tereme 'ya ne, 'ya le mbeli nyi yitea 'ya pɛtɛ, pa yɛ kavɛ tereme perə ntəslə dzeyi yitea ghedəkwə. Nda tsa lewela yɛ: ‹Kezha Mahwətə ba'a kezha Zhɛdɛyon!›»

¹⁹Ma takwa tepe ta viɗi ne, Zhɛdɛyon le zhili nyi nza hɛ le mbe wəvəsə gwəmsə ntsehe yitea ghedəkwə. Nahe mbeli kembeɗemte ka newe ŋkwa nyi mɛa ghedəkwə. Pa Zhɛdɛyon vɛte tereme le mbeli nyi nza hɛ le kampə wəmbetea lɛmə nyi va hɛ yitea dzeve.

²⁰Kweci wəvəsə bake ne, kavɛ ŋa nci hɛ tereme kampə wəmbetea lɛməa nci perə. Mbe kwa gwela ghwə te wəvəzə va hɛ mbe dzeve kwa zeme tereme va hɛ kavɛ. Ntake hɛ katsa lewela: «Ɗa ɓəmə ŋkwa kezha Mahwətə ba'a kezha Zhɛdɛyon!»

²¹Sleslete hɛ dzeyi yitea ghedəkwə, yayata wəndə te ŋkwa ŋkɛ. Kwa ghedəkwə ne, pɛtɛ mbeli kahwɛ le lewela kembele ghə.

²²Zhili nyi gwəmsə mahekene nyighɛ kavɛ tereme hɛ. Ma vəa ŋkwa shɛ ne, pa Mahwətə menete kampə ghəa nci ka Madiyan kwelɛ ghəa nci mbe ghedəkwə. Ma nyi ketene kweracɛ hɛ tehwɛ hwa'a kwa Bɛt-Shita, dzawa laka Serɛda, ba'a hwa'a mbe meleme Abɛl-Mehola, takwa yitea Tabat.

²³Pa mbeli tsenete ka Israyɛl hwelefe ta Nɛftali, ŋa Asɛr le pɛtɛa ŋa Manasɛ, cape hɛ kakeka ka Madiyan.

²⁴Pa Zhɛdɛyon ghwenakɛ mɛ kadzeyi te hɛɗia Ɛfrayim nyi dzeme hwa ghweme: «Sawa mə pɛtɛ kabegeme le ka Madiyan ba'a fəhwe mə ghwa ta nci nyi dzeyi mɛa hələa Zhəwrdɛŋe hwa'a kwa Bɛt-Bara!» Pa mbeli tsenete zhilia ka Ɛfrayim. Pa hɛ sawa ba'a fəhwe ghwa nyi dzeyi mɛa hələa Zhəwrdɛŋe hwa'a kwa Bɛt-Bara.

²⁵Pa hɛ fəte ka meghe nyi bake nyighɛ Orɛb le Zɛb. Pa hɛ peslekɛ Orɛb pelɛ gela ta Orɛb, Zɛb kwa ŋkwa kehetəsə wəsə. Kwa sebe ta ŋkɛ ne, mba hɛ kakeka ka Madiyan. Hwa'a hɛ mɛa kwete kema ta hələa Zhəwrdɛŋe, pa hɛ keleke nda ghəa yɛ Orɛb le ŋa Zɛb.