Read KapsikiDC Ka Meha ghwə 8 Bible Online

Ka Meha ghwə 8 - KapsikiDC bible

Ka Meha ghwə 8

¹Ma ke mbelia Ɛfrayim sha Zhɛdɛyon: «Ma kwa lə na kampa le ka Madiyan ne, kese na kaheka n'yɛ we. Wa raberə menete n'yɛ na kala nya wa?» Ntake hɛ kazhɛne ghəpə le berete le.

²Ama pa Zhɛdɛyon zhɛnete nda ke hɛ: «Wa wəsə meŋele nya menete 'ya kelə 'ya kayipə ghəa ɗa le gheyɛ wa? Ma nya menete nya yɛ ɓɛhwɛ ne, ashɛ za ma ndeɗea ŋa ŋayɛ kenya menete mbelia Abiyɛzɛr ka yita ta ɗa wəka?

³Ke gheyɛ ndeke ŋayɛ meghea ka Madiyan Shala, Orɛb le Zɛb. 'Ya ne, kemenete 'ya kala nyagha we.» Ma kwa fate mbelia Ɛfrayim ne, pa wənə nya hwepete hɛ le Zhɛdɛyon gweɗakwete geva.

⁴Zhɛdɛyon le zhili nyi gwəmsə mahekene kentsehe kwa hələa Zhəwrdɛŋe pa hɛ jivenji te. Leɓakwe hɛ, ama mba hɛ mbe keka ka ghema ta nci shanda.

⁵Ma kwa ntsehe hɛ mbe meleme ta Səwkot, ma ke Zhɛdɛyon sha mbeli nyi mbe meleme: «Tehwə tehwə ŋayɛ 'ya, ntave nda mə ɗafa ke zhili nyi yitea 'ya nyi, kwa nza hɛ leɓakwe. 'Ya kakeka yɛ meghea ka Madiyan Zɛba le Salməwna.»

⁶Ama ma ke mbeli nyi te ghəa meleme ta Səwkot zhɛnete nda: «Wa raberə nda ɗa nda wəshi kezeme ghen'yɛ ke ka sewajɛa ŋa wa? Gha nde sleke Zɛba le Salməwna laka berete ta ŋa na?»

⁷Pa Zhɛdɛyon zhɛnete nda ke hɛ: «Yawa megela, ma vəa ŋkwa nya tendeke ɗa Zɛba ba'a Salməwna Mahwətə ne, kateɗa ŋayɛ 'ya le ghweɗa tigə ba'a le hwele.»

⁸Slə tagha ne, pa Zhɛdɛyon dzawa Penəwɛl, tsagha shɛnyɛ ŋkɛ 'yɛwakɛ va mbeli nyi mbe meleme. Pa mbeli nyi mbe Penəwɛl zhɛnete nda kala ka Səwkot.

⁹Ma ke Zhɛdɛyon sha hɛ: «Ma vəa ŋkwa nya zhɛneke geva 'ya kwa sebe ta nya hərəmte ŋkwa 'ya ne, kateŋzla ŋkwa nya biya nya mbe meleme ta ŋayɛ 'ya.»

¹⁰Ma yɛ Zɛba le Salməwna ne, kwa Karkor hɛ le ka sewajɛ nci. Tsetsenya ne kaɓela hɛ deke 15.000 zhili nyi ketene hwa pɛtɛa ka sewajɛa mbeli nyi kese laka ŋkwa kesame ta veci. Kwa nza ŋkɛ 120.000 ka sewajɛ nyi kempə.

¹¹Pa Zhɛdɛyon kelete hweŋkwa ta mbeli nyi kese laka ŋkwa kesame ta veci sha Noba le Yogboha, pa ŋkɛ mpəmte ka sewajɛ nyi kezəzə te ŋkwa ganyɛ ghen'yɛ ke hɛ.

¹²Ntake yɛ Zɛba le Salməwna kahwɛ, ama keka yakeka hɛ Zhɛdɛyon. Pa ŋkɛ keseve ka meghea ka Madiyan nyi bake nyighɛ, yɛ Zɛba le Salməwna, pa ŋkɛ take nda ghazlənə ke pɛtɛa ka sewajɛa nci.

¹³Ma kwa sheke Zhɛdɛyon kwamte mpa, laka wəmbəa Hɛrɛs ne,

¹⁴pa ŋkɛ keseve kwete mempɛhweta nya kande Səwkot nya 'yɛwete ghena ŋkɛ ve, pa mempɛhweta shɛ rafete nda sləa mbeli nyi te ghə ba'a mbelia jama nyi mbe meleme, pɛtɛa nci ne, zhili mberefaŋemsə mberefaŋeghəmbe.

¹⁵Ma kwa sebe ta ŋkɛ ne, pa Zhɛdɛyon lə kasləyi mbelia Səwkot, ma ke sha hɛ: «Ma vecagha ne, ma pe yɛ ŋelekɛ ɗa: ‹Wa raberə nda ve nda wəshi kezeme ghen'yɛ ke ka sewajɛa ŋa nyi leɓakwe wa? Ma tsetsenya ne, mbeyitere berete ta ŋa Zɛba le Salməwna na?› Yawa megela, wa nyi mə yɛ Zɛba le Salməwna nyi kekeleke ŋayɛ 'ya.»

¹⁶Pa Zhɛdɛyon tsasleve ghweɗa tigə le ŋa hwele kaɗa mbeli nyi mbe Səwkot le.

¹⁷Pa ŋzlamte ŋkwa nya biya mbe Penəwɛl kampəmte mbeli nyi mbe meleme.

¹⁸Ma ke Zhɛdɛyon 'yɛwakɛ va yɛ Zɛba le Salməwna: «Kala wa mbeli nyi mpəmte nyi yɛ pelɛ ghweme ta Tabor wa?» Ma ke hɛ zhɛnete nda: «Nahe hɛ kenza kala gha. Ma yayata wəndəa nci ne, kala wəzege ta meghe pa ta ŋkɛ.»

¹⁹Ma ke Zhɛdɛyon sha hɛ: «Ka kesaka ma ɗa hɛ, ŋwalea male kwetɛŋe! Nahe Mahwətə kenza teghweme, ma ya nahe yɛ kesərəakɛ hɛ le mpi ne, nza katempə ŋayɛ 'ya we.»

²⁰Ma kwa sebe ta ŋkɛ ne, ma ke sha Yɛtɛr, tezhɛa wəzege ta ŋkɛ: «Kwiɗi mpəmte hɛ!» Ama kese wəzegea shɛ kanteɗe kafayɛa ŋkɛ we! Kwa nza ŋkɛ mba kamempɛhweta shiwə va ghazlənə.

²¹Ma ke yɛ Zɛba le Salməwna sha Zhɛdɛyon: «Sate te ŋkwa ba'a mpəmte n'yɛ le ghəa ŋa! Katsala za nde mene tsagha!» Pa Zhɛdɛyon mpəmte ka meghe nyi bake nyi, pa fəhwe wəshi kepesa geva nyi kwa welɛa zlegweməa lɛməa nci.

²²Ma kwa sebe ta ŋkɛ, ma ke ka Israyɛl sha Zhɛdɛyon: «Nza kameghea n'yɛ, gha, le wəzege ta ŋa, le shia ŋa, kwa nza ŋkɛ nahe na kembeleke n'yɛ va berete ta ka Madiyan.»

²³Ma ke Zhɛdɛyon sha hɛ: «'Ya nde tenza kameghea ŋayɛ we, ya wəzege ta ɗa ŋkɛ we. Mahwətə nde tenza kameghea ŋayɛ.»

²⁴Zhɛne, ma ke Zhɛdɛyon sha hɛ: «Kaɗe 'ya ka'yɛwe kwete wəsə va gheyɛ: yayata wəndə kave ɗa ŋgwedɛba kwetɛŋe shave mbe mcɛləa ŋayɛ nyi kemave yɛ se mbe mpa.» Kwa nza ŋkɛ le ŋgwedɛba mze kwa tere tere dzeghwa ka Madiyan, kwa nza hɛ kambeli nyi te ɓerama.

²⁵Ma ke hɛ zhɛnete nda: «Megela, kateve ŋa ghen'yɛ!» Pa pelakeyi lekwesa te hɛɗi, yayata wəndə kanegha ŋgwedɛba kwetɛŋe kadzete, nyi keshave mbe mcɛləa nci nyi kese mbe mpa.

²⁶Ma ŋgwedɛba nyi 'yɛwakɛ Zhɛdɛyon ne, takwa yitea kiləwə bakemsə nza ɗaŋeɗa ta nci. Pa ŋkɛ kemave wəshi kepesa geva, wəshi kedzembe sleme ba'a lekwesa ganji nyi ghemea ghemea nyi seɗe ka meghea kɛfia ka Madiyan, tsagha wəshi kepesa geva nyi kwa welɛa zlegweməa lɛməa nci.

²⁷Le mze nyi, pa Zhɛdɛyon vɛsəte wəsə kala shala kaveyi mbe meleme ta ŋkɛ Ofra. Kalə ka Israyɛl te ŋkwa shɛ kahawe va wəsə nya kala shala shɛ, na wəsə nyagha kezhɛrenyɛ kakeleŋa nya yitea Zhɛdɛyon le mbelia ŋkɛ.

²⁸Se te vəa shɛ, pa ka Madiyan mbeyitere berete ta ka Israyɛl kaslete ghəa nci hɛ we. Pa kwelɛŋe te hɛɗi kava wəfaɗemsə nda nzahwe nza Zhɛdɛyon teghweme.

²⁹Pa Yerəwba'al, geze ta ŋkɛ Zhɛdɛyon, wəzege ta Yowash, zhɛnete geva kalə kanza ki ghɛa ŋkɛ.

³⁰Mberefaŋemsə ŋwale ve, va nya nza mi kwele kwele ve.

³¹Male meghwa ya ve mbe Sishɛm, pa nde yake nda wəzege teza. Pa ŋkɛ hekate nda slə kaAbimɛlɛk.

³²Pa Zhɛdɛyon wəzege ta Yowash mte mbe meha nya le zeɗe nza. Pa mbeli lamte kwa kwele ta Yowash, yitenyɛ, mbe Ofra, meleme ta ka yita ta Abiyɛzɛr.

³³Ma kwa sebe ta mte ta Zhɛdɛyon ne, ntake ka Israyɛl kahawe va Ba'al zhɛkwa, pa hɛ kelete Ba'al-Berit kashala ta nci.

³⁴Pa hɛ zamte ghə yitea Shala Mahwətə ta nci, nya kembeleke hɛ va ka ghema ta nci pɛtɛ nyi kaka ghedəkwəa nci.

³⁵Kaɓela mbelia Zhɛdɛyon nya heka mbeli kaYerəwbal hɛ we, kahawe hɛ ve we, keɓela ganyɛ nyi menete nda ŋkɛ ke ka Israyɛl hɛ we.