Read KapsikiDC Zhəwde 1 Bible Online

Zhəwde 1 - KapsikiDC bible

Zhəwde 1

¹Se va Zhəwde, nde mene nda slene ke Yɛsə Kriste ba'a wəza meghekɛa Zhake. Ke mbeli nyi kehekakɛ geva, mbeli nyi ɗehwe Shala Yita ba'a nyi keyate geva kezha Yɛsə Kriste.

²Pa zhɛ heli, kwelɛŋe ba'a ɗe ndeke ŋayɛ geva kwele kwele.

³Ka mcɛhɛ ɗa ganji, kwele kwele ɗe 'ya karafe ghena te ghəa mbele nya kenza kaŋa ɓəmə pɛtɛ. Ma tsetsenya ne, 'ya karafe ŋayɛ palepa le ɗema ta ɗa kezha mtsehe ŋayɛ berete kempa yitea yɛ nya ndeke nda Shala ke mbelia ŋkɛ fəyitekeghə.

⁴Kwa nza ŋkɛ nahe kweci mbeli nyi kaka 'yaghwa mehele kedzehwa gheɓəmə kaɗema gheɓəmə keɗepe. Kazhɛre ghena nya mbe ɗe ta Shala ta ɓəmə hɛ kezha mene wəsə kwa wale wale ta nci. Tsagha gɛ, Yɛsə Kriste nya te ghəa ɓəmə kwetɛŋe ba'a nya kaNde sleke ɓəmə yaɗema hɛ. Se vəashi ne, nahe Ghena ta Shala kegezete ɗa nya te hɛ.

⁵Kaɗe 'ya kazəzəte ŋayɛ, ya kwela ɗepe yɛ fəyitekeghə nahe Mahwətə, kwa sebe ta nya mbelete ka Israyɛl ŋkɛ shave mbe Ɛzhipte, kezamte sebe te mbeli nyi ɗema yɛ va hɛ.

⁶Zəzəte mə ka ghwene ta Shala nyi keɗema kese kazlama te kwelea nci, nahe hɛ kesərəakɛ ŋkwa nya se hɛ te. Tagha gɛ, na Shala kehwepeyi hɛ kwa zewe lɛ kaghala ghala, mbe ŋkwesle kezha neghe meha ghwə te veci nya wəba.

⁷Zəzəte mə Sodome, Gomore ba'a kweci meleme nyi dzeyi yitea hɛ: Nahe mbeli nyi mbe hɛ kemenete wəsə nya ndiremi kala ka ghwene ta Shala shɛhɛ ba'a kevalete vale nyi kehitema geva. Nahe ɗa kevate geva te hɛ laka ghwə nya kaghala ghala. Tsagha gɛ ne, nahe hɛ kenza kawəsə keyipə pa kezha mbeli pɛtɛ.

⁸Tsagha shɛ mene ka ndiremia mehele nyi hwa gheyɛ. Wəshi tseŋwə yazəzə hɛ. Tagha gɛ, kazele wəshi nyi ndiremi ndiremi nyi mawe geva ta nci hɛ, kaɓela kwelea Mahwətə hɛ we, kaŋele ka ghwene ta Shala nyi pelɛ ghweme hɛ.

⁹Ya Mishɛl, wəndə kwelea ka ghwene ta Shala ne, kese kamene wəsə shɛ we. Nahe ŋkɛ kese kaghəpə le gətəli te ghəa geva ta Moyize. Kese Mishɛl kadzeghe kaŋele ŋkɛ laka meha ghwə te we, ama ma ke: «Pa Mahwətə vate ɗa te gha.»

¹⁰Ama ŋele yaŋele mbeli nyi ɗepema hɛ hɛ ka ndiremia mehelea shɛhɛ. Ma wəsə nya ɗepe hɛ laka nza ta wəsəa shɛ, kala wəshi keseɗa nyi hwa gamba ne, gheŋkɛ nde za hɛ.

¹¹Ndiremi ya te hɛ, va nya zelete sebe ta Kayin hɛ. Nahe hɛ keslate tseŋwə yitea cɛdɛ kala Balam, nahe hɛ kempə va nya fatema ghena hɛ kala Korɛ.

¹²Ghenci ya kaka beze wəshi kezeme ta ŋayɛ, gheyɛ ka Kriste, va nya nza hɛ kazeme wəshi kezeme ba'a kasa wəshi kesa kaɗema hawe kazhɛ nda ke hɛ, deke ghəa nci yazəzə hɛ. Nahe hɛ kenza kala ləmbə nya kele sefə ba'a nya keɗema kame va. Nahe hɛ kenza kala wəfe nyi ɗema ya te hɛ te vəa ya ta nci. Ma kwa lamte geva yɛ slərə yitea hɛ ne, fəyitekeghə mpə hɛ.

¹³Nahe hɛ kenza kala yɛ gaŋkeɓe nyi dzawe dzawe ta ndərə, kagwəɓə wəshi hawea nci hɛ kala hwɛfɛ. Nahe hɛ kenza kala saseregwa nyi kendeŋe ba'a nyi veyi nda ŋkwa Shala ke hɛ kaghala ghala mbe viɗi nya diŋwədi ma.

¹⁴Ma ke Ɛnok, nde mberefaŋe ta hwelefe ta Adam gezete ghena kelɛŋə te ghəa nci vəashi: «Fatema mə, katese Nde sleke ŋkwa le ka ghwene ta ŋkɛ slibə slibə meŋe zhigə,

¹⁵kezha meha ghwə te pɛtɛa mbeli. Kateve nda fete ŋkɛ ke pɛtɛa ka jaɗafa te ghəa pɛtɛa wəshi nyi ndiremi ndiremi nyi menete hɛ laka fa nda ma ghena ke Shala ba'a te ghəa pɛtɛa ghena nyi ndiremi ndiremi nyi se hɛ kageze te Shala.»

¹⁶Mbelia shɛhɛ ne, farefa shɛ va wənəa nci keveci keveci we, kaŋgaɗe ghə kevə kevə ba'a kazele wəshi nyi ndiremi ndiremi nyi mawe hɛ hɛ. Kageze ghena ŋkele ntsə hɛ ba'a kafale kweci mbeli laka wəshi nyi ŋ'we hɛ va hɛ.

¹⁷Ama gheyɛ gɛ ka mcɛhɛ ɗa ganji, zəzəte mə ghena nyi gezete ŋayɛ ka ghwene ta Nde sleke ɓəmə Yɛsə Kriste vəashi.

¹⁸Kwa nza ŋkɛ ma ke hɛ sha gheyɛ: «Ma te keɗaŋe ta və ne, katenza mbeli nyi keteŋele ŋayɛ ba'a nyi ketemene wəshi nyi ndiremi ndiremi nyi ɗe ntsə ta nci shɛ.»

¹⁹Mbeli nyi kala nyighɛ ka nehe ŋkwa, wəshi nyi ɗe geva ta nci yamene hɛ, Sefəa Shala shɛ mbe hɛ we.

²⁰Ama gheyɛ gɛ, ka mcɛhɛ ɗa ganji, ŋate mə nza ta ŋayɛ te yɛ nya kese va Shala. Səkwə mə ghə laka kemane ta Sefəa Shala.

²¹Nza mə mbe ɗe ta Shala, ve mə ghə te Nde sleke ɓəmə Yɛsə Kriste. Ma mbe ganyɛa ŋkɛ ne, kateve ŋayɛ mpi nya kaghala ghala ŋkɛ.

²²Zhɛ mə heli yitea mbeli nyi nza zəzə ta nci bake bake.

²³Mbele mə hɛ laka zləgwə hɛ shave mbe ghwə. Zhɛ mə heli yitea kweci mbeli perə. Ama ntsehwele mə va jikə geva le hɛ: pa le yɛ lekwesa ta nci kenza kareɗa va wəshi nyi ndiremi ndiremi nyi mene hɛ.

²⁴Ŋa wəndə nya kenza kayakɛ ŋayɛ va teɗe ba'a nya kenza kancake ŋayɛ kaɗema beze te gheyɛ ba'a mbe zlama kwa kema ta ŋkɛ le zləvə,

²⁵ŋa Shala kwetɛŋe, Nde mbele ɓəmə laka Yɛsə Kriste, Nde sleke ɓəmə zləvə, kwele, berete ba'a meghe se vəashi, tsetsenya ba'a kaghala ghala. Amɛn.