Read KapsikiDC Ghena Kelɛŋə 11 Bible Online

Ghena Kelɛŋə 11 - KapsikiDC bible

Ghena Kelɛŋə 11

¹Pa kwete wəndə ndeke ɗa cafecɛge nya kala geta kedzeghe ŋkwa, ma ke sha 'ya: «Sate dzeghete ghɛa Shala ba'a reghwetɛ, ɓelate mbeli nyi kehawe va Shala mbe.

²Ama ŋwela nya pelɛke pelɛke ta ghɛa Shala ne, dzeghema na ma. Kwa nza ŋkɛ ne, nahe ŋkɛ kendeke nda geva ke kweci hwelefefi nyi keteŋkeɗe meleme nya keveyi geva tekeleke katere wəfaɗemsə bakeghəmbe.

³Kateghwene ka negha fete ta ɗa 'ya bake, nyi nza zewe hwa hwə va hɛ, kategeze nda ghena kelɛŋəa Shala hɛ ke mbeli kahɛ 1.260.»

⁴Nahe ka negha fete nyi bakea shɛhɛ kenza kabekele nyi bake ba'a kapaterela bake nyi kwa kema ta Nde sleke hɛɗi lema.

⁵Ma keɗe wəndə kamene nda wəsə kwa ndiremi ke hɛ ne, kasame ghwə kwa mɛa nci kampə nde jaga ta nci. Tsetse temte yayata wəndə nya keɗe kamene nda wəsə kwa ndiremi ke hɛ.

⁶Hweŋkwa ya va hɛ kaŋzle ghweme yitea ɗema va kame te hɛɗi te və nya geze ghena kelɛŋəa Shala hɛ teke te hɛɗi. Berete ya va hɛ kazhɛre yɛmə kamimi ba'a kave mama ta ndiremi te hɛ te və nya ɗe hɛ.

⁷Ma vəa ŋkwa nya tekiɗimte negha fete hɛ ne, katempa wəsə keseɗa nya kesame kwa ki nya ɗema ghala kwa le hɛ, katehərə hɛ ŋkɛ ba'a katempə hɛ ŋkɛ.

⁸Katenza geva ta nci te ŋkwa kebeke nya wəba nya mbe meleme nya wəba, te ŋkwa nya baŋate Nde sleke hɛ mbeli te sheghwə kwa zleŋkwa. Ma sləa melemea shɛ ne, Sodome, keɗema Ɛzhipte heka mbeli laka ghena kelɛŋə.

⁹Katenewe ka mpə mpə ta nci pɛtɛa mbeli, pɛtɛa yitehɛ, pɛtɛa yɛ ghena ba'a pɛtɛa yɛ hɛɗi kahɛ mahekene ba'a vəghwə. Ama katepele nda hweŋkwa hɛ ke mbeli kala hɛ we.

¹⁰Fare fare tenza ghəa mbeli nyi te hɛɗi yitea mpə ta mbeli nyi bake nyi, katezlama hɛ ba'a kateghwene nda wəshi gəmə hɛ ke ghəa nci va nya sahwe nda yaka ka mɛ ŋkwa ta Shala shɛhɛ kwele kwele ke mbeli.

¹¹Ama kwetere wəmbəa hɛ mahekene ba'a vəghwə ne, pa sefəa mpi nya kese va Shala vɛame geva mbe hɛ, pepelɛhetɛme hɛ sate te ŋkwa. Nahe pɛtɛa mbeli nyi kenakɛ hɛ kenza keta ta va ghazlənə.

¹²Ma ke ka mɛ ŋkwa nyi bake nyighɛ fate ghena nya le berete sawa pelɛ ghweme: «Same ŋayɛ mə teke.» Ntəŋə hɛ kadzeme ghweme mbe ləmbə kwa ntsə ta ka jaga ta nci.

¹³Te vəa shɛnyɛ ne, ntake hɛɗi kagaŋkəɗə kwele kwele, ghwəpə kwa meŋe ta bela ta meleme ŋzlanyɛ, mbeli slibə mberefaŋe ka mpə va gaŋkəɗə ta hɛɗia shɛ. Kwele kwele kweci mbeli nyi keghazlənənji ba'a nyi ketsahekɛ Shala nya pelɛ ghweme.

¹⁴Nahe kwa bake ta ndiremi kekiɗi, ama nahe kwa maheke ta ndiremi kenza takwa takwa.

¹⁵Pa nde mberefaŋe ta nde ghwene ta Shala vɛte veke. Fa mbeli ne, kazlape geva ghena le berete pelɛ ghweme, ma ke ghena shɛ: «Nahe meghe nya te hɛɗi lema kenza kaŋa Nde sleke ɓəmə ba'a kaŋa wəndə nya ntave ŋkɛ, kameghe kaghala ghala tenza ŋkɛ.»

¹⁶Pa mbelia jama nyi bakemsə wəfaɗeghəmbe nyi mentishɛ pelɛ pasla ta nci gwəɗəŋə ntiŋə ghə mbe hɛɗi kahawe va Shala,

¹⁷ma ke hɛ: «Mahwətə Shala nde berete, gha nya kenza ba'a nya kese, katsa ŋa ŋ'wese ghen'yɛ kwa menete slene na le berete ta ŋa nya kwele ba'a kwa nza na kameghe tsetsenya.

¹⁸Kazhɛ nda wənəa hwelefefi va gha, ama hwepe wənəa ŋa nde mene geva, nahe vəa meha ghwə te ka mpə mpə kese, vəa nya teve nda zhɛme na ke ka mene slene ta ŋa nyi kaka mɛ ŋkwa, mbeli nyi kaŋa ŋa ba'a mbeli nyi kehawe va gha, mbeli nyi jama jama keɗema nyi ɓɛhwɛ ɓɛhwɛ. Gheŋkɛ ya kavə nya teza sebe na te mbeli nyi kebeze hɛɗi na kwa.»

¹⁹Pa ghɛa Shala nya pelɛ ghweme ghwenemte geva, pa səndəkwəa jikə geva nya mbe ghɛa shɛ ncake geva. Tagha gɛ, yɛ slesla ta va, gaka ta yɛ ŋwələ, yɛ berazlɛ ta va, gaŋkəɗə hɛɗi ba'a bete ta kwacakelɛ kwele kwele menete geva.