Read KapsikiDC Ghena Kelɛŋə 15 Bible Online

Ghena Kelɛŋə 15 - KapsikiDC bible

Ghena Kelɛŋə 15

¹Kwa sebe ta ŋkɛ, pa 'ya nakɛ kwete wəsə kencɛ wəsə pelɛ ghweme. Kewəbanyɛ ŋkɛ ba'a kave nda nza heɓake ŋkɛ ke wəndə: ka ghwene ta Shala mberefaŋe nyi nza ndiremi mberefaŋe va hɛ, kwa nza ŋkɛ ghenci ya kaka keɗaŋe ta wəshi nyi kencɛ hwepe wənəa Shala.

²Kwa sebe ta ŋkɛ, pa 'ya nakɛ ndərə nya welɛlɛ kala kwacaregesla ba'a nya mewelaɗe le ghwə. Pa 'ya nakɛ mbeli nyi kehərəte wəsə keseɗa, pa ta ŋkɛ ba'a lamba nya kencɛ sləa ŋkɛ. Meslete hɛ te ndərə nya welɛ lɛa shɛ, gagera nyi ndeke nda Shala ke hɛ ya yitea dzeve ta nci.

³Ma ke hɛ ghate ciməa Moyize, nde mene slene ta Shala ba'a ciməa Zhɛgwə: «Mahwətə Shala nde berete, nahe yɛ slene ta ŋa kenza kejama jamanji ba'a kawəshi meŋele. Meghea hwelefefi, nahe yɛ zəzə ta ŋa kenza tiɗiɗi ba'a kaganda.

⁴Wa nde ɗema kahawe va gha wa Mahwətə? Wa nde ɗema katsahe ŋa wa? Kwa nza ŋkɛ ne, deke gha nde veyi geva tekeleke. Katese pɛtɛa hwelefefi kagwəɗəŋə kwa kema ta ŋa, kwa nza ŋkɛ nahe yɛ slene ta ŋa kencɛte geva darahwe.»

⁵Kwa sebe ta ŋkɛ, pa 'ya nakɛ ghɛa Shala nya nza cɛ lekwesa kebegeme geva mbe kaghwene geva pelɛ ghweme.

⁶Pa ka ghwene ta Shala mberefaŋe nyi nza ndiremi mberefaŋe va hɛ shave mbe ghɛa Shala, lekwesa nyi tɛawetɛa tɛawetɛa kala pawa ba'a nyi keslesla ya kənəa hɛ, zewe mze kwa tere tere ya hwa hwə va hɛ.

⁷Pa kwete wəndəa wəshi keseɗa nyi wəfaɗe ndeke nda zlerekwe mze kwa tere tere mberefaŋe ke ka ghwene ta Shala mberefaŋe. Nahe zlerekwea shɛhɛ kenza pɛre pɛre va hwepe wənəa Shala nya teghweme kaghala ghala.

⁸Pa n'yia ghwə viɗikɛ ŋkwa nya mbe ghɛa Shala tewəmbəreke zləvəa Shala ba'a berete ta ŋkɛ. Wəndə shɛ kapesle yitea dzembe ghɛa shɛ, tewə ndiremi nyi mberefaŋe nyi kese va ka ghwene ta Shala kekiɗimte geva we.