Read KapsikiDC Ghena Kelɛŋə 16 Bible Online

Ghena Kelɛŋə 16 - KapsikiDC bible

Ghena Kelɛŋə 16

¹Kwa sebe ta ŋkɛ ne, pa 'ya fate ŋwələ nya le berete shave mbe ghɛa Shala, ma ke sha ka ghwene ta Shala nyi mberefaŋe: «Kwiɗi mə kalə kasheke zlerekwe nyi mberefaŋe ta hwepe wənəa Shala te hɛɗi.»

²Pa nde ghate ta nde ghwene ta Shala slə ba'a shekeyi zlerekwe ta ŋkɛ te hɛɗi. Tagha gɛ, pa zhi nyi ndiremi ndiremi ba'a nyi kezhɛ ŋkwa shavenji te mbeli nyi nza lamba ta wəsə keseɗa te hɛ ba'a mbeli nyi kehawe va pa ta ŋkɛ.

³Pa nde bake ta nde ghwene ta Shala shekeyi ŋa ŋkɛ kwa ndərə. Pa yɛmə zhɛrenyɛ kala mimia wəndə kemte mte ba'a pa pɛtɛa wəshi nyi nza mpi hwe kwa ndərə mpənji.

⁴Pa nde maheke ta nde ghwene ta Shala shekeyi ŋa ŋkɛ kwa yɛ hələ ba'a yɛ ɗasle. Tagha gɛ, pa yɛmə zhɛrenyɛ kamimi.

⁵Fa 'ya ne, kageze ghena nde ghwene ta Shala nya kesleke yɛ yɛmə, ma ke: «Nahe na kenza tiɗiɗi, gha nya kenza, nya kese, gha nya keveyi geva tekeleke, nahe na kencɛte ghəa ŋa kande meha ghwə nya tiɗiɗi.

⁶Ma kwa nza ŋkɛ nahe hɛ keshekeyi mimia mbelia ŋa ba'a ŋa ka mɛ ŋkwa ta ŋa te hɛɗi ne, nahe na kendeke nda mimi ke hɛ kezha sa hɛ. Yawa, nahe wəsəa shɛ kehi va hɛ.»

⁷Kwa sebe ta ŋkɛ, ma ke ŋwələ gezete geva sawa pelɛ reghwetɛ: «Kaganda deŋwa Mahwətə Shala nde berete, nahe yɛ ma ghwə ta ŋa kenza kaganda ba'a tiɗiɗi.»

⁸Pa nde wəfaɗe ta nde ghwene ta Shala shekeyi ŋa ŋkɛ te veci. Tagha gɛ, hweŋkwa ya va veci katere mbeli laka ghwə ta ŋkɛ.

⁹Pa mbeli terenji va ghyana ta ŋkwa nya dzawea shɛ, pa hɛ ŋelekɛ Shala nya kesleke ndiremia shɛhɛ, ama kese hɛ kampi dzeve kezha tsahe ŋkɛ we.

¹⁰Pa nde mcɛfe ta nde ghwene ta Shala shekeyi ŋa ŋkɛ kənəa pasla ta wəsə keseɗa. Tagha gɛ, pa meghea ŋkɛ vame geva mbe ŋkwesle. Kahale ghɛnia nci mbeli va yaka shɛ.

¹¹Ntake hɛ kaŋele Shala nya pelɛ ghweme va yaka nyi te hɛ ba'a zhi nyi te hɛ. Ama kese kampi dzeve va wəshi nyi ndiremi ndiremia nci we.

¹²Pa nde ŋkwaŋe ta nde ghwene ta Shala shekeyi ŋa ŋkɛ kwa Efrate, hələ nya wəba. Pa hələ shifənyɛ kezha ve nda hweŋkwa ke ka meghe kɛfi nyi kese laka ŋkwa kesame ta veci.

¹³Kwa sebe ta ŋkɛ ne, pa 'ya nakɛ 'yi'yɛghwə mahekene yipə yipə le yɛ gwambe, kasame kwa mɛa shishi meŋele, kwa mɛa wəsə keseɗa ba'a kwa mɛa nde mɛ ŋkwa tseŋwə.

¹⁴Nahe hɛ kenza kasefəa 'yi'yɛghwə nyi kese kamene wəshi meŋele. Lə yalə hɛ sha ka meghea kɛfi nyi te hɛɗi lema, yitea tsene hɛ kezha mpa te veci nya wəba ta Shala nde berete.

¹⁵Ma ke Nde sleke ŋkwa gezete: «Wa nya 'ya nya kase kala ghərə. Zlama ya va wəndə nya kenza le ntsə ba'a nya keyate lekwesa ta ŋkɛ, kezha ɗema ŋkɛ kadzeghwa mederelaŋe ba'a kezha ɗema mbeli kanewe zeweve ta ŋkɛ.»

¹⁶Pa 'yi'yɛghwəa shɛhɛ tsenete ka meghea kɛfi te ŋkwa nya heka mbeli kaHarmagɛdon[3] le ghena ta ka Ɛbrə.

¹⁷Pa nde mberefaŋe ta nde ghwene ta Shala shekeyite ŋa ŋkɛ yitea sefə. Pa ŋwələ nya le berete fate geva shave mbe ghɛa Shala. Pelɛ pasla ta Shala sawa ŋkɛ, ma ke: «Nahe ŋkɛ kekiɗimte geva.»

¹⁸Tagha gɛ, pa yɛ slesla ta va, yɛ gaka ta ŋwələ, yɛ berazlɛ ta va ba'a gaŋkəɗə ta hɛɗi nya le berete menete geva. Ma ghala nza geva wəndə ŋelɛ te hɛɗi ne, kegha gaŋkəɗə ta hɛɗi kamenete geva kala nyagha we.

¹⁹Pa meleme nya wəba neheve geva mahekene mbe ba'a pa meleme nyi te pɛtɛa yɛ hɛɗi ŋzlanji. Pa Shala zəzəte Babilone nya wəba kezha sa nda zlerekwe nya tɛa hwepe wənəa ŋkɛ nya dzawe pɛre te.

²⁰Pɛtɛa hɛɗi nyi dzeyi te tepe ta yɛmə zanji, kezhɛne mbeli kanakɛ yɛ ghweme we.

²¹Pa kwacakelɛ nyi jama jama betakawa geva sawa pelɛ ghweme kadzeghəa mbeli. Ntake mbeli kaŋele Shala tewəmbəreke ndiremi nya wəba nya keleke yɛ kwacakelɛ, kwa nza ŋkɛ nahe ndiremia shɛ kenza dzawe fate fate.