Read KapsikiDC Ghena Kelɛŋə 18 Bible Online

Ghena Kelɛŋə 18 - KapsikiDC bible

Ghena Kelɛŋə 18

¹Ma kwetere wəmbəa ŋkɛ, pa 'ya nakɛ kwete nde ghwene ta Shala kasawa pelɛ ghweme. Berete ya ve kwele kwele, kawaŋe ŋkwa nya te hɛɗi lema zləvəa ŋkɛ.

²Ma ke zlapete le berete: «Nahe Babilone nya wəba keŋzla, nahe ŋkɛ keŋzla. Tsetsenya ne, gheŋkɛ ya kaŋkwa kenza ta yɛ 'yi'yɛghwə, kaŋkwa kewəfərə ta pɛtɛa mama ta sefə nyi wale wale ba'a kaŋkwa kenza ta wəshi nyi kezlə nyi wale wale ba'a nyi ndiremi ndiremi.

³Kwa nza ŋkɛ nahe pɛtɛa hwelefefi kesahwe tɛa mene mefətekwəa nta. Nahe ka meghea kɛfi nyi te hɛɗi kemenete mefətekwə le ba'a nahe ka zhɛre dzeve nyi te hɛɗi kezhɛrenji kaka mcɛlə va wəba mcɛləa nta.»

⁴Kwa sebe ta ŋkɛ, pa 'ya fate kwete ŋwələ nya kesawa pelɛ ghweme, ma ke: «Shave ŋayɛ mə mbe, gheyɛ mbelia ɗa, yitea ɗema yɛ kanza hwa jaɗafa ta nta ba'a yitea ɗema yɛ kanza hwa ndiremi nyi jama jama nyi keteme te.

⁵Kwa nza nde nahe yɛ jaɗafa ta nta ketsenete geva ntsake yitea ghweme ba'a nahe Shala kezəzəte slene nyi ndiremi ndiremi nyi menete nde.

⁶Mene nda mə kala nya menete nda nde ke kweci mbeli, wate mə wəsə nya menete nde bake zhigə te. Pɛrekɛ nda mə zlerekwe nya sa nda tɛ nde kwa ke kweci mbeli le tɛ nya ghyana ma bake zhigə.

⁷Kwele kwele ɗehwe zləvə ba'a mcɛlə nde. Ŋkikɛ nda mə le yaka ba'a nehwene kala nyagha shɛ. Ma ke sha geze mbe ghəa nta: Nahe 'ya kentishɛ pelɛ pasla kala male nya kameghe, kenza 'ya kamale wede we, katenza 'ya mbe nehwene tɛape we.

⁸Vatse tedzete ndiremi nyi jama jama nyi kewəmbəyi nda geva te veci kwetɛŋe: zereghwe kemte, nehwene ba'a ma. Kateteremte geva nde le ghwə. Kwa nza ŋkɛ nahe Mahwətə Shala nya kemehate ghwə te kenza bereteke.»

⁹Nahe ka meghea kɛfi nyi te hɛɗi kemenete mefətekwə le, nahe hɛ kemenete ghəa nci le mcɛləa nta nya wəba. Ma kwa newe n'yia ghwə nya ketere ŋkɛ hɛ ne, katenehwene hɛ yitea melemea shɛ ba'a kateŋgaɗe ghə hɛ tewəmbəreke ghenta.

¹⁰Kaghereŋe hɛ cakeɗake, va ghazlənə va ndiremi nyi jama jama nyi te, ma ke hɛ sha tegeze: «Awema, awema. Deke mbe lerə kwetɛŋe mehate ghwə Shala te gha, gha Babilone, meleme nya wəba ba'a nya berete gɛ wa!»

¹¹Tsagha shɛ ne, kanehwene ka zhɛre dzeve nyi te hɛɗi ba'a kaŋgaɗe ghə hɛ te ghəa ŋkɛ, va nya ɗema wəndə shɛ kezha zhɛne kapa wəshi kezhɛre dzeve ta nci:

¹²mze kwa tere tere, mze kwa tɛawetɛa, pelɛ nyi nza zləvə te hɛ, wəshi kepesa geva, lekwesa pawa nyi slɛahe slɛahe, zlave nyi ghemea ghemea ba'a nyi ghɛmɛa ghɛmɛa, shintia gərədə gamba, mama ta sheghwə ganji, mama ta wəshi nyi le slene ta cewe, le sheghwə nyi nza zləvə te hɛ, le mze kwa ghwə ghwə, le lɛ keɗema le kwacaregesla,

¹³zlapələa wəfe nya kezəŋwə megela, kimba, 'wərdə ganyɛ, kweci 'wərdə, 'wərdə kwa hə hə, tɛ, n'yi, hə, ha, sla, timɛti, gədəwəa lɛmə, yɛ wəmata gədəwə, ka mavashi ba'a ka daŋgayɛ.

¹⁴Ma ke ka zhɛre dzeve sha geze nda ke meleme: «Nahe pɛtɛa wəshi nyi ɗehwe na kakemave keza mbe gha. Nahe mcɛlə ba'a zləvə keza mbe gha. Katezhɛne mbeli kasləyi pɛtɛa wəshia shɛhɛ tɛape we.»

¹⁵Ma ka zhɛre dzeve nyi kemenete ghəa nci le fəli mbe melemea shɛ ne, kateghereŋe hɛ cakeɗake va ghazlənə va ndiremi nya wəba nya te. Katenehwene hɛ ba'a kateŋgaɗe ghə hɛ,

¹⁶ma ke hɛ: «Awema! Wa nya ndiremi te meleme nya wəba nya gɛ! Nahe nde kese bətə lekwesa pawa nyi slɛahe slɛahe, lekwesa zlave ganji nyi ghemea ghemea ba'a nyi ghɛmɛa ghɛmɛa, wəsə kepesa geva mze kwa tere tere, pelɛ nyi nza zləvə te hɛ ba'a wəshi kepesa geva nyi ganji ganji.

¹⁷Deke mbe lerə kwetɛŋe zanji pɛtɛa mcɛləa shɛhɛ.» Nahe pɛtɛa ka zleɗe kwambelə, pɛtɛa mbeli nyi kwa yɛ kwambelə, mbeli nyi kedzeghwa dzeyi te ndərə ba'a ka kese kelepe keghereŋenji cakeɗake yite,

¹⁸ma ke hɛ tsate lewela kwa nakɛ n'yia ghwə hɛ: «Kegha meleme kanza wəbake kala nya we.»

¹⁹Pa hɛ kərəaghe keləwə kənəa ghəa nci, ntake hɛ kanehwene ba'a katsa kemagɛaŋwa, ma ke hɛ: «Awema! Ndiremi ya te meleme nya wəba nya gɛ wa! Le mcɛləa nta menete ghəa nci pɛtɛa mbeli nyi nza kwambelə va hɛ te ndərə. Deke mbe lerə kwetɛŋe zamte geva nde.»

²⁰Ghweme, zlama yitea ŋzla ta nta. Gheyɛ mbelia Shala, ka ghwene ta Yɛsə ba'a ka mɛ ŋkwa, zlama mə, kwa nza ŋkɛ nahe Shala kemehate ghwə te tewəmbəreke wəsə kwa ndiremi nya menete ŋayɛ nde.

²¹Tagha gɛ, pa nde ghwene ta Shala nya berete kelete pelɛ kala vena nya wəba ba'a negheyi kwa ndərə, ma ke: «Tsetse teŋzla geva Babilone ghwəpə kadzete hɛɗi, katezhɛne mbeli kanewe ŋkɛ tɛape we.

²²Katezhɛne mbeli kafa ciməa ka tsa gagera, ka tsa wəshi ketsa, ka vɛ shela ba'a veke mbe gha we. Katezhɛne mbeli kasləyi nde ɗepe mene yayata slene mbe gha we, katezhɛne mbeli kafa gaka ta vema mbe gha we.

²³Katezhɛne paterela kawaŋe ŋkwa mbe gha we. Katezhɛne mbeli kafa ŋwələa za makwa ba'a ŋa makwa ta ŋkɛ mbe gha we. Kwa nza ŋkɛ ne, nahe ka zhɛre dzeve nyi mbe gha kese kambeli nyi nza zləvə te hɛ te hɛɗi, nahe yɛ mene ghwɛ ta ŋa keghwetehwe pɛtɛa hwelefefi.»

²⁴Ma nda vate geva ɗe te Babilone ne, va nya sləyi mimia ka mɛ ŋkwa, mimia mbelia Shala ba'a mimia pɛtɛa mbeli nyi slamte ghə mbeli te hɛ te hɛɗi.