Read KapsikiDC Ghena Kelɛŋə 19 Bible Online

Ghena Kelɛŋə 19 - KapsikiDC bible

Ghena Kelɛŋə 19

¹Ma kwetere wəmbəa ŋkɛ ne, pa 'ya fate ŋwələ nya le berete pelɛ ghweme kala ŋwələa mbeli kwele kwele, ma ke: «Alɛləwya! Kambele ɓəmə Shala ta ɓəmə, ŋa ŋkɛ zləvə ba'a berete.

²Nahe yɛ meha ghwə ta ŋkɛ kenza kaganda ba'a tiɗiɗi. Nahe ŋkɛ kendeke nda fete ke male mefətekwə nya kebezemte hɛɗi le male mefətekwəa nta. Nahe ŋkɛ kevate ɗa te va nya mpəmte ka mene slene ta ŋkɛ nde.»

³Ma ke hɛ zhɛkwa: «Alɛləwya! Kadzeme n'yia ghwə nya ketere meleme nya wəba nya kaghala ghala yitea ghweme.»

⁴Pa mbelia jama nyi bakemsə wəfaɗeghəmbe ba'a wəshi keseɗa nyi wəfaɗe gwəɗəŋənji kezha hawe va Shala nya mentishɛ pelɛ pasla, ma ke hɛ gezete: «Amɛn. Alɛləwya!»

⁵Kwa sebe ta ŋkɛ ne, pa 'ya fate ŋwələ shave sawa pelɛ pasla, ma ke: «Tsahe mə Shala ta ɓəmə, gheyɛ pɛtɛa ka mene slene ta ŋkɛ, gheyɛ mbeli nyi kehawe ve, mbeli nyi ɓɛhwɛ ɓɛhwɛ ba'a nyi jama jama.»

⁶Kwa sebe ta ŋkɛ, pa 'ya fate ŋwələ kala ŋa mbeli kwele kwele. Kagaka ŋwələa shɛ kala yɛ mewədzərə ta ghwa ba'a kala yɛ berazlɛ ta va nyi le berete. Ma ke ŋwələa shɛ: «Tsahe mə Shala! Kwa nza ŋkɛ ne, nahe Mahwətə Shala nde berete ta ɓəmə keveyi meghea ŋkɛ.

⁷Zlama ɓəmə ba'a nza ɓəmə fare fare, tsahe ɓəmə ŋkɛ. Kwa nza ŋkɛ nahe vəa veghe ta Zhɛgwə kese, nahe makwa ta ŋkɛ kehite geva.

⁸Nahe mbeli kendeke nda lekwesa pawa nyi slɛahe slɛahe, nya keslesla ba'a nya ganyɛ.» Lekwesa pawa shɛ nde ncɛ slene nyi tiɗiɗi tiɗiɗi nyi menete mbelia Shala.

⁹Ma ke nde ghwene ta Shala sha 'ya: «Rafete: Zlama ya va mbeli nyi kehekakɛ geva yitea veghe ta Zhɛgwə.» Zhɛne ne, ma ke mtsehete ghena shɛ: «Ghenci ya ya kaghena nyi kaganda ta Shala.»

¹⁰Pa 'ya gwəɗəŋə ɗa te hɛɗi kwa kema ta ŋkɛ kahawe ve, ama ma ke sha 'ya: «Menema na kala nya ma! Nahe 'ya kenza kande mene slene ta Shala kala gha ba'a kala ka kesaka meyɛ ŋa nyi dɛŋe dɛŋe te kaganda nya ncɛte Yɛsə. Shala yahi na kahawe ve.» Kaganda nya ncɛte Yɛsə ne, gheŋkɛ ya kazəzə ta ka mɛ ŋkwa.

¹¹Kwa sebe ta ŋkɛ ne, pa 'ya nakɛ ghweme keghwene ghwene, pa gədəwə kwa ghwaba ncake geva. Ma wəndə nya pelɛ ne, Nza dɛŋe dɛŋe ba'a Kaganda sləa ŋkɛ. Kameha ghwə ŋkɛ ba'a kampa ŋkɛ laka nza tiɗiɗi.

¹²Kaslesla ntsə ta ŋkɛ kala ghwə, kwele kwele derə meghe mbe ghə ve. Slə nya ɗepema kwete wəndə, deke gheŋkɛ nde ɗepe ya kerafe rafe te.

¹³Nahe ŋkɛ keseɗaghe karalame nya bətə mbe mimi. Ma sləa ŋkɛ ne, Ghena ta Shala.

¹⁴Kazele ŋkɛ ka sewajɛ nyi pelɛ ghweme pelɛ gədəwəa lɛmə nyi ghwaba ghwaba. Nahe pɛtɛa nci kenza mbe lekwesa pawa nyi slɛahe slɛahe, nyi ghwaba ghwaba ba'a nyi ganji ganji.

¹⁵Kasame kafayɛ nya lɛmelɛ kwa mɛa ŋkɛ kezha mpə mbeli nyi te hɛɗi. Kateya hɛ ŋkɛ le geta lɛ, kateŋkeɗe rɛzɛŋe ŋkɛ kwa ŋkwa keŋkeɗe ta hwepe wənə nya dzawe ta Shala nde berete.

¹⁶Ma te karalamea ŋkɛ ba'a te basa ta ŋkɛ ne, ma ke slə rafete geva: «Meghea ka meghea kɛfi ba'a Nde sleke ka sleke ŋkwa.»

¹⁷Kwa sebe ta ŋkɛ, pa 'ya nakɛ nde ghwene ta Shala meghereŋe te veci. Ma ke zlapete ghena le berete ke pɛtɛa wəshi nyi kezlə yitea ghweme: «Nde mə, tsene geva kezha veghe nya wəba ta Shala!»

¹⁸Nde mə kazeme geva ta ka meghea kɛfi, geva ta mbeli nyi te ghəa ka sewajɛ, geva ta ka sewajɛ, geva ta gədəwəa lɛmə, geva ta ka zleɗe hɛ, geva ta pɛtɛa mbeli, ka mamzashi keɗema ka mavashi, mbeli nyi ɓɛhwɛ ɓɛhwɛ keɗema nyi jama jama.

¹⁹Kwa sebe ta ŋkɛ, pa 'ya nakɛ wəsə keseɗa, ka meghea kɛfi nyi te hɛɗi ba'a ka sewajɛa nci ketsene tsene kezha mpa le wəndə nya pelɛ gədəwə kwa ghwaba ba'a le ka sewajɛa ŋkɛ.

²⁰Pa mbeli kesawa wəsə keseɗa kwa daŋgayɛ, tsagha nde mɛ ŋkwa nde tseŋwə nya kemenete wəshi meŋele kwa kema ta ŋkɛ kezha ghwete mbeli nyi nza lamba ta wəsə keseɗa te hɛ ba'a nyi kehawe va pa ta ŋkɛ. Pa yɛ wəsə keseɗa le nde mɛ ŋkwa tseŋwə beteyi geva le mpi kwa ndərəa ghwə ta gezla.

²¹Le kafayɛ nya kesame kwa mɛa wəndə nya pelɛ gədəwə mpəmte geva kweci mbeli, behe behe 'yɛ nyi kezlə va slia nci.