Read KapsikiDC Ghena Kelɛŋə 20 Bible Online

Ghena Kelɛŋə 20 - KapsikiDC bible

Ghena Kelɛŋə 20

¹Kwa sebe ta ŋkɛ, pa 'ya nakɛ nde ghwene ta Shala kasawa pelɛ ghweme. Lakelɛ kepele ki nya ɗema ghala kwa ba'a zewe lɛ nya wəba ya yitea dzeve ta ŋkɛ.

²Pa ŋkɛ keseve shishi meŋele nya vəashi, geze ta ŋkɛ, gətəli keɗema Satan, pa ŋkɛ hwepete ŋkɛ le zewe lɛ kava slibə.

³Pa nde ghwene ta Shala negheyi kwa ki nya ɗema ghala kwa, nya ŋzlete ŋkɛ le lakelɛ, pa ŋkɛ ndeɓeyi lamba te, yitea ɗema ŋkɛ kazhɛne kaza hwelefefi kava slibə. Ma kwetere wəmbəa ŋkɛ, katenza ŋkɛ waɗe kavə ɓɛhwɛ.

⁴Ma ɓiyitsa ne, pa 'ya nakɛ yɛ pasla. Pa mbeli nyi mentishɛ pelɛ hɛ kekemave berete kemeha ghwə. Pa 'ya nakɛ shenaŋkwe ta mbeli nyi slamte ghə mbeli te hɛ tewəmbəreke nza ta nci dɛŋe dɛŋe te kaganda nya ncɛte Yɛsə ba'a te ghena ta Shala. Kese hɛ kahawe va wəsə keseɗa, ya va pa ta ŋkɛ we. Kekelete lamba ta wəsə keseɗa hɛ mɛa kema ta nci, ya te dzeve ta nci we. Pa hɛ same kwa kwele le mpi ba'a nzanji kaka meghea kɛfi zlaɓe le Kriste kava slibə.

⁵Kesame kweci mbeli kwa kwele le mpi nda kiɗinji va slibə we. Gheŋkɛ ya kakwa ghate ta same kwa kwele le mpi.

⁶Zlama ya va mbeli nyi kaka ghate kasame kwa kwele le mpi, nahe hɛ kenza kambelia Shala, kazhɛne mte kwa bake kasleke hɛ we. Katenza hɛ kaka dzeghe nda melɛ ke Shala ba'a ke Kriste, katenza kaka meghea kɛfi zlaɓe le Kriste kava slibə.

⁷Ma vəa ŋkwa nya tekiɗi va slibə ne, katenza Satan waɗe same kwa daŋgayɛa ŋkɛ.

⁸Katelə ŋkɛ kaghwete hwelefefi nyi te hɛɗi lema, geze ta ŋkɛ, Gog ba'a Magog[4]. Katetsene hɛ ŋkɛ kezha mpa, katenza hɛ kwele kwele kala ndaleghe kwa hələ.

⁹Kadzeghwa hɛ te hɛɗi lema, kantəslə ghedəkwəa mbeli nyi kaŋa Shala hɛ, meleme nya ɗehwe Shala. Ama pa ghwə sawa pelɛ ghweme ba'a teremte hɛ.

¹⁰Kwa sebe ta ŋkɛ, pa gətəli nya keghwete hɛ negheyi geva kwa ndərəa ghwə ta gezla, nya nza yɛ wəsə keseɗa mbeli le nde mɛ ŋkwa tseŋwə kwa. Katesa yaka hɛ kwele kwele veci le viɗi kaghala ghala.

¹¹Kwa sebe ta ŋkɛ, pa 'ya nakɛ pasla nya wəba nya tɛawetɛa ba'a wəndə mentishɛ pelɛ. Pa yɛ hɛɗi le ghweme hwɛnji kwa kema ta ŋkɛ, kezhɛne mbeli kanakɛ hɛ we.

¹²Ma kwetere wəmbəa ŋkɛ ne, pa 'ya nakɛ mbeli nyi kempə mpə, mbeli nyi jama jama ba'a nyi ɓɛhwɛ ɓɛhwɛ, meslete meslete kwa kema ta pasla. Pa yɛ palepa pepelemte geva. Pa kwete palepa pelemte geva: gheŋkɛ ya kapalepa ta mpi. Pa ghwə mehate geva te mbeli nyi kempə mpə kala wəshi nyi menete hɛ, kala wəsə nya kerafete geva mbe palepa shɛhɛ.

¹³Pa ndərə zhɛneke mbeli nyi kempə mpə nyi kwa. Pa yɛ mte le ghɛa mbelia kwahɛɗi zhɛneke ka mpə mpə ta nci perə. Pa ghwə mehate geva te hɛ pɛtɛ kala wəshi nyi menete hɛ.

¹⁴Pa yɛ mte le ghɛa mbelia kwahɛɗi negheyi geva kwa ndərəa ghwə. Ndərəa ghwəa shɛ ya kakwa bake ta mte.

¹⁵Kanegha geva yayata wəndə nya ɗema sləa ŋkɛ kerafete geva te palepa ta mpi kwa ndərəa ghwə.