Read KapsikiDC Ghena Kelɛŋə 5 Bible Online

Ghena Kelɛŋə 5 - KapsikiDC bible

Ghena Kelɛŋə 5

¹Pa 'ya nakɛ palepa kakwa peɗe peɗe mbe dzeve kwa zeme ta wəndə nya mentishɛ pelɛ pasla. Rafe ya te yɛ bela ta ŋkɛ bake nci, keŋzle ŋzle ŋkɛ le lamba mberefaŋe.

²Pa 'ya nakɛ nde ghwene ta Shala nya berete kazlape ghena le berete, ma ke: «Wa wəndə nya kehi kampə lamba nyi ba'a kapele palepa nya wa?»

³Ama wəndə shɛ, ya pelɛ ghweme, ya te hɛɗi, ya kwa zeweve ta hɛɗi nya kenza kapelemte palepa nya ba'a kanewakɛ ŋkwa nya mbe we.

⁴Ntake 'ya kanehwene kwele kwele, va nya ɗema wəndə nya kenza kapelemte palepa shɛ ba'a kanewakɛ ŋkwa nya mbe shɛ.

⁵Tagha gɛ, ma ke kwete wəndəa mbelia jama shɛhɛ sha 'ya: «Nehwenema na ma. Newe ma, nahe nivɛrə nya mbe hwelefe ta Zhəwda, sebe ta meghe David, kehərəte ŋkwa. Wərə ŋkɛ kampəmte lamba nyi mberefaŋe ba'a kaghwenemte palepa shɛ.»

⁶Tagha gɛ, pa 'ya nakɛ Zhɛgwəa təmə meslete dzeme vare pasla, dzasle kwa wəshi keseɗa nyi wəfaɗe nyighɛ ba'a mbelia jama. Kala wəsə nya dzeghekɛ melɛ mbeli le ŋkɛ. Tereme ya mberefaŋe kwa ghə ve, tsagha ntsə mberefaŋe nyi kasefə mberefaŋe nyi kese va Shala, nyi keghweneghe geva kadzete hɛɗi lema.

⁷Pa Zhɛgwəa təmə se kakelete palepa shɛ mbe dzeve kwa zeme ta wəndə nya mentishɛ pelɛ pasla.

⁸Ma kwa kelete palepa kwa peɗe peɗea shɛ ŋkɛ ne, pa wəshi keseɗa nyi wəfaɗe nyi ba'a mbelia jama nyi bakemsə wəfaɗeghəmbe gwəɗəŋənji kwa kema ta ŋkɛ. Gagera ba'a helape mze kwa tere tere nyi nza 'wərdə kwa hə hə pɛre pɛre te hɛ, nyi kasəkwə ghə ta mbelia Shala, ya va yayata wəndəa nci.

⁹Ma ke hɛ sha gha cimə mɛnɛfɛ: «Nahe na kehi kakele palepa ba'a kampə lamba nyi te. Kwa nza ŋkɛ nahe mbeli kedzeghekɛ melɛ le gha. Laka mimia ŋa ne, nahe na kembeɗeke nda mbeli shave mbe yayata yita, yayata ghena, yayata hwelefe ba'a yayata hɛɗi ke Shala.

¹⁰Nahe na kezhɛrete hɛ kawəvəsəa ka dzeghe Shala kezha mene nda slene ke Shala ta ɓəmə. Katesleke hɛɗi lema hɛ.»

¹¹Newe 'ya zhɛkwa ne, pa 'ya fate ŋwələa ka ghwene ta Shala kwele kwele: miliyeŋə miliyeŋə zhigə miliyeŋə. Nahe hɛ kenza sleslete dzeyi yitea pasla, wəshi keseɗa nyighɛ ba'a mbelia jama.

¹²Ma ke hɛ zlapete le berete: «Nahe Zhɛgwəa təmə nya dzeghekɛ melɛ mbeli le kehi kakemave meghe, mcɛlə, ntsehwele, berete, kwele, zləvə, tsahe.»

¹³Ma fa 'ya ne, ma ke wəshi nyi pelɛ ghweme, nyi te hɛɗi, nyi kwa zeweve ta hɛɗi ba'a nyi kwa ndərə, geze ta ŋkɛ, pɛtɛa wəshi nyi kepate geva zlapete: «Ŋa wəndə nya mentishɛ pelɛ pasla ba'a ŋa Zhɛgwəa təmə nza tsahe, kwele, zləvə ba'a berete kaghala ghala.»

¹⁴Ma ke wəshi keseɗa nyi wəfaɗe zhɛnete: «Amɛn.» Tagha gɛ, gwəɗəŋə mbelia jama kwa kema ta ŋkɛ kahawe.