Read KapsikiDC Ghena Kelɛŋə 7 Bible Online

Ghena Kelɛŋə 7 - KapsikiDC bible

Ghena Kelɛŋə 7

¹Ma kwetere wəmbəa ŋkɛ, pa 'ya nakɛ ka ghwene ta Shala wəfaɗe meghereŋe laka bela nyi wəfaɗe ta hɛɗi. Pa hɛ keseve sefə nyi wəfaɗe te hɛɗi, yitea ɗema sefə kavɛ te hɛɗi, ya te ndərə ya kənəa yɛ wəfe.

²Pa 'ya nakɛ kwete nde ghwene ta Shala nya kesame laka ŋkwa kesame ta veci, lamba ta Shala teghweme ya yitea dzeve ve. Ma ke tsate nda lewela le berete ke ka ghwene ta Shala nyi wəfaɗe nyi kekemave berete kezha beze hɛɗi ba'a ndərə:

³«Bezema hɛɗi, ya ndərə, ya yɛ wəfe yɛ, tewə gheɓəmə kemeneyi lamba mɛa kema va ka mene slene ta Shala ta ɓəmə ma.»

⁴Pa 'ya fate ɓela ta mbeli nyi menate geva lamba ta Shala te hɛ: mbeli slibə gwəmsə ba'a wəfaɗemsə wəfaɗeghəmbe, shave mbe pɛtɛa hwelefefi nyi mbe Israyɛl.

⁵Shave mbe hwelefe ta Zhəwda ne, mbeli slibə meŋe bakeghəmbe yamenate geva lamba te hɛ, mbe hwelefe ta Rəbɛn ne, mbeli slibə meŋe bakeghəmbe, mbe hwelefe ta Gad ne, mbeli slibə meŋe bakeghəmbe,

⁶mbe hwelefe ta Asɛr ne, mbeli slibə meŋe bakeghəmbe, mbe hwelefe ta Nɛftali ne, mbeli slibə meŋe bakeghəmbe, mbe hwelefe ta Manasɛ ne, mbeli slibə meŋe bakeghəmbe

⁷mbe hwelefe ta Simɛyon ne, mbeli slibə meŋe bakeghəmbe, mbe hwelefe ta Lɛvi ne, mbeli slibə meŋe bakeghəmbe, mbe hwelefe ta Isakar ne, mbeli slibə meŋe bakeghəmbe,

⁸mbe hwelefe ta Zabəlon ne, mbeli slibə meŋe bakeghəmbe, mbe hwelefe ta Zhozɛf ne, mbeli slibə meŋe bakeghəmbe, mbe hwelefe ta Bɛnjamɛn ne, mbeli slibə meŋe bakeghəmbe.

⁹Ma kwetere wəmbəa ŋkɛ ne, pa 'ya newakɛ ŋkwa ba'a nakɛ mbeli kwele kwele, wəndə shɛ kaɓelate hɛ we. Mbeli nyi kese hwa pɛtɛa hɛɗi, pɛtɛa yitehɛ, pɛtɛa hwelefefi ba'a pɛtɛa ghena hɛ. Meghereŋe hɛ kwa kema ta pasla ba'a kwa kema ta Zhɛgwəa təmə, mbe rewebe nyi tɛawetɛa tɛawetɛa ba'a slekea peha yitea dzeve.

¹⁰Ma ke hɛ zlapete ghena le berete: «Va Shala ta ɓəmə nya mentishɛ pelɛ pasla ba'a va Zhɛgwəa təmə se mbele ta ɓəmə.»

¹¹Pa pɛtɛ ka ghwene ta Shala ghereŋenji dzeyi yitea pasla, mbelia jama ba'a wəshi keseɗa nyi wəfaɗe. Gwegwəɗəŋə hɛ ntiŋə ghə mbe hɛɗi kwa kema ta pasla kezha hawe va Shala,

¹²ma ke hɛ: «Amɛn! Ŋa Shala ta ɓəmə nza tsahe, zləvə, ntsehwele, ŋ'wese, kwele ba'a berete kaghala ghala! Amɛn.»

¹³Ma ke kwete wəndəa mbelia jama 'yɛwete va 'ya: «Ka wa mbeli nyi mbe rewebe nyi tɛawetɛa tɛawetɛa nyi ba'a tema se hɛ wa?»

¹⁴Ma 'ya shɛ zhɛnete nda: «Nde sleke ɗa, gha nde ɗepe.» Tagha gɛ, ma ke sha 'ya: «Ghenci ya kambeli nyi sahwe nda yaka mbeli kwele kwele ke hɛ. Nahe hɛ ketsewemte yɛ rewebea nci hwa mimia Zhɛgwəa təmə. Tagha gɛ, nahe yɛ lekwesa ta nci kezhɛrenji tɛawe tɛawe.

¹⁵Vatse nza hɛ kwa kema ta pasla ta Shala kezha mene nda slene viɗi le veci mbe ghɛa ŋkɛ. Kateya hɛ wəndə nya mentishɛ pelɛ pasla.

¹⁶Katezhɛne ma keɗema ndere kazhɛ nda ke hɛ we, katezhɛne veci keɗema ghyana ta ŋkwa kandə hɛ we.

¹⁷Kwa nza ŋkɛ Zhɛgwəa təmə nya te tepe ta pasla nde teya hɛ ba'a tebeghe hɛ kalə kadzemɛa yɛ ɗaslea yɛməa mpi. Katesehwe nda pɛtɛa nehwene nya kwa ntsə ta nci Shala ke hɛ.»