Read KapsikiDC Rət 1 Bible Online

Rət 1 - KapsikiDC bible

Rət 1

¹Ma te və nya nza ka meha ghwə te ghə mbe Israyɛl ne, pa ma menete geva te hɛɗi. Vatse nda slə kwete wəndə mbe meleme ta Bɛtelɛhɛm mbe hwelefe ta Bɛnjamɛn te hɛɗia ka Zhəwda, le male ta ŋkɛ ba'a ŋwale tezhilia ŋkɛ bake kadzembe hɛɗia Mowab.

²Ma sləa wəndəa shɛ ne, Ɛlimɛlɛk, sləa male ta ŋkɛ ne, Nowɛmi, sləa ŋwale tezhilia ŋkɛ nyi bakea shɛhɛ ne, Malon ba'a Kiliyon, ka Ɛfrata nyi keshave mbe meleme ta Bɛtelɛhɛm te hɛɗia Zhəwda. Pa hɛ se kanzakɛ nza mbe Mowab.

³Pa Ɛlimɛlɛk za Nowɛmi mtenyɛ, mba nde le ŋwalea nta nyi bake.

⁴Pa hɛ wəmeve ŋwalea kwɛa ka Mowab, sləa kwa ghate Orpa, nde bake Rət, nahe hɛ kemenete va gare meŋe mbe.

⁵Pa yɛ Malon le Kiliyon mpənji bake pɛtɛ. Mba Nowɛmi tsagha, za shɛ we, ŋwale shɛ we.

⁶Ma kwa sebe ta ŋkɛ, cape hɛ le ka makwashia nta nyighɛ bake slə se mbe Mowab, kwa fate nde nahe Shala kekemanakɛ mbelia nta kandeke nda wəshi kezeme ke hɛ.

⁷Pa slə te ŋkwa nya nza hɛ le makwashia nta nyi bake nyighɛ kezha zhɛne geva kadzete hɛɗia ka Zhəwda.

⁸Ma ke Nowɛmi sha ka makwashia nta nyi bake nyighɛ kwa hweŋkwa: «Zhɛneghe mə geva kalə sha mbelia ŋayɛ, yayata wəndə kalə sha meghekɛ! Pa Mahwətə menete ŋayɛ ganyɛ kala nya menete nda yɛ ke ŋwale tezhilia ɗa nyi kempə ba'a ke 'ya perə.

⁹Pa Mahwətə ndeke nda zhɛne mpi ke yayata ŋayɛ ki ghɛa zhilia ŋayɛ.» Pa həməwəve hɛ. Ntake hɛ kanehwene kwele kwele.

¹⁰Ma ke hɛ shɛ: «Ewə ghen'yɛ kalə yitea gha sha mbelia ŋa.»

¹¹Ama, ma ke Nowɛmi sha hɛ: «Kwiɗi mə sha mbelia ŋayɛ, ŋwalea ɗa. Wa raberə nda lə yɛ yitea 'ya wa? Mba ŋwale kwa hwəa ɗa kezha tezhɛre kazhilia ŋayɛ na?

¹²Kwiɗi mə ŋwalea ɗa. Kwa nza nde nahe 'ya kehale kewəme za, ya 'ya geze tse mba zəzə va 'ya a 'ya kanza le za heviɗi nya kayake ŋwale tezhili ne,

¹³katenegheke hɛ yɛ kakele kaɗema wəme zhili na? Ewə ŋwalea ɗa we. Zhɛ ɗa ma ŋkɛ ke gheyɛ, kewəba ɗate ɗa Mahwətə.»

¹⁴Kwetere wəmbəa ŋkɛ, ntake hɛ kanehwene zhɛkwa. Pa Orpa həməwəve meghekɛa za nta kezha dzeghwa nda, ama hɛreɗɛ Rət ɗema slə yite.

¹⁵Ma ke Nowɛmi sha Rət: «Wa nya marətə ŋa kezhɛrete geva kalə sha mbelia nta ba'a sha shala ta nta. Zhɛrete geva təkwə təkwəte.»

¹⁶Ama ma ke Rət zhɛnete: «Ŋka ɗa ma na le berete kezha sli ɗa 'ya yitea gha ma. Tema tema dzete na, te dzete 'ya, tema tema nza na, te nza 'ya, mbelia ŋa ne, mbelia ɗa tenza hɛ, Shala ta ŋa ne, Shala ta ɗa tenza ŋkɛ.

¹⁷Te ŋkwa nya mte na, te temte 'ya, te tela ɗa mbeli. Pa Mahwətə vate ɗa te 'ya tsape keɗema mte nde tenehe ɗa le gha.»

¹⁸Nahe Nowɛmi keɗepete katelə Rət yite, pa ɗema geze nda ghena ta sli ɓiyitsa.

¹⁹Cape hɛ bake bake kadzeghwa hwa'a mbe Bɛtelɛhɛm. Ma kwa ntsehe hɛ mbe Bɛtelɛhɛm ne, pɛtɛ mbeli heheɓake va nza ta nci. Ma ke mi: «Nowɛmi male nya tse na?»

²⁰Ma ke sha hɛ: «Heka ɗa ma yɛ kaNowɛmi nya kamale ganyɛ ma, Mara nya kamale kwa ndiremi heka ɗa yɛ, kwa nza ŋkɛ nahe Shala nde berete kevate ndiremi kwele kwele te 'ya.

²¹Kawəndə tiɗiɗi slə 'ya teke, pala pala zhɛneke ɗa Mahwətə. Wa raberə heka ɗa yɛ kaNowɛmi nya kamale ganyɛ wa? Nahe Mahwətə kezhɛrave ɗa wəmbə, nahe Shala nde berete kemenete ɗa wəsə kwa ndiremi.»

²²Tsetse zhɛneke geva Nowɛmi hɛ le makwa ta nta, Rət wəzha ta ka Mowab, nya kese shave mbe Mowab. Hwa'a hɛ kwa Bɛtelɛhɛm yipə le və keleke ha.