Read KapsikiDC Rət 3 Bible Online

Rət 3 - KapsikiDC bible

Rət 3

¹Ma te kwete hɛ ne, ma ke Nowɛmi, meghekɛa za nta sha Rət: «Megela ma zelave ŋa za 'ya kezha kemave zhɛne mpi na kwa cɛa ŋa.

²Ma Bowoz nya se nya na kamene slene mbe wəvea ŋkɛ le ka kwaterashia ŋkɛ ne, ashɛ nde zeme ghɛa ɓəmə ŋkɛ wəka? Gheŋkɛ le ghəa ŋkɛ nde tehɛ yitea megia ŋkɛ ɓeshi heviɗi nya te lane.

³Kwiɗi pɛkɛ pɛ shɛ na menate 'wərdə te geva ta ŋa, seɗete lekwesa ganyɛa ŋa shɛ na lə kadzete lanea shɛ. Ncɛ nda ma ghəa ŋa na, nda tezehwe ɗafa ŋkɛ ba'a nda tesahwe wəsə kesa ŋkɛ ma.

⁴Neweve ŋkwa nya teɓelahe ŋkɛ te megela. Kwa sebe ta ŋkɛ hendeke nda geva, pəkəakɛ gwada nya kənə ɓɛhwɛ shɛ na ɓelahe ŋa yitea seɗa ta ŋkɛ. Gheŋkɛ le ghəa ŋkɛ nde geze ŋa wəsə nya temene na tsagha.»

⁵Ma ke Rət shɛ: «Pɛtɛ temene wəshi nyi gezete ɗa na 'ya.»

⁶Pəkwə nde kadzawa lane pɛtɛ menete wəshi nyi gezete nda meghekɛa za nta.

⁷Pa Bowoz zehwe wəsə kezeme ba'a sahwe wəsə kesa, fare fare wənəa ŋkɛ. Cape ŋkɛ kalə kaɓelahe vare megi nya ketsene tsene. Tiɗɛake tiɗɛake Rət lə, pa nde pakete gwada nya kənəa seɗa ta ŋkɛ ba'a ɓelahe nda yitea seɗa ta ŋkɛ.

⁸Ma te tepe ta viɗi ne, ŋkwəɗetsə ke wəndəa shɛ, pa feɗeghenyɛ, tewətelɛwe ke ne, tagha male meɓelahe yitea seɗa ta ŋkɛ.

⁹Ma ke shɛ: «Wa sləa ŋa wa?» Ma ke zhɛnete nda: «'Ya Rət, kwatera ta ŋa, veyi kwatera ta ŋa kwa ghwədərəa ŋa kwa nza ŋkɛ gha wəndə nya nza hweŋkwa kembeɗe ɗa ve.»

¹⁰Ma ke shɛ: «Pa Shala wəpikɛ ŋa wəzha ta ɗa. Za ma ncɛte nza ta ŋa dɛŋe dɛŋe te mbelia za ŋa na ke kwa ghate, kwa ɗema na kese kazəzə wəme mempɛhweta nya kande titikwə keɗema nya kande mcɛlə.

¹¹Ma tsetsenya gɛ wəzha ta ɗa, ghazlənəma na ma, pɛtɛ temene wəshi nyi tegeze ɗa na 'ya, kwa nza ŋkɛ nahe yayata wəndə nya mbe meleme nya keɗepe male ganyɛ na.

¹²Kaganda nza 'ya kande zeme ghɛ le za ŋa, ama le kwete wəndə shɛ nya kenza dekwe ma le ke 'ya.

¹³Hɛ ŋa teke. Ma masheke, keɗe ŋkɛ kanza kande zeme ghɛ nya kenewe ghweme te gha ne, pa ŋkɛ kamene, ama kedewə ghəa ŋkɛ te ne, kamene ŋa wəsə nya hi 'ya kamene ŋa le Mahwətə nya teghweme. Nza ŋa teke pa va masheke.»

¹⁴Mba nde meɓelahe yitea seɗa ta ŋkɛ pa va masheke, cape nde mba nda ŋkwa tewə mbeli kenaka kaɗepete. Kwa nza nde kaɗe Bowoz kaɗepe mbeli nahe malea shɛ kese kwa lane we.

¹⁵Ma ke shɛ: «Kelemte wəsə keve kənəa ghə nya kənəa ghəa ŋa shɛ na keseve megela.» Tsagha shɛ nde menete, ŋkwaŋe Bowoz dzeghave nda megi kwa 'yɛmbe, pa ŋkɛ ndeke nda, pa nde zhɛneghe geva kadzembe meleme.

¹⁶Pɛkwe Rət sha meghekɛa za nta, ma ke Nowɛmi shɛ: «Tsema menete ŋa geva ŋkɛ wa wəzha ta ɗa?» Pa nde gezete nda wəshi nyi menete nda wəndəa shɛ pɛtɛ.

¹⁷Ma ke shɛ: «Pa ntave ɗa megi ŋkwaŋe kwa 'yɛmbe, ma ke: kazhɛne geva na kalə sha meghekɛa za ŋa pala pala we.»

¹⁸Ma ke Nowɛmi shɛ: «Nza ŋa teke wəzha ta ɗa kezha neweve na nda tekiɗimte geva ghena nyi, kadzawa ghəa wəndəa shɛ keɗema ghena nya kekiɗi ɓeshi veci nya we.»