Read KapsikiDC 1 Saməyɛl 20 Bible Online

1 Saməyɛl 20 - KapsikiDC bible

1 Saməyɛl 20

¹Pa David hwɛnyɛ shave mbe Nayot nya terasle yitea Rama. Pa ŋkɛ lə kanakɛ Zhonatan, ma ke shɛ: «Wa yamenete 'ya wa? Wa fete ta ɗa, wa ghena nya bezemte nda 'ya ke yiteyɛ ŋa nda sepa ŋkɛ kapesle ɗa wa?»

²Ma ke Zhonatan shɛ: «Kenza ŋkɛ tsagha we! Katemte na we. Newema, yiteyɛ ɗa shɛ kamene wəsə kaɗema ŋkɛ kegezete ɗa we. Yitea wa wəfərəakɛ ghena nya yiteyɛ ɗa va 'ya wa? Kamenete geva ŋkɛ we!»

³Ma ke David zhɛkwa le fela: «Nahe na keɗepe kaganda geze ŋa 'ya. Nahe yiteyɛ ŋa keɗepe tiɗiɗi kamcɛ ŋa 'ya. Ma ke gezete: Ma kefate ghena nya Zhonatan ne, kateve nda geva zəzə. Ama kaganda laka Mahwətə nya teghweme ba'a laka nza ta ŋa teghweme ne, takwa takwa 'ya kamte!»

⁴Ma ke Zhonatan sha David: «Katemene ŋa wəsə nya ɗe na 'ya.»

⁵Ma ke David shɛ: «Hendɛ gəsəkəa dzemɛa ghweme ta tere, nahe ŋkɛ kehi kantishɛ 'ya le meghe kezha zeme wəsə kezeme. Ama kenza nde kapelave ɗa hweŋkwa na kaslə ne, katedzehwa gamba 'ya kawəfərə pa va tɛhwɛɗia kwa mahekene ta hɛ.

⁶Ma kedewə ghəa yiteyɛ ŋa te kwa nakɛma ɗa ŋkɛ ne, ma pa na sha geze nda: ‹Terezhɛŋe se David yitea 'ya ka'yɛwe hweŋkwa kezha dzawa Bɛtelɛhɛm, meleme ta ŋkɛ kwa nza mbeli kadzeghe melɛ nya mene mbeli keva keva kwa yita ta ŋkɛ.›

⁷Ma kegeze meghe: ‹Ganyɛke!›, ke ne, gwezlayɛ nza mehele ta nde mene slene ta ŋa. Ama kehwepete wənə ŋkɛ ne, ɗepete nahe ŋkɛ ketarete kezha pesle ɗa.

⁸Ncɛte ganyɛa ŋa laka 'ya, kwa nza nde nahe na kemenete mcɛ le 'ya kwa kema ta Mahwətə. Ma kenza nde kabeze ghena 'ya ne, jara ma peslekɛ ɗa na gha le ghəa ŋa kenya tekele ɗa na kadzawa kema ta yiteyɛ ŋa wa?»

⁹Ma ke Zhonatan shɛ: «Wəsə nya kehima kamene geva ŋkɛ! Ma kenza nde kaganda zəzəte yiteyɛ ɗa kapesle ŋa, kategeze ŋa 'ya, kazeme ŋa 'ya kafela.»

¹⁰Ma ke David sha Zhonatan: «Wa nde tegeze ɗa kezhɛnete ŋa yiteyɛ ŋa le berete wa?»

¹¹Ma ke Zhonatan sha David: «Nde, mbara ɓə kajive hwa gamba.» Ntəŋə hɛ kadzehwa gamba zlaɓe.

¹²Ma ke Zhonatan sha David zhɛkwa: «Te sləa Mahwətə, Shala ta ka Israyɛl ne, kageze ŋa 'ya kate'yɛwe nza ta zəzə ta yiteyɛ ɗa 'ya hendɛ keɗema vatahebezle tsetse veci. Ma kenza nde tiɗiɗi ghena ta ŋkɛ kaŋa ŋa ne, nahe, kwete ghena shɛ kageze ŋa 'ya we.

¹³Ama kenza nde wəsə kwa ndiremi yazəzə ŋkɛ kamene ŋa ne, pa Mahwətə ɗate ɗa kwele kwele keɗema 'ya kegeze ŋa! Tagha gɛ, kategeze ŋa 'ya kezha dzeghwa ŋa na, mba na keghazlənə. Pa Mahwətə nza le gha kala nya se ŋkɛ le yiteyɛ ɗa!

¹⁴Kwetere wəmbəa ŋkɛ, kenza nde mba 'ya teghweme ne, katemene ɗa ganyɛ na kala nya ɗe Mahwətə yitea ɗema 'ya kamte.

¹⁵Ɓiyitsa ne, mba na kekelemte ganyɛa mehele ta ŋa ki ghɛa ɗa, ya Mahwətə zamte sebe te ka jaga ta David kwete kwete te hɛɗi lema.»

¹⁶Pa yɛ Zhonatan tsahwe ghena le David ba'a mbelia ŋkɛ. Ma ke Zhonatan: «Pa Mahwətə wate ŋa va ka jaga ta ŋa!»

¹⁷Pa Zhonatan zemete nda fela zhɛkwa te mcɛa nci ke David, va nya nza nde nahe ŋkɛ keɗehwe kala ghəa ŋkɛ.

¹⁸Ma ke Zhonatan shɛ: «Hendɛ dzembe kwete mbeli tere, kateɗepete nza ta ŋa mbeli kaɗema na teke, va nya nza nde mba tenza ŋkwa kentishɛ ta ŋa kaɗema wəndə te.

¹⁹Ma vatahebezle, katedzawa na kahe kahe kadzete ŋkwa kewəfərə ta ŋa nya vecagha, katentishɛ na dekwede le pelɛa Ɛzɛl.

²⁰Ma 'ya le ŋa ɗa ne, katehe have 'ya mahekene laka pelɛa shɛ kala wəsə nya nza 'ya kaɗeke wəsə kehe.

²¹Tagha gɛ, kateghwene wəzege 'ya kalə kafə hɛ. Ma kegeze nda 'ya ke wəzegea shɛ: ‹Ashɛ have cakeɗake le gha we, fəte hɛ!›, a 'ya shɛ ne, wərə na kase, ghena shɛ tsagha we, nza gwezlayɛ ya va gha, ghena shɛ kaghazlənə na ve we, te sləa Mahwətə nya le mpi geze ŋa 'ya.

²²Ama kegeze nda 'ya ke wəzege shɛ: ‹Cakeɗake havea shɛhɛ le gha› 'ya shɛ, katedzeghwa ŋa na kwa nza nde nahe Mahwətə kemenete kezha slə ŋa na.

²³Ma kaŋa ghena nyi gezehwe mə te mcɛa nya kwelɛ gheɓə ne, katekemane ɓə Mahwətə kezha nza dɛŋe dɛŋe te hɛ kaghala ghala.»

²⁴Pa David wəfərənyɛ hwa gamba. Nahe kwete tere kese, ntishɛ meghe kezha zeme wəsə kezeme.

²⁵Pa meghe ntishɛnyɛ pelɛ pasla ta ŋkɛ kala nya ghalanza, te ŋkwa kenza vare dewe. Pelɛhetɛme Zhonatan sate te ŋkwa. Pa Abnɛr ntishɛnyɛ vare Sawəl. Mba ŋkwa kentishɛ ta David kaɗema wəndə te.

²⁶Ghena shɛ kegezete Sawəl vəa ŋkwa shɛ we. Kwa nza ŋkɛ ma ke mbe ghəa ŋkɛ: «Nahe kwete wəsə kemenete nda geva vəkə va nya ɗema ŋkɛ wɛŋe.»

²⁷Ma te hendɛ ta ŋkwa mbe tere kwatenca, te kwa bake ta hɛ, mba ŋkwa kentishɛa David kaɗema wəndə te. Ma ke Sawəl sha wəzege ta ŋkɛ Zhonatan: «Va wa ɗema wəzege ta Zhɛsɛ kese yitea wəsə kezeme se va mbeɗa pa ɓeshi wa?»

²⁸Ma ke Zhonatan shɛ: «Terezhɛŋe se David ka'yɛwe kezha dzawa Bɛtelɛhɛm va 'ya.

²⁹Ma ke sha 'ya: ‹Pelave ɗa hweŋkwa kadzeghwa təhwə təhwə ŋa 'ya, kwa nza nde melɛ ya shɛ kadzeghe ghen'yɛ kwa yita ta ɗa mbe meleme ta n'yɛ, nahe wəza meyɛ ɗa kegezete ɗa le ghəa ŋkɛ. Ma kenza nde kazhɛakɛ heli na yitea 'ya, ndeke ɗa hweŋkwa kalə kanewe ka kesaka yiteyɛ ɗa.› Vatse sema ŋkɛ kadzete ŋkwa kezeme wəsə le meghe.»

³⁰Pa Sawəl hwepete wənə va Zhonatan, ma ke shɛ: «Kelɛa wəzege! Nahe 'ya keɗepe kamcɛ kelete wəzege ta Zhɛsɛ na. Hawe nya te gha ba'a meyɛ ŋa ŋkɛ!

³¹Ma kwa nza nde mba wəzege ta Zhɛsɛ teghweme te hɛɗi, kafate zeɗe na mbe nza ta ŋa ba'a meghea ŋa we. Ma tsetsenya ne, gezete kezha keseve ŋkɛ mbeli ba'a kezha keleke ŋkɛ mbeli teke, kwa nza ŋkɛ wərə mte ŋkɛ.»

³²Ma ke Zhonatan zhɛnete nda ke yitenyɛ: «Yitea wa tepesle ŋkɛ mbeli wa? Wa wəsə kwa ndiremi nya menete ŋkɛ wa?»

³³Pa Sawəl bezate megha tiɗiɗi le Zhonatan kezha mpahwe ŋkɛ. Nahe Zhonatan keɗepe tagha kawəsə nya tarete yitenyɛ ŋkɛ fate fate kezha pesle David.

³⁴Pelɛhetɛme Zhonatan sate te ŋkwa le wənə tehwepe, kese ŋkɛ kazeme wəsə tɛape te kwa bake ta hɛa tere nya mɛa ghweme we. Kwele kwele se ŋkɛ kazəzə David kwa ŋelekɛ ŋkɛ yitenyɛ kwele kwele.

³⁵Ma te hendɛ ta ŋkwa masheke masheke, pɛkwe Zhonatan shave mbe gamba kezha begeme le David te ŋkwa nya gezehwe hɛ. Zlaɓe hɛ le kwete wəzege.

³⁶Ma ke sha wəzege ta ŋkɛ nyagha: «Kwiɗi le hwɛ, sepate ɗa have nyi tehe 'ya ga!» Ntəŋə wəzege nyagha le hwɛ, ntake Zhonatan kahe have zlake ma zlake ma ke gheŋkɛ.

³⁷Pa wəzege nyagha ntsehe te ŋkwa nya heyi have Zhonatan, ma ke Zhonatan zlapete nda ghena: «Kenza have cakeɗa ma ke gha tse yi?

³⁸Yana, ntsə geva, mba na keghereŋe!» Pa wəzege nya yitea Zhonatan nyagha kelete have ba'a zhɛneke geva kase sha wəndə nya kesleke ŋkɛ.

³⁹Kwete wəsə shɛ keɗepe wəzege nyagha we, ama nahe yɛ Zhonatan le David keɗepe wəsəa nci.

⁴⁰Pa Zhonatan ndeke nda wəshi kempa ta ŋkɛ nyighɛ ke wəzege ta ŋkɛ nyagha, ma ke shɛ: «Kwiɗi fəghe hɛ kadzembe meleme!»

⁴¹Pa nde mene slene ta ŋkɛ nyagha dzeghwanyɛ. Pelɛhetɛme David sate te ŋkwa nya wəfərənyɛ ŋkɛ laka bela kwa zeme ta pelɛa shɛ. Pa ŋkɛ ŋame ghə mbe hɛɗi mahekene zhigə. Pa hɛ həməwəve ghəa nci, ntake hɛ kanehwene kwele kwele.

⁴²Ma ke Zhonatan sha David: «Kwiɗi le mehele, kwa nza nde nahe yayata wəndəa ɓə kezemete fela te sləa Mahwətə. Pa Mahwətə nza kwelɛ gheɓə le gha, kwelɛ ŋwalea ŋa le ŋwalea ɗa kaghala ghala.»