Read KapsikiDC 1 Saməyɛl 24 Bible Online

1 Saməyɛl 24 - KapsikiDC bible

1 Saməyɛl 24

¹Pa David slənyɛ se te ŋkwa nyagha kadzeme laka Ɛn-Gɛdi nya nzanyɛ ŋkɛ pelɛ.

²Ma kwa zhɛreke geva Sawəl sheke kwamte mpa le ka Filisti ne, pa ŋkɛ fate te ɓerama ta Ɛn-Gɛdi David.

³Pa Sawəl tsehave mbeli hwa ka sewajɛa ka Israyɛl 3.000, cape hɛ kalə kasepa David le mbelia ŋkɛ laka kwete ŋkwa nya heka mbeli kaGela ta Zhɛfa nyi hwa gamba.

⁴Ma kwa dzeyi Sawəl terasle yitea yɛ gəzhia timɛti nyi dzeyi mɛ hweŋkwa ne, pa ŋkɛ nakɛ gezlɛŋə. Shilimə Sawəl mbe kezha dzeghe geva ta ŋkɛ. Ma yɛ David le mbelia ŋkɛ, tewəfərə hɛ li zeweve ta gezlɛŋəa shɛ.

⁵Ma ke mbelia ŋkɛ sha David kwa sleme kwa sleme: «Wa nya və nya gezete Mahwətə nya kwa nza ŋkɛ ma ke sha gha: Ma te kwete hɛ ne, kateve nde jaga ta ŋa 'ya mbe dzeve ta ŋa kezha mene nda wəsə nya ɗe na na.» Tagha gɛ, pa David hendeghe geva ba'a slave lekwesa ta Sawəl kaɗema ŋkɛ keɗepe.

⁶Ama kwa slave ŋkɛ ne, ntake helia ŋkɛ kasla kwele kwele.

⁷Ma ke sha mbelia ŋkɛ: «Yate ɗa Mahwətə va zamte mpia nde sleke ɗa kala nya geze yɛ! Kwa nza nde ne, Mahwətə nde veyi ŋkɛ kameghe.»

⁸Te ghena nyi ne, pa David ghereŋete mbelia ŋkɛ kedzeghəa Sawəl. Pelɛhetɛme Sawəl, pa ŋkɛ shavenyɛ mbe gezlɛŋə, cape ŋkɛ yitea dzeghwa ta ŋkɛ.

⁹Kwetere wəmbəa ŋkɛ, pa David shavenyɛ te ŋwela, ma ke zlapete Sawəl: «Meghe, Meghe!» Pa Sawəl zhɛrete geva kanewe ŋkwa. Pa David ŋame ghə mbe hɛɗi kahawe ve.

¹⁰Ma ke sha Sawəl: «Yitea wa kele ghena ta mbeli nyi kegeze wəsə kwa ndiremi yasepa 'ya kadzete gha ke hɛ wa?

¹¹Nahe na kenakɛ le ntsə ta ŋa ɓeshi nya, nahe Mahwətə keveyi ŋa mbe dzeve ta ɗa mbe gezlɛŋə nya, nahe mbeli kegezete ɗa kezha pesle ŋa, ama nahe 'ya kezhɛakɛ heli yitea gha ba'a nahe 'ya kegezete kaɗema 'ya kakafe dzeve yitea gha, kwa nza ŋkɛ nahe Mahwətə keveyi ŋa kaMɛsi.

¹²Newe gi yiteyɛ ɗa, newe wəsə nya yitea dzeve va 'ya: mɛa lekwesa ta ŋa! Ma kwa nza nde nahe 'ya keslave mɛa lekwesa ta ŋa kaɗema kepeslekɛ ŋa ne, fate kaɗema zəzə kwa ndiremi ba'a ɗema ghena ta ŋa mbe wənəa va 'ya. Nahe na kenakɛ kaɗema beze ghena va 'ya laka gha. Gha nde sepa ɗa kezha pesle ɗa.

¹³Pa Mahwətə negha fete kwelɛ 'ya le gha! Pa ŋkɛ wate wəsə nya menete ɗa na, ama 'ya le ghəa ɗa ne, wəsə shɛ kamene ŋa 'ya we.

¹⁴Ma ke kwete ghena ŋela nya vəashi: ‹Deke va ka 'yaghwa mehele se 'yaghwa ta mehele›, ama 'ya le ghəa ɗa ne, kakafe dzeve 'ya yitea gha we.

¹⁵Wa wəndə nya se meghea ka Israyɛl kazlape mpa yite wa? Wa yase na kakeka wa? Ma 'ya ne, kala kelɛ kwa kemte mte, kala mevale nya gəmə 'ya!

¹⁶Mahwətə nde temeha ghwə ta ɗa le gha. Pa ŋkɛ neweve nza ta ɗa, neghate fete yitea 'ya ba'a mbelemte ɗa shave mbe dzeve ta ŋa!»

¹⁷Ma kwa nahemte geze ghena nyi David ne, ma ke Sawəl shɛ: «Wəzege ta ɗa David, gha nde geze ɗa ghena nya kaganda na?» Ntake Sawəl kanehwene kwele kwele.

¹⁸Ma ke sha David zhɛkwa: «Tiɗiɗi ma na ke 'ya, va nya nza nde nahe na kemenete ɗa ganyɛ, ndagwara wəsə kwa ndiremi yamenete ŋa 'ya.

¹⁹Nahe na kencɛte ɗa ganyɛa ŋa kaŋa ɗa ɓeshi: nahe Mahwətə keveyi ɗa mbe dzeve ta ŋa, ama kese na kapesle ɗa we.

²⁰Ma kebegeme wəndə le nde ghema ta ŋkɛ, kapelakɛ ŋkɛ ŋkɛ kaslə kwelɛŋe na? Pa Mahwətə ŋkikɛ ŋa wəsə ganyɛ nya menete ɗa nya na ɓeshi.

²¹Tsetsenya ne, nahe 'ya keɗepe: kameghe tenza na ba'a mbe dzeve ta ŋa tenza meghea Israyɛl.

²²Ma tsetsenya gɛ ne, zemete ɗa fela le Mahwətə kaɗema na kateza sebe te hwelefe ta ɗa kemte 'ya ba'a kaɗema na kateza sləa ɗa ki ghɛa yiteyɛ ɗa.»

²³Pa David zemete nda fela ke Sawəl. Kwetere wəmbəa ŋkɛ, cape Sawəl slənyɛ sha ghɛa ŋkɛ, pa yɛ David zhɛneghe geva le mbelia ŋkɛ kadzeme ŋkwa kewəfərə ta nci pelɛ ghweme.