Read KapsikiDC 1 Saməyɛl 27 Bible Online

1 Saməyɛl 27 - KapsikiDC bible

1 Saməyɛl 27

¹Ma ke David zəzəve mbe ghəa ŋkɛ: «Ya kwela nza ŋkɛ tsetse ne, katepesle ɗa Sawəl te kwete hɛ. Kwete shɛ zəzə ganyɛ nya nza 'ya kamenete we, jara ma wəfərə ɗa 'ya te hɛɗia ka Filisti. Ma tsagha, katesərə sepa ɗa Sawəl mbe hɛɗia pɛtɛa ka Israyɛl, tsagha nza 'ya kambele ɗa ve.»

²Tagha gɛ, cape David kwa hweŋkwa le mbeli gwəmsə ŋkwaŋe, pɛkwe hɛ kwa ghɛa Akish, wəzege ta Mawok, meghea ka Gat.

³Pa David nzanyɛ le Akish mbe Gat, gheŋkɛ le mbelia ŋkɛ, yayata wəndə le mbelia ŋkɛ. Mia ŋkɛ bake ya va David: Ahinowam, wəzha ta ka Zhizrɛyɛl ba'a Abigayil, male wedea Nabal, nde Karmɛl.

⁴Pa mbeli gezete nda ke Sawəl nahe David kehwɛnyɛ kadzawa Gat, pa Sawəl sərəakɛ lə kasepa ŋkɛ.

⁵Ma ke David sha Akish mbe kwete hɛ: «Ma kenza nde kandeke ɗa mehele na ne, ndeke ɗa ghɛ hwa ghɛ nyi hwa gamba nyi kanza 'ya mbe. Yitea wa nza nde mene ŋa slene te ŋkwa nya kwetɛŋe le gha mbe hwəa meleme ta meghe wa?»

⁶Te vecia shɛnyɛ, pa Akish ndeke nda Siklag. Vatse nda nza Siklag kaŋa ka meghea kɛfi nyi mbe Zhəwda pa ɓeshi.

⁷Va zake le tere wəfaɗe menete David mbe gamba ta ka Filisti.

⁸Pa David slə se tagha le mbelia ŋkɛ kadzeme kampa le ka Gɛshəwr, ka Girze ba'a ka Amalɛk, kwa nza nde ghenci ka se te hɛɗi nyagha ghalanza, se mbe Shəwr vaŋe te hɛɗia Ɛzhipte.

⁹Mpə yampə mbelia shɛhɛ David, katene za keɗema male ŋkɛ we. Kafə wəshi keseɗa: sla, timɛti, kwara lɛmə, zlegweməa lɛmə ba'a yɛ lekwesa ŋkɛ. Ma kwa zhɛneke geva ŋkɛ ne, kalə ŋkɛ sha Akish.

¹⁰Ma vəa ŋkwa nya 'yɛwete Akish: «Le kayɛ wa se yɛ kampa ɓeshi wa?», ke ne, ma ke David sha zhɛne: «Le bela kwa zeme ta hɛɗia Zhəwda», keɗema «Le bela kwa zeme ta hɛɗia ka Yeramɛyɛl», keɗema «Le bela kwa zeme ta hɛɗia ka Kɛn.»

¹¹Kese David kasərə za keɗema male le mpi mbe Gat yagha hɛ kapamte ŋkɛ laka geze ghena kwa ndiremi we, ma ke hɛ sha tegeze: «Wa nya tsetse menete David!» Tsagha se David kamene mbe və nya nza ŋkɛ te hɛɗia ka Filisti.

¹²Vatse ndeke nda mehele Akish ke David. Ma ke sha zəzə: «Kewəba menete nda wəsə kwa ndiremi David ke Israyɛl, hwelefe ta ŋkɛ. Kande mene slene ta ɗa tenza ŋkɛ kaghala ghala.»