Read KapsikiDC 1 Saməyɛl 29 Bible Online

1 Saməyɛl 29 - KapsikiDC bible

1 Saməyɛl 29

¹Nahe ka Filisti ketsenete ka sewajɛa nci pɛtɛ mbe Afɛk. Te nyagha və ne, dekwede nzanji ka Israyɛl yitea ɗasle nya mbe Zhizrɛyɛl.

²Dzeghwa yadzeghwa mbeli nyi te ghəa ka Filisti mbe kema ta wəvəsəa ka sewajɛ gwəmsə ba'a wəvəsəa ka sewajɛ slibə. Zlaɓe le meghe Akish yɛ David le mbelia ŋkɛ yitea ŋa nci dzeghwa.

³Ma ke mbelia jama ta ka sewajɛa ka Filisti: «Kayɛ wa ka Ɛbrə nyi wa?» Ma ke Akish sha hɛ: «Gheyɛ ɗepetema David nya kese kande mene slene ta Sawəl, meghea ka Israyɛl, ama nya kenza le 'ya gare va zake keɗema va bake na? Se te və nya zlekɛ wəndə nya kesleke ŋkɛ ŋkɛ kezha jikə geva le 'ya ne, ghena nyi wale wale shɛ kenaka 'ya kanakɛ ve pa ɓeshi we.»

⁴Pa mbelia nyi te ghəa ka Filisti hwepete wənə va Akish, ma ke hɛ shɛ: «Ŋkamte wəndə nya, zhɛneghe geva ŋkɛ kadzembe ŋkwa nya ndeke nda hweŋkwa na kanza mbe. Mba ŋkɛ kedzemte mpa hwa gheɓəmə, yagha ŋkɛ kazhɛrete geva kande ghema ta ɓə hwa mpa. Kwa nza ŋkɛ, tsema nza ŋkɛ kakemave zhɛ helia wəndə nya keghate kasleke ŋkɛ kaɗema laka kese nda mbelia ɓəmə wa?

⁵Mba na kezaghəyite, gheŋkɛ ya kaDavid nya se mi kageze ghena te kwa cimə le wetse, ma ke hɛ: ‹Nahe Sawəl kempəmte ka jaga slibə, ama slibə meŋe ŋa David.›»

⁶Tagha gɛ, pa Akish hekakɛ David, ma ke shɛ: «Laka Mahwətə nya teghweme, nahe na kenza kawəndə nya tiɗiɗi. Kazhɛ ɗa mawe yitea newe ŋa kadzemte mpa ba'a kasheke kwamte mpa le 'ya hwa ka sewajɛ, va nya nakɛma wəsə kwa ndiremi 'ya mbe gha se te və nya se na sha 'ya pa ɓeshi. Ama kamawe ŋa mbeli nyi te ghəa ka Filisti we.

⁷Zhɛneghe geva sha ghɛ, kwiɗi le kwelɛŋe kezha ɗema hɛ kanza le mehele ketaze taze.»

⁸Ma ke David sha Akish: «Wa wəsə nya menete 'ya tsagha wa? Na, wa wəsə nya nakɛ na wale wale te mava ta ŋa se te və nya ghate 'ya kamene ŋa slene pa ɓeshi nda ɗema 'ya gare dzemte kampa le ka jaga ta ŋa wa?»

⁹Ma ke Akish: «Wəsə shɛ we, nahe 'ya keɗepe. Kala nde ghwene ta Shala nza na zeɗehwe ɗa. Ma ke mbeli nyi te ghəa ka Filisti gezete: ‹Mba ŋkɛ kedzemte mpa le ghen'yɛ!›

¹⁰Ma tsetse ŋkɛ ne, katefeɗeghe na hendɛ masheke masheke le mbeli kebeghakɛ ŋa. Katesate yɛ mba ŋkwa te kezha lə kadzete ŋkwa nya ndeke ŋayɛ hweŋkwa 'ya kanza te.»

¹¹Te hendɛ ta ŋkwa masheke, cape yɛ David le mbelia ŋkɛ sate te ŋkwa kezha zhɛne geva kadzete hɛɗia ka Filisti nya se hɛ. Ma ka Filisti le ŋa nci, cape hɛ kadzeme Zhizrɛyɛl.