Read KapsikiDC 1 Saməyɛl 30 Bible Online

1 Saməyɛl 30 - KapsikiDC bible

1 Saməyɛl 30

¹Te kwa mahekene ta hɛ, pa yɛ David le mbelia ŋkɛ ntsehe mbe Siklag. Nahe ka Amalɛk keghate mpa laka bela kwa zeme ta Zhəwda ba'a mbe Siklag. Nahe hɛ kempəmte ba'a kendəmte meleme.

²Nahe hɛ kekesehwe mi ba'a kweci mbeli, ŋwale ba'a mbelia jama, ama kese hɛ kapesle kwete wəndəa nci we. Nahe hɛ kefəhwe hɛ ba'a keslənji.

³Ma kwa ntsehe yɛ David le mbelia ŋkɛ mbe meleme ne, pa hɛ nakɛ ŋkɛ kendə ndə ba'a nahe mbeli kekesehwe mia nci, ŋwale tezhilia nci ba'a ŋwalea kwɛa nci.

⁴Ntake yɛ David le ka sewajɛa nci katsa lewela ba'a kanehwene kwele kwele.

⁵Nahe mbeli kekelehwe mia David nyi bake nyighɛ, yɛ Ahinowam, wəzha ta ka Zhizrɛyɛl le Abigayil, male wedea Nabal, nde Karmɛl.

⁶Newe David ne, mbe ndiremi nya wəba ŋkɛ kwa geze ka sewajɛa ŋkɛ kapesle ŋkɛ le pelɛ, va nya nza yayata wəndəa nci le wənə kebeze beze va zəzə ta ŋwale tezhili ba'a ŋwalea kwɛ ŋkɛ. Ama laka Shala Mahwətə ta ŋkɛ ne, pa David kemave berete.

⁷Ma ke David sha nde dzeghe Shala Abiyatar, wəzege ta Ahimɛlɛk: «Fəke ɗa mə wəshi ke'yɛwe ghena va Shala.» Pa Abiyatar fəke nda hɛ.

⁸Ma ke David 'yɛwete ghena va Mahwətə: «Ma keslə 'ya kwa sebe ta wəvəsəa ka ghərəa kɛfi nyi ne, katekekave hɛ 'ya tse na?» Ma ke Mahwətə shɛ: «Kwiɗi kwetere wəmbəa nci, katekekave hɛ na ba'a katembele mbeli nyi keseve hɛ na.»

⁹Cape yɛ David le mbelia ŋkɛ nyi gwəmsə ŋkwaŋe. Ma kwa ntsehe hɛ kwa hələa Bɛsor ne,

¹⁰nahe kweci mbeli gwəmsə bake keghereŋenji tagha kwa shaŋe hɛ kadzeghwa va leɓe. Cape yɛ David mbe kema le kweci nyi gwəmsə wəfaɗe.

¹¹Pa ka sewajɛ nakɛ kwete megela ta ka Ɛzhipte hwa gamba, pa hɛ begheghe ŋkɛ nda ke David. Pa mbeli ŋave nda ɗafa ba'a same nda yɛmə.

¹²Ɓiyitsa ne, pa mbeli ŋave nda gatewea ya ta dasekwa ba'a dzeve ta ya ta rɛzɛŋe bake keghwele ghwele. Ma kwa zehwe hɛ ŋkɛ ne, pa ŋkɛ kemave berete kwele kwele, va nya nza nde kezehwe wəsə kezeme ŋkɛ ba'a kasakɛ yɛmə mbe veci mahekene ba'a viɗi mahekene we.

¹³Ma ke David shɛ: «Ŋa wa na wəndə ba'a nde wa na wa?» Ma ke shɛ: «Nde Ɛzhipte nya kamava ta kwete nde Amalɛk 'ya. Hɛ mahekene ghala nya sərəakɛ ɗa wəndə nya kesleke ɗa kwa keseve ɗa zereghwe.

¹⁴Ma kaghate ne, nahe ghen'yɛ kedzembe mpa le ka Krɛte nyi laka bela kwa zeme, ka Zhəwda ba'a ka Kalɛb, pa ghen'yɛ ndəmte meleme ta Siklag.»

¹⁵Ma ke David 'yɛwete ve: «Kaɗe na kabeghe ɗa kadzete ŋkwa nya nza ka ghərəa kɛfia shɛhɛ na?» Ma ke wəndə nyagha shɛ: «Zemete ɗa fela te sləa Shala kaɗema na kapesle ɗa, kaɗema na kakele nda ɗa ke wəndə nya kesleke ɗa, nda nza 'ya kabeghakɛ ŋa hwa'a sha hɛ.»

¹⁶Pa wəndəa shɛ begheghe David. Nahe ka Amalɛk keneheyi geva yipə mbe hɛɗi kazeme wəshi kezeme, kasa wəshi ba'a kamene gəsəkə le wəshi nyi fəke hɛ se te hɛɗia ka Filisti ba'a hɛɗia Zhəwda.

¹⁷Pa David ɗate hɛ se te masheke ta ŋkwa hwa'a te tɛhwɛɗi ta ŋkwa nya te hendɛ ta ŋkwa. Wəndə shɛ kembele keɗema kweci megelɛgeshi gwəmsə wəfaɗe nyi kembelenji te wəmbəa zlegweməa lɛmə we.

¹⁸Nahe David kembelemte ka mavashi nyi keseve ka Amalɛk, tsagha mia ŋkɛ nyi bake.

¹⁹Wəndə shɛ hwa mbelia jama keɗema hwa ŋwale, ya ŋwalea kwɛ keɗema ŋwale tezhili keza we, wəsə shɛ hwa wəshi nyi fəte hɛ keza we. Pɛtɛ zhɛneke wəshi nyi fəhwe ka ghema David.

²⁰Pa ŋkɛ ŋkahwe wəvəsə timɛti ba'a sla ta ka Amalɛk, ma mbeli nyi keŋka wəshi nyighɛ ne, ma ke hɛ sha geze: «Ghenci ya kawəshi nyi fəhwe David!»

²¹Pa David zhɛreghe geva kalə sha mbeli nyi gwəmsə bake nyi kese kabeghe nda ntishɛnji hɛ kwa hələa Bɛsor va leɓe. Pɛkwe hɛ mbe kema ta yɛ David le mbeli nyi kebeghakɛ ŋkɛ. Pa yɛ David hendave nda geva ke hɛ ba'a njiŋwakɛ hɛ.

²²Ma tagha gɛ, ma ke mbeli nyi ndiremi ndiremia mehele ba'a ka dewə mehele nyi hwa mbeli nyi kese le David gezete: «Ma kwa sema hɛ hwa gheɓəmə ne, wəsə shɛ kaɗa nda mbeli ke hɛ mbe wəshi nyi fəke mbeli we. Deke male ta ŋkɛ ba'a ŋwalea ŋkɛ yave nda mbeli ke yayata wəndəa nci. Hekakɛ hɛ hɛ nda slənji hɛ.»

²³Ama, ma ke David sha hɛ: «Ka mcɛhɛ ɗa, mba yɛ kemene tsetse le wəsə nya ndeke ɓəmə Mahwətə. Nahe ŋkɛ keyate ɓəmə, nahe ŋkɛ kekesame ɓəmə ka ghərəa kɛfi nyi kese kamene mpa le ka Siklag mbe dzeve ta ɓəmə.

²⁴Wəndə shɛ kayɛte ghena nya ɗe nya yɛ we. Kwa nza nde: ‹Yayata wəndə kaŋ'we ŋa ŋkɛ bela ta wəsə, yipə yipə ve nda mbeli ke wəndə nya kese kwamte mpa le wəndə nya keya ghedəkwə: katenehe hɛ hɛ kwelɛ ghəa nci.›»

²⁵Te vecia shɛ zhɛrete ghena nyagha David kawəsə mahalegə kaŋa pɛtɛa ka Israyɛl, mba mbeli kamene slene le ghena shɛ pa va ɓeshi.

²⁶Ma kwa ntsehe hɛ mbe Siklag, pa David ghweneghe nda kwete bela ta wəshi nyi fəke hɛ ke mbelia jama nyi mbe Zhəwda nyi kese kaka mcɛhɛnyɛ, ma ke sha hɛ: «Wa nya ŋa ŋayɛ nya wəsə nya keshave hwa wəshi nyi fəke mbeli va ka jaga ta Mahwətə.»

²⁷Pa ŋkɛ ghweneghe nda ke mbelia jama nyi mbe Bɛtɛl, nyi mbe Ramot nya mbe Nɛgɛv, nyi mbe Yatir,

²⁸tsagha ke nyi mbe Arowɛr, nyi mbe Sifmot, nyi mbe Ɛshtemowa,

²⁹nyi mbe Rakal, nyi mbe yɛ meleme ta ka Yeramɛl ba'a ŋa ka Kɛn,

³⁰nyi mbe Horma, nyi mbe Bor-Ashan, nyi mbe Atak,

³¹nyi mbe Hɛbron ba'a nyi mbe meleme nyi se hɛ kadzeghwa le mbelia ŋkɛ.