Read KapsikiDC 1 Saməyɛl 8 Bible Online

1 Saməyɛl 8 - KapsikiDC bible

1 Saməyɛl 8

¹Ma kwa halenyɛ Saməyɛl, pa ŋkɛ veyi ŋwalea ŋkɛ te ghəa ka Israyɛl.

²Zhowɛl sləa tezhɛa ŋkɛ, Abiya sləa səakəa ŋkɛ, kaka meha ghwə se hɛ mbe Bɛrshɛba.

³Kese ŋwalea Saməyɛl kadzeghwa tiɗiɗi kala yiteyɛa nci we, sepa dala nde kelehwe ŋkwa va hɛ ba'a ɗehwe wəshi nyi ve nda mbeli ke hɛ gəmə, ghwə mbəɗəkwə yameha hɛ.

⁴Vatse tsenete geva mbelia jama ta pɛtɛa ka Israyɛl ba'a lə hɛ kasepate Saməyɛl mbe Rama.

⁵Ma ke hɛ shɛ: «Kehale hale na tsetsenya, kadzeghwa ŋwalea ŋa kwa hweŋkwa ta ŋa we. Tsetsenyanyɛ, ndeke n'yɛ meghe yitea nza ŋkɛ te ghəa n'yɛ kala pɛtɛa kweci hɛɗi!»

⁶Dewə ghəa Saməyɛl te kwa geze hɛ: «Ndeke n'yɛ meghe kezha newe ghweme te ghen'yɛ», ke hɛ. Ntake ŋkɛ kasəkwə Mahwətə.

⁷Ma ke Mahwətə sha Saməyɛl: «Yɛte nda ghena ta mbeli nyighɛ kala nya geze ŋa hɛ. Kwa nza nde gha yaɗema hɛ we, ama 'ya. Kaɗe hɛ kasleke hɛ 'ya kameghea nci zhɛkwa we.

⁸Kala nya se hɛ kamene te və nya fəakave hɛ 'ya shave mbe Ɛzhipte, tsagha mene hɛ pa ɓeshi, kwa sərəakɛ ɗa hɛ kezha hawe va kweci shala, tsagha shɛ ɗe hɛ kamene le gha.

⁹Tsetsenya ne, fate nda ghena ta nci ke hɛ. Ama geze nda ghena dazhɛ dazhɛ ke hɛ ba'a gezete nda wəshi nyi nza hweŋkwa va meghe nya ketesleke hɛ kamene te hɛ.»

¹⁰Pa Saməyɛl gezave nda ghena ta Mahwətə ke mbeli nyi ke'yɛwe meghe ve.

¹¹Ma ke sha hɛ: «Ma meghe nya ketesleke ŋayɛ ne, wa nyi wəshi nyi temene ŋayɛ ŋkɛ nyi: katefə ŋwalea ŋayɛ ŋkɛ kaka sewajɛ kezha zleɗe wəmata gədəwəa ŋkɛ, kezha dzeme yɛ gədəwəa ŋkɛ, katehwɛ hɛ te kema ta wəmata ta ŋkɛ.

¹²Katekele hɛ ŋkɛ kezha nza te ghəa mbeli slibə ŋa kweci, mcɛfemsə ŋa kweci. Katewəza nda wəza ba'a katemene nda wəshi kweci seyi te wəve, kategezla nda wəshi kempa ba'a gwezla nyi te wəmata gədəwəa ŋkɛ kweci.

¹³Katefə ŋwalea kwɛa ŋayɛ ŋkɛ kaka mene 'wərdə, kaka ta wəshi kezeme ba'a kaka ta ɗafa.

¹⁴Katefə wəvea ŋayɛ ba'a yɛ wəvea rɛzɛŋea ŋayɛ ŋkɛ, tsagha bekelea ŋayɛ nyi ganji ganji. Katekele hɛ ŋkɛ yitea ve nda hɛ ke ka mene nda slene.

¹⁵Katekele kwa meŋe ta bela ta wəshi nyi wəzakɛ yɛ mbe wəvea ŋayɛ ŋkɛ, tsagha wəvea rɛzɛŋea ŋayɛ ŋkɛ kezha ve nda ke mbelia jama nyi yite ba'a ke mbeli nyi kemene nda slene.

¹⁶Katefə ka mene slene ta ŋayɛ ba'a ka kwaterashia ŋayɛ ŋkɛ, tsagha megelɛgeshia ŋayɛ ba'a kwara lɛməa ŋayɛ, katefə hɛ ŋkɛ kezha mene slene ta ŋkɛ.

¹⁷Katekele nde meŋe ta wəshi keseɗa ta ŋayɛ ŋkɛ, gheyɛ ɓiyitsa perə, katenza yɛ kaka mavashia ŋkɛ.

¹⁸Te və nyagha ne, katenehwene yɛ va meghea ŋayɛ nya ntave yɛ, ama vəa ŋkwa shɛ ne, katezhɛne ŋayɛ Mahwətə we!»

¹⁹Hɛreɗɛ ka Israyɛl ɗema yɛ ghena ta Saməyɛl. Ma ke hɛ: «A shinda, meghe yaɗe ghen'yɛ shanda

²⁰kezha nza kala kweci hwelefefi. Kaɗe meghe nya ketemeha n'yɛ ghwə ghen'yɛ, nya ketedzeghwa te kema va ka sewajɛa n'yɛ ba'a nya ketempa zlaɓe le ghen'yɛ.»

²¹Pa Saməyɛl fahwe ghena ta ka Israyɛl pɛtɛ ba'a gezete nda hɛ ke Mahwətə.

²²Ma ke Mahwətə shɛ: «Yɛte nda wəsə nya 'yɛwe hɛ va gha ke hɛ: ntave nda meghe ke hɛ.» Kwetere wəmbəa ŋkɛ, pa Saməyɛl gezete nda ke ka Israyɛl kezha slə yayata wəndə kalə sha ghɛa ŋkɛ.