Read KapsikiDC 1 Saməyɛl 9 Bible Online

1 Saməyɛl 9 - KapsikiDC bible

1 Saməyɛl 9

¹Kwete wəndə ya shɛ kande Bɛnjamɛn nya nza sləa ŋkɛ kaKish, nya kawəzege ta Abiyɛl, wəzege ta Seror, wəzege ta Bekorat, wəzege ta Afiya, wəzege ta kwete nde Bɛnjamɛn. Kawəndə nya berete ba'a nya nza zləvə te se ŋkɛ.

²Wəzege ya va Kish nya heka mbeli kaSawəl, kawəzege nya ndeɗe: wəndə nya ndeɗe shɛ hwa ka Israyɛl za ma ke gheŋkɛ we, za ma ŋkɛ ke pɛtɛa ka Israyɛl le bezle ba'a biya.

³Ma te kwete hɛ, pa kwara ŋemia Kish zanji. Ma ke Kish gezete nda ke wəzege ta ŋkɛ Sawəl: «Heka kwete hwa ka mene slene, sate, kwiɗi kalə kaghweze ŋemia kwara lɛməa shɛhɛ.»

⁴Ntəŋə hɛ dzeme hwa ghweme ta Ɛfrayim, pa hɛ jivenji mbe hɛɗia Shalisha, ama kenakɛ hɛ hɛ we. Pa hɛ jivenji mbe hɛɗia Sha'alim, ama ŋemia kwara lɛməa shɛhɛ te hɛɗia shɛ we. Ndɛkwe hɛ ndɛkwemte hɛɗia Bɛnjamɛn, ama kentsate hɛ hɛ we.

⁵Ma kwa pɛkwe hɛ mbe meleme ta Səwf ne, ma ke Sawəl sha nde mene nda slene: «Zhɛrete ɓə geva kalə sha ghɛ yagha yiteyɛ ɗa kazaghəyite kwara kazəzə ɓə.»

⁶Ma ke wəndə nyagha zhɛnete nda: «Nahe 'ya keɗepe nde mɛ ŋkwa ya shɛ mbe meleme nya mbe kema ta ɓə, wəndə nya ɗepe mbeli kwele kwele ŋkɛ: kala ghena nya gezete ŋkɛ ne, tsagha temene geva ŋkɛ. Mbara ɓə tsagha, nda kwete kancɛte ɓə hweŋkwa nya tekele mə kazele hɛ ŋkɛ.»

⁷Ma ke Sawəl sha nde mene slene ta ŋkɛ: «Ma kenza mə kaslə ne, wa yatekele nda mə ke wəndəa Shala wa? Kwa nza nde ne, nahe wəshi kezeme kwa slibəa ɓə, kwete shɛ wəsə nya nza mə kandeke nda ke wəndəa Shala we. Wa kwete wəsə nya va gheɓə wa?»

⁸Pa nde mene nda slene kelete ghena, ma ke sha Sawəl: «Dəɓərəa mze kwa tɛawetɛa nya ɓɛhwɛ ya va 'ya, pa 'ya ndeke nda ke wəndəa Shala nda ncɛte ɓə hweŋkwa ŋkɛ mbe dzeghwa ta ɓə.»

⁹Ma ke Sawəl ɓiyitsa: «Ganyɛke, dzeghwa ɓə.» Cape hɛ kadzembe meleme nya nza nde mɛ ŋkwa ta Shala. Ma kwa hweŋkwa hɛ kadzeme vare ghweme ta melemea shɛ, begeme hɛ le kweci ŋwalea kwɛ nyi keshave kezha gə yɛmə. Ma ke hɛ sha hɛ: «Teke nde kelɛŋə tse yi?» Ma sha ka Israyɛl vəashi, kenza mbeli kaɗe ka'yɛwe ghena va Shala ne, ma ke mbeli sha geze: «Nde mə, dzeghwa ɓəmə sha nde kelɛŋə!» Kwa nza nde ma wəndə nya heka mbeli kande mɛ ŋkwa tsetsenya, gheŋkɛ yase mbeli kaheka kande kelɛŋə vəashi.

¹²Ma ke hɛ zhɛnete nda ke hɛ: «E'e, mbe kema ta ŋayɛ ŋkɛ, kwiɗi mə le ntsə geva. Kwa nza ŋkɛ ma nda se ŋkɛ kadzembe meleme ɓeshi ne, va nya nza melɛ shɛ kadzeghe kaŋa pɛtɛa mbeli pelɛ ghəa kələŋə.

¹³Ntsehema ta ŋayɛ mbe meleme ne, katenakɛ ŋkɛ yɛ nda tedzeme ghəa kələŋə ŋkɛ kezha zeme wəsə. Wəndə shɛ kazeme wəshi kezeme kesema ŋkɛ we, kwa nza ŋkɛ gheŋkɛ nde hi kawəpi melɛ nda tezeme wəshi mbeli nyi hekakɛ mbeli. Kwiɗi mə kadzeme, katenakɛ ŋkɛ yɛ ɓeshi.»

¹⁴Cape hɛ kadzeme melemea shɛ. Ma kwa ntsehe hɛ mbe meleme, begeme hɛ le Saməyɛl nya keshave kezha dzeme ghəa kələŋə kedzeghe melɛ.

¹⁵Ma gɛ, nahe Mahwətə kegezete nda ke Saməyɛl mbe hɛ kwetɛŋe nda tepɛkwe Sawəl. Ma gezete nda ŋkɛ:

¹⁶«Tsetse veci hendɛ, kateghwene ŋa wəndə 'ya se mbe hwelefe ta Bɛnjamɛn, kateve ŋkɛ na tekeleke kameghea mbelia ɗa, ka Israyɛl. Katekele mbelia ɗa ŋkɛ shave mbe dzeve ta ka Filisti, va nya nza nde nahe 'ya kenakɛ mbelia ɗa, kwa nza nde nahe nehwene ta nci kedzeme hwa'a sha 'ya.»

¹⁷Ma kwa nakɛ Sawəl Saməyɛl ne, ma ke Mahwətə gezete nda: «Wa nya wəndə nya gezete ŋa 'ya nya, gheŋkɛ nde tesleke mbelia ɗa.»

¹⁸Pa Sawəl hendave nda geva ke Saməyɛl mɛa degha ta meleme, ma ke: «Ncɛte ɗa ghɛa nde kelɛŋə, təhwə təhwə ŋa 'ya.»

¹⁹Ma ke Saməyɛl zhɛnete nda ke Sawəl: «'Ya ya kande kelɛŋəa shɛ. Dzeme ghəa wəmbə nya te kema ta ɗa, katezeme wəsə yɛ le 'ya ɓeshi. Hendɛ tesərə ŋa 'ya kaslə ba'a tezhɛne ŋa 'yɛwe ta ŋa 'ya pɛtɛ.

²⁰Mba na kezəzə kwara ŋemi nyi kezanji hɛ mahekene ɓeshi, nahe hɛ kesepate geva. Pɛtɛ wəshi nyi nza zləvə te mbe Israyɛl ne, ŋa wa hɛ wa? Ashɛ kaŋa ŋa ba'a kaŋa ghɛa yiteyɛ ŋa wəka?»

²¹Ma ke Sawəl zhɛnete: «Nde Bɛnjamɛn nya mbe hwelefe nya ɓɛhwɛ ma mbe Israyɛl 'ya wəka? Ashɛ ghɛa ɗa ya ɓɛhwɛ ma hwa yitehɛ nyi mbe hwelefe ta Bɛnjamɛn wəka? Yitea wa geze ɗa ghena na tsetse wa?»

²²Pa Saməyɛl keleghe yɛ Sawəl le nde mene slene ta ŋkɛ kadzembe cɛ, pa ŋkɛ ndeke nda ŋkwa kentishɛ nyi te kema va ŋa ka mentiɓə nyi kazhili gare mahekenemsə.

²³Pa Saməyɛl gezete nda ke nde ta wəshi kezeme kezha keleke sli nya ndeke nda ŋkɛ, nya veyi ŋkɛ te ŋa ŋkɛ ŋkwa.

²⁴Pa nde ta wəshi kezeme keleke pehwepe ba'a dəŋərə, pa ŋkɛ veyi te kema ta Sawəl. Tagha gɛ, ma ke Saməyɛl sha Sawəl: «Wa nya wəsə nya wəmbəyi ŋa mbeli nya mbe kema ta ŋa, zeme, kwa nza nde kaŋa ŋa veyi mbeli kezha və nya kwa hekakɛ mbeli 'ya.» Pa Sawəl zehwe wəsə zlaɓe le Saməyɛl te vecia shɛ.

²⁵Pa hɛ sawanji pelɛ kələŋəa shɛ kadzembe meleme, pa yɛ Saməyɛl gezehwe ghena le Sawəl pelɛ dɛɓere nya kənəa cɛ.

²⁶Pa hɛ satenji te ŋkwa masheke masheke peslema ta ŋkwa, pa Saməyɛl heka Sawəl pelɛ dɛɓere nya kənəa cɛ, ma ke shɛ: «Nde, 'ya kabeghe ŋa 'ya kwa hweŋkwa.» Pelɛhetɛme Sawəl sate te ŋkwa, cape hɛ kajive bakea nci, gheŋkɛ le Saməyɛl.

²⁷Ma kwa dzawa hɛ hwa'a kwa ghala ta meleme ne, ma ke Saməyɛl sha Sawəl: «Gezete nda ke nde mene slene ta ŋa nda dzatenyɛ ŋkɛ te kema ta ɓə.» Cape nde mene slene nyagha dzatenyɛ te kema. Ma ke Saməyɛl zhɛkwa: «Ma gha ne, ghereŋe ŋa tsetsenya, 'ya katefa ŋa ghena ta Shala.»