Read Kaqchikel Gén 12 Bible Online

Gén 12 - Kaqchikel bible

Gén 12

¹Ri Jehová kan kere' rubin chire ri Abram: Katel-el wawe'. Taya' kan re ruwach'ulew re', re awinaq y ri e aj pa rachoch ri atata' y xtink'ut chawech ri akuchi xkabe-wi.

²Y xkebek'oje' awijatzul y rik'in jun chike rije' xtinben jun nimalej tzobaj winaqi'. Xkatinwurtisaj y xtinben chawe chi xkatok jun nimalej achin chuwech re ruwach'ulew. Y keri' xkatok jun urtisanik chike ch'aqa' chik.

³Y xkenwurtisaj ri xke'urtisan awichin rat. Y ri xtikoyoj itzel pan awi', chuqa' yin xtinya' itzel pa kiwi'. Y awoma k'a rat xkenwurtisaj konojel jay winaqi' richin chijun ruwach'ulew, xcha'.

⁴Y ri Abram xbe k'a, kan achi'el bin chire roma ri Jehová; y ri Lot ri ruch'utik'ajol xbe rik'in. Y ri Abram k'o k'a oxk'al wolajuj rujuna' toq xel-el chiri' pan Harán.

⁵Xuk'uaj k'a el ri Sarai ri rixjayil, ri Lot ri ruch'utik'ajol, ronojel ri rubeyomel ri ruch'akon y ri winaqi' ri xeruloq' chiri' pan Harán. Xeruk'uaj k'a el pa ruwach'ulew Canaán. Y toq xapon chiri',

⁶ri Abram kan xbe-kela' xbe-kela' ri xuben chupan chijun ruwach'ulew y k'ari' xapon k'a pa Siquem ri akuchi k'o-wi jun li'aj paten-che', chiri' pa Moré. Y chupan ri ruq'ijul ri' k'a ek'o na ri rijatzul ri Canaán chiri'.

⁷Y ri Jehová xbepapo' chuwech ri Abram y xubij chire: Chike konojel awijatzul xtinya-wi re ruwach'ulew re', xcha'. Y jari' ri Abram xuben-q'anej jun porobel richin xuporoj jun kamelabel chuwech ri Jehová roma chiri' xuk'ut-wi-ri' chuwech.

⁸K'ari' xbe-el pa taq'aj ri chuwi-juyu', chiri' pa relebel-q'ij pa Betel y chiri' xupaba-q'anej ri rachoch ri banon rik'in tzieq y xuben chikikojol ka'i' tinamit; pa qajbel-q'ij k'o-wi ri Betel, y pa relebel-q'ij k'o-wi ri Ai. Y chiri' xuben-q'anej chuqa' jun porobel richin xuporoj jun kamelabel chuwech ri Jehová y kan xuya' ruq'ij.

⁹Y ri Abram xel-el chiri' y eqal-eqal xapon-qa ri pa xokon.

¹⁰Y chiri' pa Canaán xpe k'a jun nimalej wayjal, y roma ri' ri Abram xapon pan Egipto y chiri' xbek'oje-wi, rokik niq'ax ri wayjal ri'.

¹¹Y toq ye'apon yan chupan ri ruwach'ulew Egipto, jari' toq xubij-el chire ri rixjayil: Yin wetaman chi kan at jebejoj ok;

¹²Y toq xkatkitz'et ri achi'a' aj-Egipto xtikibij: La ixoq la' rixjayil rija', xkecha'. Y roma ri' rije' xkinkikamisaj yin, y rat xtikiya' kan ak'aslen.

¹³Y roma ri' tabij k'a chi at wana'; richin keri' utz k'a xtikiben wik'in yin, y xkik'ase' k'a awoma rat, xcha' ri Abram.

¹⁴Y toq xe'apon k'a rije' chiri' pan Egipto, kan keri' na wi xbanatej, ri achi'a' ri aj chiri' toq xkitz'et ri Sarai kan jebel na wi ok xkitz'et.

¹⁵Chuqa' ri e tata'al richin ri q'atbel-tzij richin Egipto toq xkitz'et, xbekitzijoj chire ri rey chi k'o jun xten janila ti jebejoj ok. K'ari' rije' xkik'uaj-el k'a pa rachoch ri rey.

¹⁶Y roma ri Sarai, ri rey kan utz k'a xuben rik'in ri Abram, y kan xuya' k'a kokoj y nima'q taq rawej, chuqa' xeya' rubur chi achij chi ixoq, ru-camello y rusamajela' chi achi'a' chi ixoqi', ri kan e yuqul pa samaj.

¹⁷Jak'a ri Jehová xuya' k'a pe nima-yabil pa ruwi' ri rey y pa kiwi' konojel ri ek'o pa rachoch; yabil ri kan kichin achi'a' y ixoqi', roma ri rey ruk'amon-qa ri rixjayil ri Abram.

¹⁸K'ari' ri rey xuteq royoxik ri Abram y xubij chire: ¿Achike k'a roma kere' xaben chuwe? ¿Achike roma man xaq'alajirisaj ta chinuwech chi re ixoq re' awixjayil?

¹⁹¿Achike k'a roma xabij chi awana'? Xaben chuwe richin xinch'ob chi xok ta wixjayil. Wakami k'a, ja awixjayil re'. Tak'uaj-el y kabiyin, xcha-el chire.

²⁰K'ari' ri rey xubij chike ri rusamajela' richin tikelesaj-el ri Abram pan Egipto, ri rixjayil, y konojel ri e richin rija'.