Read Kaqchikel Gén 13 Bible Online

Gén 13 - Kaqchikel bible

Gén 13

¹Ri Abram xel-pe pan Egipto rachibilan-pe ri rixjayil y chuqa' ri Lot, y ronojel ri e ruk'uan. Y xetzolej ri pa xokon ri nibix chuqa' Négueb chire.

²Y rija' kan janila k'a beyom, roma janila e k'iy rawej, chuqa' k'iy saqipueq y q'anapueq k'o rik'in.

³Y xel k'a el pa Négueb, y niyuq'un, y eqal xapon chunaqaj ri Betel e rachibilan ri ek'o rik'in; y k'ari' xebek'oje' akuchi xk'oje-wi pa nabey chukojolil ri Betel y ri Ai,

⁴akuchi rubanon wi kan ri porobel. Y chiri' xuya' ruq'ij ri Jehová.

⁵Chuqa' ri Lot ri beneq rik'in rija', ek'o chuqa' e kokoj y e nima'q rawej y ri rachoch banon rik'in tzieq.

⁶Roma janila k'iy ri k'o kik'in man yetikir ta yek'oje' junan, roma man yeruben ta chik ri ruwach'ulew ri akuchi ek'o-wi-qa.

⁷Roma ri' k'o jun q'ij xech'ayon-ki' ri yuq'unela' kichin ri rawej ri Abram y ri yuq'unela' kichin ri rawej ri Lot. Y chupan ri q'ij ri' k'a ek'o na ri rijatzul kan ri Canaán y ri rijatzul kan ri Feres chiri'.

⁸K'ari' ri Abram xubij chire ri Lot: Rat y yin qach'alal-qi' y man ruk'amon ta richin nik'oje' oyowalen chiqakojol, ni chikikojol ri qasamajela'.

⁹Ja ronojel ulew la' ri k'o chawech richin tacha'. Yin nink'utuj utzil chawe richin tiqach'ara-qi' y tacha' achike ri niqa' chawech. Wi rat yabek'oje' kan pa rajxokon, yin xkibek'oje' kan pa rijkiq'a', y wi rat pa rijkiq'a' yin pa rajxokon, xcha'.

¹⁰Y ri Lot xutz'et-apo ri ruwa-taq'aj richin ri ruchi' ri raqen-ya' Jordán ri napon k'a rik'in ri tinamit Sóar y kan jebel ya' k'o chupan, y re ya' re' kan achi'el ruya'an ri ulew, achi'el ri qejoj ri kan nik'ases, y jebel chuqa' achi'el ri ruwach'ulew Egipto, y chuqa' achi'el ri tinamit Sodoma y ri Gomorra toq ri Jehová man jani keruk'is rik'in q'aq'.

¹¹K'ari' ri Lot xucha' kan chijun ri ruwa-taq'aj richin ri ruchi' ri raqen-ya' Jordán, y xbek'oje' pa relebel-q'ij y keri' k'a xkiben toq xkich'er kan ki'.

¹²Y ri Abram xk'oje' kan chupan ri ruwach'ulew Canaán y ri Lot xbek'oje' chuwa-taq'aj y xerupabala-q'anej ri rachoch ri banon rik'in tzieq, chikinaqaj ri tinamit. Y keri' xubanala', xa eqal-eqal xapon k'a pa Sodoma.

¹³Y ri winaqi' ri ek'o chiri' pa Sodoma janila ketzelal y e aj-maki' chuwech ri Jehová.

¹⁴Y toq ri Lot xuch'er yan el ri', jari' toq ri Jehová xubij chire ri Abram: Wakami k'a katzu'un nej y tatz'eta' la ulew la k'o pa xaman, la k'o la pa xokon, la k'o la pa relebel-q'ij y la k'o la pa qajbel-q'ij,

¹⁵roma ronojel la ulew natz'et, xtinya' chawe rat y chike ri awijatzul richin q'asen.

¹⁶Y yin xtinben chi xkek'iyer ri awijatzul y kan man e ajlatel ta k'a achi'el ri poqolaj kan man jun nitikir najlan.

¹⁷Kayakatej k'a el richin yabe chunik'oxik ri ruwach'ulew y tatzu' ri raqen y ri ruwech, roma jare' ri xtinya' kan chawe rat.

¹⁸K'ari' ri Abram xuq'axaj ri rachoch banon rik'in tzieq ri chiri' rik'in ri li'aj paten-che' ri k'o pa rulew ri jun achin rubini'an Mamré, ri k'o pa tinamit Hebrón; y chiri' xupaba-q'anej jun porobel richin xusuj kamelabel chuwech ri Jehová.