Read Kaqchikel Gén 14 Bible Online

Gén 14 - Kaqchikel bible

Gén 14

¹Y k'o k'a jun q'ij xyakatej jun labal chikikojol e ka'i' tzobaj q'atoy taq tzij. Ri e kaji' rey richin ri jun tzobaj ja ri Amrafel rey ri k'o pa ruwi' ri ruwach'ulew ri Sinar, ri Arioc rey pa ruwi' ri ruwach'ulew ri Elasar, ri Quedorlaómer rey pa ruwi' ri ruwach'ulew Elam y ri Tidal rey pa ruwi' ri ruwach'ulew Goím; jare' ri jun tzobaj. Y ri jun chik tzobaj ja ri Bera rey ri k'o pa ruwi' ri tinamit Sodoma, ri Birsá rey pa ruwi' ri tinamit Gomorra, ri Sinab rey pa ruwi' ri tinamit Admá, ri Seméber rey pa ruwi' ri tinamit Seboím y ri rey pa ruwi' ri tinamit Bela, ri chuqa' nibix Sóar chire.

³Re wo'o' rey re' y ri aj-labal xa xkitun-ki', y xkimol-ki' chupan ri ruwa-taq'aj richin Sidim y chiri' k'o-wi ri Tzayi-Choy re wakami.

⁴Kablajuj yan juna' kitojon-pe ri q'aton pa kiwi' roma ri rey Quedorlaómer y toq xuchop-el oxlajuj juna' jari' toq xeyakatej chirij ri rey ri'.

⁵Y chupan ri juna' kablajuj xpe ri Quedorlaómer y ri ch'aqa' chik rey ri ek'o rik'in rija' y xekich'ek kan ri rijatzul ri Refa ri ek'o pan Astarot Carnaim y ri rijatzul ri Zus ri ek'o pan Ham, y ri winaqi' emita ri ek'o pa Savé-quiriataim,

⁶y chuqa' xekich'ek ri rijatzul ri Hor ri ek'o chiri' pa juyu' rubini'an Seír y xekitzeqelibej k'a el k'a chuwa-taq'aj richin Parán ri k'o chunaqaj ri tz'iran ruwach'ulew.

⁷Y xetzolej k'a pe y xepe pa tinamit En-mispat ri chuqa' nibix Cadés-barnea chire. Y xkich'ek kan ri ruwach'ulew ri xtibe'ok kichin ri rijatzul ri Amalec y chuqa' ri ruwach'ulew ri rijatzul ri Hamor ri k'o pan Hasesón-tamar.

⁸Jari' k'a toq ri rey richin ri Sodoma, richin ri Gomorra, richin ri Admá, richin ri Seboím y richin ri Bela, ri nibix chuqa' Zoar chire; xebe chuwa-taq'aj ri rubini'an Sidim e kachibilan-el ri aj-labal y xbekichapa' oyowal.

⁹Chiri' ek'o-wi ri wo'o' rey ri' y xkiben oyowal kik'in ri e kaji' chik rey: Ri Quedorlaómer rey richin Elam, ri Tidal rey richin Goím, ri Amrafel rey richin Sinar, y ri Arioc rey richin Elasar.

¹⁰Chupan ri ruwa-taq'aj Sidim k'iy petróleo e rimil y ri rey richin ri Sodoma, richin ri Gomorra y ri aj-labal xe'animej chupan ri oyowal ri' y jujun chike rije' xebetzaq chupan ri petróleo ri e rimil chiri' y ri ch'aqa' chik xe'animej-el pa taq juyu'.

¹¹Y ri achi'a' ri xech'akon xekik'uaj-el ri kiway y ri nima'q taq beyomel kichin ri Sodoma y ri Gomorra.

¹²Y chikikojol ri winaqi' ri xekik'uaj-el, xkik'uaj chuqa' ri Lot ri ruch'utik'ajol ri Abram y ronojel ri rubeyomel, roma rija' chiri' pa Sodoma k'o-wi.

¹³Y k'o k'a jun achin ri xukol-el-ri' chupan ri oyowal y xberuya' rutzijol chire ri Abram ri rijatzul kan ri Éber. Y ri Abram k'o k'a chiri' akuchi k'o-wi ri li'aj paten-che' richin ri Mamré ri rijatzul ri Hamor. Y ri Mamré kach'alal ri Escol y ri Aner. Y re achi'a' re' kan junan k'a kiwech rik'in ri Abram.

¹⁴Y toq ri Abram xrak'axaj chi ri Lot, ri ruch'utik'ajol xuk'uex-el koma ri rey ri xech'akon, rija' xuya' kikamisabal ri samajela' ri e alaxineq pa rachoch. Xebe e 318 achi'a' y xekitzeqelibej k'a pa tinamit rubini'an Dan.

¹⁵Y toq xokoq'a-qa, ri Abram y ri achi'a' ri e beneq rik'in, chaq k'ate' xekichop chi oyowal ri kaji' rey ri' y ri kiwinaq, y xekitzeqelibej k'a pa tinamit Hobá ri k'o pa xaman chire ri tinamit Damasco.

¹⁶Xukol k'a pe ri beyomel ri kik'uan-el y chuqa' ri Lot ri ruch'utik'ajol, ri ixoqi' y konojel ri aj-labal ri ek'o rik'in.

¹⁷Toq ri Abram tzolejineq-pe chubanik ri oyowal rik'in ri rey Quedorlaómer y ri ch'aqa' chik rey, jari' toq ri rey richin ri Sodoma xberuk'ulu' pa taq'aj-qa richin Savé, ri chuqa' nibix Ruwa-taq'aj richin ri Rey chire.

¹⁸Chuqa' ri Melquisedec rey ri k'o pa ruwi' ri jun tinamit rubini'an Salem y chuqa' sacerdote richin ri nimalej Dios, ri Dios ri man jun chik achi'el rija'. Ri Melquisedec ri' ruk'amon k'a pe kaxlan-wey y vino.

¹⁹Y xrurtisaj ri Abram y xubij chire: Nim aq'ij rubanon ri nimalej Dios chawe rat Abram, ri Dios ri kan man jun chik achi'el rija', ri Dios ri xbanon ri kaj y re ruwach'ulew;

²⁰Y nim ruq'ij ri nimalej Dios, ri Dios ri kan man jun chik achi'el rija', ri Dios ri kan xerujech pan aq'a' ri e etzelanel awichin; keri' xubij ri Melquisedec chire ri Abram. Y ri Abram xuch'er k'a jun chire ri lajuj ri ruch'akon-pe pan oyowal y xuya' chire ri Melquisedec.

²¹K'ari' ri rey richin Sodoma xch'on y kere' k'a xubij chire ri Abram: Nink'utuj utzil chawe chi ke'atzolij kan ri nuwinaq y tok kan awichin ronojel ri xak'en-pe chuwi' qaq'a', xcha' chire.

²²Y ri Abram xubij k'a chire ri rey richin Sodoma: Yin ninjikiba' k'a nutzij chuwech ri Jehová Dios, ri man jun chik achi'el rija', ri banayon ri kaj y ri ruwach'ulew,

²³chi ni ta jun ruwech betz' o jun ximibel xajab ri xtinchop-el chire ri awichin rat, richin man tabij chi ja rat ri xabanon chuwe chi yin xibeyomer.

²⁴Yin kan man jun k'a xtinchop-el, xaxe k'a ri xkitej ri aj-labal ri e tzeqelibeyon-pe wichin, y ri xtikik'uaj-el ri Escol y ri Mamré ri ruk'amon richin nikik'uaj-el, xcha' ri Abram.