Read Kaqchikel Gén 15 Bible Online

Gén 15 - Kaqchikel bible

Gén 15

¹Toq xbanatej yan ronojel re' ri Jehová xch'on rik'in ri Abram pa jun achi'el achik' y xubij chire: Man taxibij-awi' Abram, xa man jun xtak'uluwachij roma kan ja yin ri xkito'on awichin y ronojel ri xtaben k'o nim rajel ruk'exel xtak'ul, xcha' ri Dios.

²Y ri Abram xubij: Wajaw Jehová, rat jebel awetaman chi yin e maneq walk'ual ri xke'ichinan ta kan ronojel ri nubeyomel ri k'o wik'in, xaxe ri Eliézer ri k'o pa kiwi' ri nusamajela', ri achin aj-Damasco.

³Y rija' xubij chuqa' chire ri Jehová: Rat man jun walk'ual aya'on y wakami xa ja ri nusamajel ri k'o pa kiwi' ri nusamajela' ri xtichinan kan ri nubeyomel, xcha' ri Abram.

⁴Jak'a ri Jehová kan chi'anin xch'on-pe y xubij chire: Ni, man ja ta ri asamajel ri xtichinan kan, xa kan jun awalk'ual rat xtichinan kan ri abeyomel, xcha'.

⁵Y xeri' ri Dios xrelesaj-pe chupan ri rachoch banon rik'in tzieq y k'ari' xubij chire: Katzu'un chikaj y ke'awajlaj la ch'umila' wi yatikir ye'awajlaj. Kela' k'a ruk'iyal ri awijatzul ri xkebek'oje', xcha' chire.

⁶Y rija' kan xukuquba' ruk'u'x rik'in ri Jehová, y roma ri' ri Jehová xuben chire ri Abram chi man jun rumak xk'ulun chuwech.

⁷Y xubij chuqa' chire: Ja yin Jehová ri xatinwelesaj-pe chupan ri tinamit Ur ri k'o pa ruwach'ulew Caldea y xatink'en-pe chupan re ruwach'ulew re' richin ninya' chawe, y ja rat ri xkatichinan kan, xcha' chire.

⁸Y ri Abram xubij chire: Ajaw Jehová, ¿achi'el k'a toq xtinwetamaj yin chi qitzij xtinwichinaj re ruwach'ulew re'?, xcha'.

⁹Y ri Jehová xubij chire: Tak'ama-pe chuwe oxi' chikopi' ri k'o oxi' kijuna'; jun ixoq wákix, jun ixoq tzuntzun y jun achij karne'l, y chuqa' jun paloma nim y jun ti alaj paloma, xcha'.

¹⁰Jari' ri xeruk'uaj-el chire y xerelesaj pa taq nik'ajta'q, y xuben ka'i' cholaj chike pa k'ulaj richin xkitzula-ki' y xuya' jujun taq aj-xik' chikopi' pa jujun cholaj y man xerelesaj ta pa taq nik'aj.

¹¹Y ri k'ucha' yeqaqa-qa pa ruwi' ri ti'ij. Y ri Abram kan yeroqotaj-el.

¹²Y toq xqaqa ri q'ij, ri Dios xuben chire ri Abram chi xken-qa chi waran y jari' toq xuna' jun nimalej xibinri'il, y kan xuk'en rukiy, roma xqaqa jun nimalej q'equ'm pa ruwi' rija'.

¹³K'ari' ri Jehová xubij chire: Kan tawetamaj chi ri awijatzul xkebe'ok q'axel chupan jun chik ruwach'ulew ri man kichin ta rije'. Chiri' xkebexime-wi pa samaj, janila xketz'ilox y xtibekitija' poqon 400 juna'.

¹⁴Jak'a yin kan xtinya' k'a ri rutojbalil-mak pa kiwi' ri winaqi' ri aj-ruwach'ulew ri'. Chirij re' ri awijatzul xke'el-pe y xke'ok rajaw ri nima'q taq beyomel ri xtikik'uaj-el chiri'.

¹⁵Jak'a rat k'a k'o na k'iy ajuna' ri xtakochij-el y kan k'o k'a uxlanibel-k'u'x awik'in toq xkaken y xkamuq.

¹⁶Y ri rukaj sol chire ri awijatzul xketzolin chik pe chupan re ruwach'ulew re', roma man jani tik'o ruwi' ri kimak ri rijatzul ri Hamor richin ninwelesaj ri ruwach'ulew chike, xcha' ri Dios.

¹⁷Jak'a toq qajineq chik ri q'ij y chaq'a' chik, ri Abram xutz'et k'a jun achi'el bojo'y, ri nel-pe sib y ruxaq q'aq' chupan y niq'axyaj k'a chikikojol ri chikopi' ri e elesan pa taq nik'ajta'q.

¹⁸Chupan ri q'ij ri', ri Jehová xuben jun jikibel-tzij rik'in ri Abram y xubij chire: Chike ri awijatzul xtinya-wi kan re ruwach'ulew re', nitiker-el rik'in ri raqen-ya' richin Egipto y napon k'a rik'in ri nimalej raqen-ya' rubini'an Éufrates.

¹⁹Jare' ri kiruwach'ulew ri kijatzul re achi'a' re'; ri Quen, ri Quenaz, ri Cádmon,

²⁰ri Hit, ri Feres, ri Refa,

²¹ri Hamor, ri Canaán, ri Gérges, y ri Jebús, xcha' ri Jehová Dios chire ri Abram.