Read Kaqchikel Gén 16 Bible Online

Gén 16 - Kaqchikel bible

Gén 16

¹Y ri Sarai kan man jun k'a ral ri alaxineq ta, richin ruya'on ta chire ri Abram ri rachijil; jak'a rija' k'o jun rusamajel xten ri yuqul pa samaj rik'in, aj-Egipto ri rubini'an Agar.

²Roma ri' ri Sarai xubij chire ri rachijil: Rat awetaman chi ri Jehová rubanon chuwe richin man yek'oje' ta wal. Nink'utuj k'a utzil chawe richin kak'oje' rik'in ri xten Agar, ri nusamajel. Rik'in juba' rija' xtik'oje' jun ral y xtok wichin yin, xcha' chire. Y ri Abram kan xqa' k'a chuwech ri rutzij ri rixjayil.

³Y ri Sarai xuya' q'ij chire ri rachijil richin xk'oje' rik'in ri Agar, ri rusamajel; richin xok jun chik rixjayil. Y re' xbanatej toq ri Abram xtz'aqet yan lajuj juna' k'o qa chupan ri ruwach'ulew Canaán.

⁴Ri Abram kan xk'oje' k'a rik'in ri Agar y toq ri Agar xunabej chi xyawej kan, rija' janila xretzelaj ri Sarai.

⁵K'ari' ri Sarai xubij chire ri rachijil: Pan awi' rat tiqaqa-wi ronojel ri k'ix ri nink'owisaj yin. Ja yin ri xiya'on ri xten ri nusamajel chawe, richin xok awixjayil, xa jak'a rija' toq xunabej chi yawa' chik, xuchop janila yiretzelaj. Y ja ri Jehová tiq'aton-tzij pa qawi', rat Abram y yin, xcha' ri Sarai chire.

⁶Y ri Abram xubij chire ri Sarai: Pan aq'a' rat k'o-wi la asamajel. Tabana' achike ri nawajo' naben rik'in, xcha' chire. Y ri Sarai xuben chire ri Agar richin janila xutej poqon, y roma ri' xanimej-el chuwech.

⁷Y toq animajineq-el ri Agar, xberuk'ulu-pe ri ángel richin ri Jehová, chunaqaj jun ralaxbel-ya' ri k'o pa tz'iran ruwach'ulew ri k'o junan rik'in ri bey ri nibe pa Sur.

⁸Y xubij chire: Agar, rat ri at samajel richin ri Sarai, ri at ximil pa samaj rik'in, ¿achike naben re ke taq re'? ¿Akuchi at peteneq-wi y akuchi yabe-wi?, xcha' chire. Y ri Agar xubij: In animajineq-pe chuwech ri Sarai ri wajaw, xcha'.

⁹Y ri ángel richin ri Jehová xubij chire: Agar, katzolin rik'in ri awajaw Sarai, taqasaj-awi' chuwech y tabana' ri achike nrajo' rija'.

¹⁰Chuqa' ri ángel richin ri Jehová xubij chire ri Agar: Xkewinaqir k'a ri awijatzul y man jun xtitikir xtajlan kichin, roma janila chi winaqi'.

¹¹Chuqa' ri ángel xubij chire: Rat awoyoben jun ak'ual y ri ak'ual ri xtawalaj jun ti ala', Ismael*f12* ri rubi' ri xtaya', roma ri Jehová xrak'axaj ronojel ri aq'axo'n.

¹²Rija' xtubanala' k'a oyowal kik'in konojel. Y stape' kan konojel xke'ok chirij xa man xtikich'ek ta, roma rija' xa achi'el jun kiej ri man jun niqasan ruq'ij y xa roma ri' rija' juk'an chik k'a xtibek'oje-wi chike ri rach'alal, xcha'.

¹³Ri Agar xubij k'a qa pa ránima: ¿Kan qitzij kami chi ja ri Jehová Dios ri xuk'ut-ri' chinuwech richin xintz'et y kan k'a in k'es na?, xcha'. Y roma ri', rija' xuya' jun rubi' ri Dios y xubij chire: Ri Dios ri Nitz'eton Wichin.*f13*

¹⁴Roma ri' ri pozo ri k'o chiri', rubini'an: Pozo richin ri jun ri kan k'es y yirutz'et. Y re pozo re' k'o chukojolil ri tinamit Cadés y ri tinamit Béred.

¹⁵Chirij re' ri Agar xtzolej rik'in ri Sarai y jari' toq xalex ri ti ral, ri ralk'ual ri Abram; y ri Abram kan Ismael wi ri rubi' ri xuya'.

¹⁶Ri Abram k'o k'a jumuch' waqi' rujuna' toq ri Agar xk'oje' ri ti ral.