Read Kaqchikel Gén 17 Bible Online

Gén 17 - Kaqchikel bible

Gén 17

¹Ri Abram k'o jumuch' belejlajuj rujuna' toq xuk'ut chik ri' jun bey ri Jehová chuwech, y xubij chire: Ja yin ri in Dios ri k'o Ronojel Uchuq'a' Pa Nuq'a'.*f14* Tak'uaj ri nubey y tabana' ri utz.

²Y xtik'oje' k'a ri nujikibel-tzij chiqakojol roj, y yin xtinben chi xkewinaqir ri awijatzul, xcha'.

³Y ri Abram kan jari' xuqasaj-qa-ri' k'a pan ulew chuwech ri Dios, y ri Dios xubij chuqa' chire:

⁴Ja jikibel-tzij re' ri nubanon awik'in chi ja rat ri xkatok tata'aj kichin e k'iy nima'q taq tzobaj winaqi' chuwech re ruwach'ulew.

⁵Y ri abi' kan xtijalatej roma xkatok kitata' e k'iy nima'q taq tzobaj winaqi' chuwech re ruwach'ulew. Y roma ri' man chik k'a xtabini'aj ta Abram xa kan xtabini'aj Abraham.*f15*

⁶Y xtinben chi xkewinaqir ri awijatzul y kik'in rije' xtinben nima'q taq tzobaj winaqi' y xke'el k'a el rey chikikojol ri awijatzul.

⁷Ri jikibel-tzij ri xinben awik'in, chuqa' keri' xtinbenbana' kik'in konojel ri awijatzul, chi wiq chi tanaj ri xkepe chiqawech-apo richin q'asen, chi ja yin xkinok a-Dios y xkinok ki-Dios rije'.

⁸Yin xtiya' chawe rat y chike ri awijatzul ri ruwach'ulew ri akuchi atk'o-wi wakami ri xa q'axel, chijun re ruwach'ulew Canaán xtinya' chawe richin q'asen. Y yin xkinok ki-Dios ri awijatzul, xcha'.

⁹Chuqa' ri Dios xubij chire ri Abraham: Rat kan tataqej k'a ri jikibel-tzij ri' y chuqa' ri awijatzul ri xkek'oje' y ri winaqi' ri chi wiq chi tanaj xkeq'ax.

¹⁰Jak'a jikibel-tzij re' ri xinben awik'in y kan xtikitaqej ta k'a konojel ri awijatzul, konojel ri taq ak'uala' alaboni' y ri achi'a' ri ek'o chi'ikojolil rix, k'atzinel richin yequpix richin jun retal.

¹¹Nik'atzin chi nichap ri rutz'umal ri rutza'n ri kikowil y k'ari' niqupix-el. Ja k'a retal re' ri jikibel-tzij ri xtik'oje' kan chiqakojol roj; rix y yin.

¹²Ri chawech-apo konojel ri ak'uala' taq alaboni' ri xke'alex pan awachoch, chi wiq chi tanaj nik'atzin chi niban re jun etal re' chike toq xtz'aqet yan waqxaqi' q'ij ke'alex, chuqa' chike ri ak'uala' ri ye'alex kik'in ri samajela' ri e aloq'on rik'in méro y chike ri winaqi' ri ek'o chi'ikojol y man e awijatzul ta rat.

¹³K'atzinel richin niban re retal re' chike konojel ri ye'alex pan awachoch y ri e aloq'on rik'in méro richin keri' ja retal re' ri nik'oje' kan pa kich'akul richin q'asen.

¹⁴Y ri achin ri man xtiya'ox ta re etal re' chire, re' kan xtelesex-el chupan ri rutinamit chi'ikojol rix, roma xuq'ej ruwi' ri nujikibel-tzij, xcha'.

¹⁵Ri Dios xubij chire ri Abraham: Ri awixjayil rubini'an-pe Sarai y re wakami Sara*f16* k'a ri rubi' ri xtabij.

¹⁶Y xtinya' urtisanik pa ruwi' rija', chuqa' xtinya' awalk'ual rik'in ri Sara; ja' kan xtinya' na wi urtisanik pa ruwi' y xtok jun te'ej kichin nima'q taq tzobaj winaqi' chuwech re ruwach'ulew y kik'in ri e ral-riy xke'el nima'q taq rey ri xkeq'aton-tzij pa kiwi' tinamit, xcha' ri Dios chire ri Abraham.

¹⁷Ri Abraham xuqasaj chik qa ri' k'a pan ulew, roma ri xubij ri Dios, rija' xtze'en y xubij-qa pa ránima: ¿Ek'o kami k'a achi'a' ri wok'al chik kijuna' ri nik'oje' ta kalk'ual? ¿Y k'o kami jun ixoq achi'el ri Sara ri jumuch' lajuj chik rujuna' ri nalex ta jun ti ral?, xcha-qa.

¹⁸Chuqa' ri Abraham xubij chire ri Dios: K'ate' ta ri Ismael xtichinan chuqa' juba' rik'in ri awurtisanik rat, xcha'.

¹⁹Y ri Dios xubij chire ri Abraham: Kan qitzij na wi chi rik'in ri Sara ri awixjayil xtibek'oje' jun ak'ajol y xtiberubini'aj Isaac y rik'in rija' xtinjikiba' kan ri nutzij y xtibek'oje' kik'in ri rijatzul richin q'asen.

²⁰Y jak'a pa ruwi' ri ak'ajol Ismael xinwak'axaj yan ri arayibel; yin kan xtinya' k'a chuqa' urtisanik pa ruwi', xtinben chire chi janila xkewinaqir chuqa' ri rijatzul; xkek'oje' k'a e kablajuj ralk'ual y xke'ok tata'al y xtinben nima'q taq tzobaj winaqi' chike chuwech re ruwach'ulew.

²¹Jak'a ri nujikibel-tzij kan xtibebanatej rik'in ri Isaac ri xtibe'alex rik'in ri Sara ke taq wa juna' apo, xcha' ri Dios chire.

²²Toq ri Dios xtane' kan chi ch'owen rik'in ri Abraham, xtzolin-q'anej.

²³Chupan k'a ri q'ij ri' ri Abraham xuqupij ri Ismael ri ruk'ajol, richin xuya' retal y konojel ri rusamajela' ri xe'alex pa rachoch, konojel ri e loq'on rik'in méro y konojel ri achi'a' ri e aj pa jay ri ek'o chikikojol ri aj pa rachoch ri Abraham; konojel k'a rije' xequpix richin xya'ox ketal achi'el xbix kan chire roma ri Dios.

²⁴Y toq ri Abraham k'o chik jumuch' belejlajuj rujuna', jari' toq xqupix chuqa' rija' richin xk'oje' retal.

²⁵Y ri Ismael oxlajuj k'a rujuna' toq xqupix richin xya'ox retal.

²⁶Chupan ri q'ij ri' junan xequpix richin xk'oje' ketal ri Abraham y ri Ismael.

²⁷Konojel k'a achi'a' ri ek'o rik'in pa rachoch y ri rusamajela' ri e alaxineq pa rachoch y ri e ruloq'on ri man e ruwinaq ta xban ri etal ri' chike. Y konojel k'a xya'ox ketal junan rik'in rija'.