Read Kaqchikel Gén 19 Bible Online

Gén 19 - Kaqchikel bible

Gén 19

¹Y toq xqaq'ij yan qa ri q'ij ri', kere' k'a ri xbanatej: Ri e ka'i' ángel xe'apon k'a qa ri chiri' pa Sodoma, y ri Lot tz'uyul chiri' pan okibel richin ri tinamit Sodoma. Y toq rija' xerutz'et, xyakatej richin xeberuk'ulu' y xxuke' y xuqasaj-qa-ri' k'a pan ulew chikiwech.

²Y rija' xubij chike: Wakami k'a nink'utuj utzil chiwe richin yixbe chuwij pa wachoch richin yixuxlan y nich'ej iwaqen. Y chiri' niq'axaj-wi ri aq'a' y chua'q nimaq'a' xtichop chik k'a el ri ibey, xcha' chike. Y rije' xkibij: Ni, pa bey yojk'oje-wi kan re junaq'a' re', xecha'.

³Jak'a ri Lot janila xuk'utuj chike richin yebe chirij pa rachoch y rije' xkinimaj rutzij. Y rija' xuben jun nimaq'ij kichin rije' y xuben kaxlan-wey ri maneq ch'amilej-q'or rik'in; y rije' xewa' k'a jebel.

⁴Y k'a man jani kekotz'e-qa, toq xe'apon konojel ri achi'a' ri e rijita'q y ri más k'a e ak'uala' na ri aj chiri' pa tinamit Sodoma, y xkisutij-rij ri jay.

⁵Xkoyoj k'a apo ri Lot y xkibij chire: ¿Akuchi ek'o-wi ri achi'a' ri xe'oqaqa awik'in re aq'a' re'? Ke'awelesaj-pe richin yojk'oje' kik'in, xecha'.

⁶K'ari' ri Lot xel-pe chikiwech y xujik' kan ruchi' ri rachoch,

⁷y xubij chike: Wach'alal, nink'utuj utzil chiwe chi man tich'ob richin niben itzel chike.

⁸Yin ek'o e ka'i' numi'al y re' man e k'ojewineq ta kik'in achi'a'. Xkenwelesaj-pe chiwech y tibana' kik'in ri achike ri niwajo'; jak'a chike ri achi'a' ri ek'o wik'in man jun tiben-el, roma xa ja yin ri xik'amon-pe kichin re wawe' pa wachoch, xcha' chike.

⁹Jak'a rije' xkibij: ¡Katel chiri' rat! Rat xa man at aj wawe' ta y kan nawajo' yatok jun to'onel qichin. Wakami k'a, más k'ayew xtiqaben chawe rat ke chuwech ri xtiqaben chike ri xe'oqaqa awik'in, xecha'. Jari' toq xeyakatej ri winaqi' e banoy ch'a'oj, chirij ri Lot y xejel-apo richin nikijoq' ri ruchi' ri rachoch.

¹⁰Kan jari' toq ri achi'a' ri ek'o pa rachoch ri Lot xkijeq juba' ri ruchi' ri jay, xkijik'-apo ri Lot y xkitz'apej chik kan ri ruchi' ri jay.

¹¹K'ari' xkiben chike ri achi'a' richin xemoyir y xemoyir ri más e rijita'q k'a ri más k'a e ak'uala' na. Y re achi'a' re' xa nabey xekos y man xkil ta ri ruchi' ri jay.

¹²Y ri ka'i' achi'a' xkibij chire ri Lot: ¿Xaxe re' ek'o awik'in? ¿Maneq k'a jun aji', ch'aqa' chik ami'al ak'ajol o jun chik wineq ri kan awach'alal rat? Y wi ek'o, ke'awelesaj-el chupan re tinamit re',

¹³roma roj kan xtiqak'is re tinamit re', roma ri sujunik janila apowineq chuwech ri Jehová. Y roma ri' oj rutaqon-pe, xecha'.

¹⁴K'ari' ri Lot xeberutz'eta' ri xke'ok ruji', ri alaboni' ri achoq chike xeyatej yan el ri rumi'al, y xubij chike: Jo', qojel-el re wawe' chupan re tinamit re', roma ri Jehová xtiberuk'isa' re tinamit re', xcha' chike. Jak'a rije' xkich'ob chi xa yeruq'ol.

¹⁵Y toq niseqer yan pe, ri ka'i' ángel xkipararej k'a ri Lot y xkibij chire: Kayakatej y chi'anin ri' tak'uaj-el ri awixjayil y la ka'i' ami'al, man xa kek'is kan wawe' chupan re rutojbalil rumak re tinamit, xecha'.

¹⁶Jak'a ri Lot man niniman ta k'a. Roma ri' xepe ri ka'i' ángel xkichop-el chi ruq'a' rija', ri ruq'a' ri rixjayil y ri kiq'a' ri e ka'i' rumi'al, roma ri Jehová kan janila xujoyowaj kiwech. Xekelesaj k'a pe chiri' y xekik'uaj k'a chuchi' ri tinamit y xekiya' kan chiri'.

¹⁷Y toq ek'o k'a chiri' chuchi' ri tinamit, jun chike ri ángel xubij chire ri Lot: Junanin ri' takolo-el ri ak'aslen. Man katzu'un kan chawij, ni man kapa'e' kan chupan la ruwa-taq'aj. Xa choj kabiyin la chuwa taq juyu' wi nawajo' nakol ri ak'aslen, roma rik'in juba' yaken, xcha'.

¹⁸Jak'a ri Lot xubij chike: Ni, wajaw yin.

¹⁹Rix kan janila utzil ibanon wik'in, y kan xijoyowaj nuwech, roma ri' xikol re nuk'aslen. Jak'a yin man yitikir ta ninkol-el-wi' k'a la chuwa taq juyu' la'. Man xa achike tink'uluwachij y yiken pa bey.

²⁰Roma naqaj k'o la jun ko'ol tinamit la', akuchi utz xtinkol-el-wi'. Tiya' q'ij chuwe richin yibe chila' richin ninkol-el nuk'aslen, xcha' ri Lot chike.

²¹Y jun chike rije' xubij chire: Utz k'a, xtinben achi'el ri nawajo'. Man xtink'is ta k'a la ko'ol tinamit la'.

²²Xa ja ri nik'atzin chi nakol yan el awi', roma yin man jun yitikir ninben, k'a toq rat xkatapon na chupan la ko'ol tinamit la', xcha' ri ángel chire. Y roma ri' xbix Sóar chire roma ko'ol ok.

²³Y toq xel k'a pe ri q'ij jari' toq xapon ri Lot chiri' pa Sóar,

²⁴k'ari' ri Jehová xuya-pe ri q'aq' rik'in chuwilej-abej y kan achi'el k'a job ri xuben pa kiwi' ri Sodoma y ri Gomorra.

²⁵Y kan achi'el k'a xerupiskolij kan ri tinamit ri', kan man jun chik ketal xk'oje' ta kan, xeruk'is konojel ri winaqi', ronojel ri ruwa-taq'aj y ronojel ri k'o chuwech.

²⁶Jak'a ri rixjayil ri Lot, xa kanajineq k'a kan y xpe rayibel rik'in richin xtzu'un chik kan chirij, y xa chiri' xk'oje-wi kan jumul, xok kan atz'an y xpa'e' kan achi'el jun wachibel.

²⁷K'ari' ri Abraham nimaq'a' yan xbe-el akuchi xtzijon-wi rik'in ri Jehová.

²⁸Jari' toq xerutz'et-qa ri Sodoma y ri Gomorra y xutz'et chi chijun ri pa taq'aj-qa, nibuqulin sib achi'el nibuqulin jun nimalej horno.

²⁹Kere' k'a xk'uluwachitej toq ri Dios xeruk'is ri tinamit ri akuchi xk'oje-wi ri Lot. Ri Dios kan xuben k'a achi'el xuk'utuj ri Abraham chire y xerukol k'a pe ri Lot pa Sodoma toq achi'el xupiskolij kan ri' ri tinamit.

³⁰Y ri Lot xpe k'a xibinri'il chire chi nik'oje' kan chupan ri tinamit Sóar, roma ri' rija' y ri e ka'i' rumi'al xebe-q'anej ri chuwa taq juyu' y chiri' xebek'oje-wi pa jun jul.

³¹Y k'o k'a jun q'ij toq ri nimalaxel rumi'al xubij chire ri chaq'laxel: Ri qatata' k'o yan chik k'iy rujuna' y man jun chik achin ri xk'oje' ta kan chuwech re ruwach'ulew richin xtik'ule' ta qik'in y yek'oje' ta qal.

³²Wakami tiqabana' chire ri qatata' chi tuqumu' k'iy vino y qojk'oje' rik'in richin keri' xtik'oje' kan rijatzul qik'in, xcha' chire.

³³Y ri aq'a' ri' kan xkiben k'a chire ri kitata' chi xutej k'iy vino y ja ri nimalaxel rumi'al ri xk'oje' kan rik'in. Jak'a ri Lot kan man jun xuna' ta toq xk'oje' kan rik'in, ni toq xyakatej-el.

³⁴Y ri ruka'n q'ij ri', ri nimalaxel xch'on rik'in ri chaq'laxel y xubij chire: Rat awetaman chi ri chi'aq'a' iwir ja yin ri xik'oje' kan rik'in ri qatata'; y wakami re aq'a' re' tiqabana' chire ri qatata' chi tuqumu' chik k'iy vino, y ja chik rat ri xkak'oje' kan rik'in, richin keri' xtik'oje' kan rijatzul qik'in, xcha'.

³⁵Y kan keri' wi xkiben chupan ri aq'a' ri', xkiben chire ri kitata' chi xuqum k'iy vino, y ja chik ri chaq'laxel ri xk'oje' kan rik'in. Jak'a ri Lot kan man xuna' ta toq xk'oje' kan rik'in, ni toq xyakatej-el.

³⁶Y chi e ka'i' k'a xtani' ri' xeyawej kan chirij ak'ual y kan richin k'a ri kitata'.

³⁷Y ri nimalaxel xk'oje' k'a jun ti ral ti ala' y re ak'ual re' xubini'aj Moab;*f17* y ri e rijatzul kan rija' xe'ok jun tzobaj winaqi' ri xkibini'aj chuqa' Moab. Y k'a keri' na kibi' etaman re q'ij re'.

³⁸Y ri chaq'laxel xk'oje' chuqa' jun ti ral ti ala', y re ak'ual re' xubini'aj Ben-amí;*f18* y ri e rijatzul kan rija' xe'ok jun tzobaj winaqi' ri xkibini'aj chuqa' Amón. Y k'a keri' na kibi' etaman re q'ij re'.