Read Kaqchikel Gén 22 Bible Online

Gén 22 - Kaqchikel bible

Gén 22

¹Chirij k'a ronojel re' ri Dios xutejtobej ri Abraham y xroyoj k'a pe y xubij chire: Abraham, xcha'. Y rija' xubij: Jare' ink'o wawe', wajaw, xcha' rija'.

²Ri Dios xubij chire: Tak'uaj-el la juney ak'ajol Isaac, la janila nawajo' k'a chupan la ruwach'ulew Moria y chiri' xtaporoj-wi richin kamelabel chinuwech yin pa ruwi' ri juyu' akuchi xtinbij chawe, xcha' ri Dios chire.

³Y pa ruka'n q'ij ri Abraham xyakatej nimaq'a' yan, xuchojmirisaj ri rubur, y xuch'er-el ri si' richin nuporoj ri kamelabel. Y xberuk'ama-pe ri Isaac, ri ruk'ajol y chuqa' e ka'i' chike ri rusamajela' ri e yuqul pa samaj rik'in. K'ari' xkichop-el bey akuchi xbix-wi-el chire roma ri Dios.

⁴Pa rox q'ij ri Abraham xutzu' k'a ri akuchi k'o chi yebe-wi y k'a nej k'a xutz'et-wi-q'anej.

⁵K'ari' xubij chike ri rusamajela': Qojiwoyobej kan wawe' y ri bur tik'oje' kan iwik'in. Ri nuk'ajol y yin xqojbe-el richin xtibeqaya' ruq'ij ri Dios; k'ari' xqojtzolin chik pe iwik'in rix, xcha'.

⁶Ri Abraham xuben chire ri ruk'ajol chi xrejqaj-el ri si' ri xtibek'atzin richin niberuporoj ri kamelabel. Y rija' xuk'uaj ri racheq-q'aq' y ri qupibel pa ruq'a', y xebe k'a el.

⁷Y toq e beneq, xch'on-apo ri Isaac chire ri rutata' y xubij: Nata', xcha'. Y ri Abraham xubij: ¿Achike nawajo', nuk'ajol?, xcha'. Y ri Isaac xubij chire: Ri racheq-q'aq' qak'uan, y ri si' chuqa'. ¿Y akuchi k'a k'o-wi ri chikop ri nabeporoj richin ri kamelabel ri niporox jumul?, xcha'.

⁸Y ri Abraham xubij chire: Ja ri Dios xtiya'on-pe ri chikop richin niqaporoj nuk'ajol yin, xcha'. Y kan junan k'a e beneq-el.

⁹Y toq xe'apon akuchi rubin-wi ri Dios chire ri Abraham, rija' xuben-q'anej ri porobel richin ri kamelabel. K'ari' xuya-q'anej ri si' pa ruwi' y xuxim k'a ri ruk'ajol. K'ari' xuya-q'anej pa ruwi' ri porobel y pa ruwi' ri si'.

¹⁰Toq xuchop k'a apo ri qupibel richin nukamisaj ri ruk'ajol,

¹¹jari' toq ri ángel richin ri Jehová xch'on-pe k'a chila' chikaj, y xubij-pe: ¡Abraham! ¡Abraham!, xcha'. Y rija' xubij: Jare' ink'o wawe', wajaw, xcha'.

¹²Y xubij chire: Man takamisaj la ak'ajol y man jun taben chire, y roma man xapoqonaj ta xaya' ri juney ak'ajol pa kamik chuwe, wakami q'alaj chik chinuwech chi rat kan k'o-wi rukiy ri Dios chawech, xcha'.

¹³K'ari' ri Abraham xtzu'un chirij y xutz'et-apo chi k'o jun achij karne'l ri q'atel ruk'a' pa q'ayis; y k'ari' xberuk'ama-pe ri ti chikop ri xtuporoj y jari' xok pa ruk'exel ri ruk'ajol.

¹⁴Y ri Abraham xuya' k'a kan rubi' ri juyu' ri' y xubini'aj: Ja ri Jehová Niya'on ri Nik'atzin. Y xa roma ri' ri winaqi' nikibij: Pa ruwi' ri juyu' ri rubini'an Jehová Niya'on ri K'atzinel.

¹⁵Ri ángel richin ri Jehová xch'on chik k'a pe rik'in ri Abraham k'a chila' chikaj,

¹⁶y xubij: Roma xaben ri xink'utuj chawe richin xajech ta ri juney ak'ajol chuwe, roma ri' kan pa nubi' yin ninya' wi nutzij chawe.

¹⁷Xkatinwurtisaj y xtik'iyer k'a ri awijatzul achi'el ruk'iyal ri ch'umila' ri ek'o chila' chikaj, y achi'el ruk'iyal ri sanayi' ri k'o chuchi' ri palou, y ri awijatzul xke'ichinan kan ri tinamit ri ye'etzelan kichin.

¹⁸Roma xanimaj nutzij, koma k'a ri awijatzul rat xtinya' k'a urtisanik pa kiwi' tzobaj taq winaqi' richin chijun ruwach'ulew, xcha' ri Dios chire.

¹⁹K'ari' ri Abraham xebeqaqa-pe kik'in ri rusamajela' y xebe k'a pa Beerseba y chiri' xek'oje-wi.

²⁰Chirij k'a ronojel re' xapon rutzijol rik'in ri Abraham chirij ri Milcá, ri rixjayil ri Nacor, rach'alal ri Abraham, chi rije' xek'oje' e waqxaqi' kalk'ual: Ri nabey xubini'aj Us y ri ch'aqa' chik xkibini'aj, Buz, Quemuel, Quésed, Hazó, Pildás, Idlaf y Betuel. Re Betuel re' jare' rutata' ri Rebeca. Y ri Quemuel jari' ri rutata' ri Aram.

²⁴Chuqa' ri Nacor xek'oje' ralk'ual rik'in ri ru-concubina*f20* rubini'an Reumá. Jare' k'a ri kalk'ual: Ri Teba, ri Gáham, ri Tahas, y ri Maacá.