Read Kaqchikel Gén 23 Bible Online

Gén 23 - Kaqchikel bible

Gén 23

¹Ri Sara xk'ase' k'a 127 juna' chuwech re ruwach'ulew; y k'ari' xken,

²y xken pa Quiriat-arbá ri wakami nibix Hebrón chire ri k'o pa ruwach'ulew Canaán. Y ri Abraham kan janila xroq'ej y xubisoj.

³Xeri' xyakatej-el y xuya' kan ri rukaminaq richin xbech'on kik'in ri winaqi' hitita, ri ek'o chiri' y kere' xubij chike:

⁴Yin xa man in aj wawe' ta, xa nej kipe-wi, y chi'ikojol rix ink'o-wi wakami. Tibana' utzil chuwe richin tik'ayij juba' wulew, y chiri' xtinmuq-wi ri nukaminaq, xcha' ri Abraham.

⁵Y rije' xkibij chire:

⁶Táta, tamuqu' k'a ri akaminaq chupan ri jul ri akuchi nawajo-wi rat; y kan xtiqaya' k'a chawe ri akuchi nawajo-wi. Roma roj kan qetaman chi rat at jun nimalej tata'al richin ri Dios chiqakojol, xecha' chire.

⁷Ri Abraham xuqasaj-qa-ri' k'a pan ulew chikiwech ri winaqi' hitita ri ek'o chiri'.

⁸Y xubij chike: Wi rix kan nalex ta pan iwánima chi niya' q'ij chuwe richin ninmuq ri nukaminaq chi'ikojol, tibana' utzil tiq'axaj nuch'abel chire ri Efrón, ri ruk'ajol ri Sóhar,

⁹richin nuk'ayij ta chuwe ri ti xoral ri akuchi k'o-wi ri jul ri rubini'an Macpelá, ri k'o chuchi' ri rulew; janipe' na k'a ri nuk'utuj chuwech y tubij chiqawech qonojel; y yin kan xtinya' k'a ri rajel, richin keri' kan xtok wichin yin ri jul ri' y chiri' xkenmuq-wi toq xkeken ri ek'o pa wachoch, xcha' ri Abraham.

¹⁰Y ri Efrón tz'uyul k'a chikikojol ri ruwinaq, ri akuchi yetz'uye-wi ri nima'q taq achi'a' ri chuchi' ri tinamit; y chikiwech k'a konojel ri ek'o chiri', xubij chire ri Abraham:

¹¹Wajaw, yin kan chikiwech k'a konojel re nuwinaq ninbij chi choj keri' ninya' kan chawe ri juba' ulew y chuqa' ri jul ri'. Tamuqu' k'a ri akaminaq chiri', xcha'.

¹²K'ari' xpe ri Abraham xxuke-qa chikikojol ri winaqi' hitita,

¹³y xch'on-apo chire ri Efrón chikiwech konojel winaqi' ri ek'o chiri' y xubij: Tabana' utzil kinawak'axaj y tak'ulu' ri rajel ri ulew ri' richin keri' xtinmuq ri nukaminaq chiri', xcha' ri Abraham.

¹⁴Y ri Efrón xubij chik chire ri Abraham:

¹⁵Tawak'axaj k'a wajaw, ri ulew rajel xaxe lajuj libra saqipueq. Re' xa man jun ok rajel chiqakojol roj. Tamuqu' k'a ri akaminaq chiri', xcha' ri Efrón.

¹⁶Y ri Abraham xqa' chuwech ri rajel y xupej k'a ri lajuj libra saqipueq y xujech chire ri Efrón chikiwech konojel. Y kan tz'aqet k'a ri xuya' chire. Kan achi'el yepajon ri k'ayinela' y ri loq'onela'.

¹⁷Ri rulew k'a ri Efrón k'o k'a pa Macpelá y jare' ri xok kan richin ri Abraham. Y re ulew re' tikil che' chuwech y k'o ri jul chupan y pa relebel-q'ij chire ri Mamré k'o-wi.

¹⁸Y chikiwech k'a konojel ri hitita ri ek'o chiri' chuchi' ri tinamit, y chikiwech ri winaqi' ri ye'el-ye'ok ri pa tinamit, toq ri ulew ri' xok kan pa ruq'a' ri Abraham.

¹⁹Y chirij ronojel re', k'ari' ri Abraham xberumuqu' kan ri rukaminaq chupan ri jul ri k'o pa Macpelá, ri ti xoral ri k'o pa relebel-q'ij chire ri Mamré y wakami nibix chuqa' Hebrón chire, ri k'o chiri' pa ruwach'ulew Canaán.

²⁰Y keri' toq xok k'a kan richin ri Abraham ri ulew ri' y ri jul ri k'o chupan, ri ulew ri xkik'ayij kan ri winaqi' hitita chire, richin chi chiri' xtok jun xoral richin muqbel.