Read Kaqchikel Gén 25 Bible Online

Gén 25 - Kaqchikel bible

Gén 25

¹Ri Abraham xukanoj chik jun rixjayil y re ixoq re' rubini'an Queturá.

²Y xek'oje' chik waqi' kalk'ual y ja k'a kibi' re': Ri Zimrán, ri Jocsán, ri Medán, ri Madián, ri Isbac y ri Súah.

³Y ri Jocsán kitata' ri Sebá y ri Dedán; y rija' xeralk'ualaj k'a ri asureo, ri letuseo, y ri leumeo.

⁴Y ri e ralk'ual ri Madián ja ri Efá, ri Éfer, ri Hanoc, ri Abidá y ri Eldaá. Konojel re' e ral-riy kan ri Queturá.

⁵Jak'a ri Abraham kan xaxe chire ri Isaac xuya-wi kan ronojel ri rubeyomel.

⁶Y chike ri ralk'ual ri kal ri e concubina*f22* xaxe juba' sipanik xuya-el chike y xeruteq-el nej k'a pa relebel-q'ij richin xeruch'er rik'in ri Isaac rokik k'a k'es na rija'.

⁷Ri Abraham xk'ase' k'a el chuwech ri ruwach'ulew, 175 juna'.

⁸Ri Abraham xken k'a roma rurijixinen y keri' k'a xk'olotej-el chuwech ri ruwach'ulew.

⁹Ri Isaac y ri Ismael xkimuq k'a ri kitata' chupan ri jul richin Macpelá, ri k'o chupan ri ojer rulew ri Efrón, ruk'ajol ri Sóar hitita, re ulew re' k'o chuwech ri Mamré.

¹⁰Re ulew re' ruloq'on kan ri Abraham chike ri e rijatzul ri Hit, chiri' k'a xmuq-wi ri Abraham chunaqaj ri Sara ri rixjayil.

¹¹Chirij ri rukamik ri Abraham, ri Dios xuya' urtisanik pa ruwi' ri Isaac ri ruk'ajol y rija' xk'oje' chiri' rik'in ri pozo ri rubini'an Pozo Richin ri kan K'es y ri Yirutz'et.

¹²Jare' ri e rijatzul ri Ismael, ri ralk'ual kan ri Abraham rik'in ri Agar aj-Egipto ri loq'on samajel ri xk'oje' rik'in ri Sara.

¹³Jare' k'a ri kibi' ri e ralk'ual ri Ismael: Ri nimalaxel rubini'an Nebaiot, y ri ch'aqa' chik ja ri Quedar, ri Adbeel, ri Mibsam,

¹⁴ri Mismá, ri Dumá, ri Masá,

¹⁵ri Hadar, ri Temá, ri Jetur, ri Nafís y ri Quedmá.

¹⁶Ja kibi' re' ri e kablajuj ralk'ual ri Ismael, y rik'in re bi'aj re' xetamatej ri kitzobaj y ri akuchi ek'o-wi-qa. Y chikijujunal re jun jay winaqi' re' xk'oje' tata'al pa kiwi'.

¹⁷Y ri Ismael xk'ase' k'a el 137 juna' y xken, y keri' xk'olotej-el chuwech re ruwach'ulew.

¹⁸Ri e rijatzul xek'oje' chupan ri ruwach'ulew ri nitiker-el rik'in ri Havilá ri k'o pa Sur ri k'o chuwech ri Egipto y xe'apon k'a pa ruwach'ulew Asiria, y kan kich'aron k'a ki' kik'in ri ch'aqa' chik kach'alal.

¹⁹Jare' ri rijatzul ri Isaac ri ruk'ajol kan ri Abraham: Ri Abraham xralk'ualaj ri Isaac.

²⁰Ri Isaac k'o chik kawineq rujuna' toq xk'ule' rik'in ri Rebeca, rumi'al ri Betuel, rana' ri Labán; rije' e arameo aj-Padán-aram.

²¹Ri Isaac xuk'utuj k'a chire ri Jehová chi ri rixjayil nik'oje' ta ral roma rija' man alanel ta, y ri Jehová xrak'axaj y ri Rebeca xek'oje' k'a ral.

²²Y ri ak'uala' ri xkebe'alex rik'in rija' e kua'ch y kan janila chik nikiben oyowal, y rija' xubij: ¿Achike roma kere' nuk'uluwachin?, xcha'. Y k'ari' xbe richin xberuk'ulubej ri Jehová.

²³Y ri Jehová xubij chire: E ka'i' nima'q taq tzobaj winaqi' richin ri ruwach'ulew ek'o awik'in, kan man junan ta pe kiwech, ri jun más xtik'oje' ruchuq'a' chuwech ri jun chik, y ri nimalaxel xtiberusamajij ri chaq'laxel, xcha'.

²⁴Toq xtz'aqet ri q'ij richin xe'alex, kan e kua'ch na wi xe'alex rik'in.

²⁵Ri xalex nabey janila rusumal y ri rusumal kan kaqkoj k'a ri nitzu'un, y re ak'ual re' xubini'aj Esaú.*f23*

²⁶K'ari' xalex ri chaq'laxel y kan ruchapon-pe pa ruxtuxil ri Esaú, y roma ri' xubini'aj Jacob.*f24* Y ri Isaac oxk'al k'a rujuna' chiri' toq ri rixjayil xeralaj ri ak'uala' ri'.

²⁷Xek'iy-q'anej ri ak'uala', y ri Esaú xok-q'anej jun achin richin pa juyu', y xok jun jebelej kanonel; y ri Jacob man keri' ta, rija' jun achin ri man niq'ajan ta y niqa' chuwech nik'oje' kan pa rachoch.

²⁸Ri Isaac janila xrajo' ri Esaú, roma yerutej ri taq chikopi' ri nuk'en-pe pa juyu'; jak'a ri Rebeca ja ri Jacob más xrajo'.

²⁹K'o jun q'ij ri Jacob nuben keq kineq' pa pul-ik y ri Esaú xtzolin-pe pa juyu' janila kosineq-pe y rik'in wayjal,

³⁰y xubij chire ri ruchaq': Taya' chuwe la q'utun la yatajin chubanik, roma yiken roma wayjal, xcha'. Y roma ri' Edom chuqa' xbix chire ri Esaú y re' nel chi tzij keq.

³¹Y ri Jacob xubij chire: Ninya' chawe ri q'utun wi ja yin xkinok nimalaxel pan ak'exel richin ninwichinaj kan ri awichin rat, xcha' chire.

³²K'ari' ri Esaú xubij: Yin kan yiken yan roma wayjal; taya-pe ri aq'utun chuwe. ¿Achike ta k'a xtik'atzin-wi chuwe ri xtinwichinaj kan toq yin xa in kamineq chik?, xcha'.

³³Y ri Jacob xubij chire ri runimal: Tajikiba' atzij chinuwech re wakami, xcha'. Y rija' kan keri' xuben, y xuya' q'ij chire ri Jacob chi ja rija' nichinan kan pa ruk'exel.

³⁴Keri' k'a xuben ri Jacob, xuya' k'a kaxlan-wey y ri keq kineq' chire ri rubanon, y ri Esaú jebel xwa', xuk'ya' y xyakatej-el y xbe. Keri' k'a xuben ri Esaú, kan man jun rejqalen xuya' chire chi ja rija' ri nimalaxel.