Read Kaqchikel Gén 27 Bible Online

Gén 27 - Kaqchikel bible

Gén 27

¹Kere' k'a xbanatej toq ri Isaac xrijix yan y man nitzu'un ta chik. Xroyoj k'a ri ruk'ajol Esaú ri nimalaxel y xubij chire: Nuk'ajol yin, xcha' Y rija' xubij: Jare' ink'o wawe', nata', xcha'.

²Y rija' xubij chire: Yin janila chik in ri'j y man wetaman ta achike q'ij yibeken.

³Roma ri' ninwajo' richin yabe pa juyu'. Tak'uaj-el ri rute-ach'ab y ri ach'ab richin nabekanoj jun chikop,

⁴y tabana-pe jun utzilej nuq'utun achi'el ri niqa' chinuwech yin, tak'ama-pe y xtintej. Chirij k'a re' xtinya' kan urtisanik pan awi' rokik k'a in k'es na, xcha' ri Isaac chire.

⁵Jak'a ri Rebeca ruya'on-apo ruxikin toq nich'on ri Isaac rik'in ri Esaú y xbe k'a ri Esaú richin xberukanoj ri chikop ri k'o chi nuk'en-pe chire ri rutata'.

⁶Y ri Rebeca kan xaxe xrak'axaj-el ri', jari' xbech'on rik'in ri Jacob ri ral, y xubij chire: Yin xinwak'axaj toq ri atata' nitzijon rik'in ri animal y xubij chire:

⁷Tabek'ama' jun ti chikop pa juyu', y tabana-pe jun utzilej q'utun chire richin nintej, y kan chuwech ri Jehová xtinya' urtisanik pan awi' rokik k'a in k'es na, xcha' ri atata' chire ri animal.

⁸Wakami k'a wal, tawak'axaj y tanimaj ri nutzij.

⁹Kabiyin pa qejoj kik'in ri kokoj awej, tabek'ama-pe e ka'i' taq tzuntzun ri más e utz y rik'in ri' xtinben-wi ri q'utun ri niqa' chuwech ri atata'.

¹⁰Xtak'uaj k'a apo chire ri atata' richin xtiwa' y pan awi' rat xtuya' wi kan ri urtisanik, rokik k'a k'es na, xcha' ri Rebeca.

¹¹Jak'a ri Jacob xubij chire ri rute': Ri nunimal jun achin ri janila rusumal ruch'akul y yin man keri' ta.

¹²Rik'in juba' ri nata' yiruchop-pe y nretamaj chi xa man in Esaú ta y xtuch'ob chi ninq'ol y pa ruk'exel chi nuya' urtisanik pa nuwi' xa etzelanik xtuya' pa nuwi', xcha' ri Jacob.

¹³Y ri rute' xubij chire: Wal, ri etzelanik pa nuwi' ta k'a yin xtiqaqa-wi. Rat xaxe tanimaj nutzij; kabiyin, ke'abek'ama-pe ri taq chikopi', xcha' chire.

¹⁴K'ari' xbe rija' richin xeberuk'ama-pe y xuya' chire ri rute'. Ri Rebeca xuben ri q'utun achi'el ri niqa' chuwech ri Isaac.

¹⁵K'ari' ri Rebeca xrelesaj k'a pe ri tzieq más jebel ok ri yakel kan pa rachoch richin ri ral nimalaxel, richin xukusaj ri chaq'laxel.

¹⁶Y rik'in ri rusale'y taq tzuntzun xutz'apej-el rij ri ruq'a', ri ruqul y ri akuchi maneq rusumal ri Jacob.

¹⁷K'ari' xujech-el pa ruq'a' ri Jacob ri q'utun y ri kaxlan-wey ri xuben.

¹⁸K'ari' ri Jacob xbe rik'in ri rutata' y xubij chire: Táta, xcha'. Y ri Isaac xubij chire: Jare' ink'o wawe'. ¿At achike k'a chike ri nuk'ajol?, xcha'.

¹⁹Y ri Jacob xubij chire ri rutata': Ja yin ri Esaú ri nabey ak'ajol. Jare' xinben-pe achi'el ri xabij chuwe. Kayakatej-q'anej y katz'uye' richin natej ri q'utun ri xinben-pe chire ri ti chikop ri xinchop-pe y xeri' naya' k'a kan urtisanik pa nuwi', xcha' ri Jacob.

²⁰K'ari' ri Isaac xubij chire ri ruk'ajol: ¿Achi'el toq xawil yan pe chi'anin?, xcha'. Y rija' xubij: Roma ri Jehová ri qa-Dios xuben chuwe richin chi'anin xinwil-pe, xcha'.

²¹Ri Isaac xubij chire ri Jacob: Kajel-pe kere' y katinchapa' na k'a, nuk'ajol, richin ninnabej wi kan ja rat at nuk'ajol Esaú, xcha' chire.

²²Xjel k'a apo ri Jacob rik'in ri rutata', y ri Isaac xuchop y xubij chire: Ri ach'abel achi'el ruch'abel ri Jacob ninwak'axaj yin, jak'a ri aq'a' achi'el ruq'a' ri Esaú, xcha'.

²³Man xretamaj ta roma ri ruq'a' janila rusumal achi'el ri ruq'a' ri Esaú y roma ri' xuya' k'a urtisanik pa ruwi'.

²⁴Y xubij chik jun bey chire: ¿Kan ja k'a rat at nuk'ajol Esaú?, xcha'. Y ri Jacob xubij: Ja', ja yin.

²⁵Xubij chuqa' ri Isaac chire: Taya-pe ri utzilej q'utun ri xaben-pe chire ri ti chikop ri xawil-pe pa juyu' richin yiwa' y xtinya' urtisanik pan awi', xcha'. K'ari' xuya-apo ri ruq'utun y ri vino richin xuqum y keri' k'a xwa-xuk'ya',

²⁶y ri Isaac xubij chire: Kajel-pe y kinatz'ubaj, nuk'ajol yin, xcha' chire.

²⁷Xjel k'a apo ri Jacob richin xutz'ubaj, y ri Isaac xuseq ri ruxla' ri rutziaq, k'ari' ri Isaac xrurtisaj y kere' xubij chire: Jare' ri ruxla' ri rutziaq ri nuk'ajol y kan jubul, jubul k'a ri ruxla' achi'el ri ruxla' ri juyu' ri urtisan roma ri Jehová;

²⁸Kan ja ta k'a ri Dios xtiya'on-pe ri raxq'ab chila' chikaj pan awi', y kan ta k'a xtuben chi ri atiko'n xtiwachin pa ruk'iyal chuwech re ruwach'ulew; kan xtak'ul ta k'a pa ruk'iyal ri trigo y ri vino.

²⁹Y xkatkisamajij k'a konojel ri tinamit. y ri tzobaj winaqi' richin nima'q taq ruwach'ulew xkexuke' k'a chawech; Jak'a rat ri xkak'oje' pa kiwi' ri awach'alal, y kan xtikiqasaj k'a ki' chawech konojel ri e ral ri ate'. Xtiqaqa etzelanik pa kiwi' ri xke'etzelan awichin; y jebel ruwa-kiq'ij ri xke'ajowan awichin, xcha'.

³⁰Xtane' yan ri Isaac richin nuya' urtisanik pa ruwi' ri Jacob y kan k'ari' nel-pe rija' rik'in ri rutata', jari' toq xtzolin-pe ri Esaú pa kanonik.

³¹Xuben-qa ri q'utun y xuk'en-pe chire ri rutata' y xubij chire: Kayakatej k'a táta. Tatija' k'a ri q'utun re xinben-pe chire re ti chikop ri xink'en-pe pa juyu' y k'ari' xtaya' urtisanik pa nuwi', xcha'.

³²K'ari' ri rutata' xubij chire: ¿At achike k'a rat? Y rija' xubij: Ja yin k'a ri Esaú ri ak'ajol nimalaxel, xcha'.

³³Y ri Isaac janila xumey-qa y janila xbaybot y xubij: ¿Achike k'a ri xpe wawe' y ruk'amon-pe q'utun chuwe ri rubanon-pe rik'in ri chikop richin pa juyu' y xuya' chuwe y yin xintej ronojel toq man jani kape rat, y xinya-el urtisanik pa ruwi', y re urtisanik re' kan xk'oje' kan pa ruwi'?, xcha'.

³⁴Toq ri Esaú xrak'axaj ri ruch'abel ri rutata', rija' kan janila xoq' roma ri q'axo'n ri' y xubij chire ri rutata': Taya' urtisanik pa nuwi' yin chuqa', xcha'.

³⁵Y ri Isaac xubij chire: ¡Xa ja ajk'a ri achaq' ri xpe wik'in y xiruq'ol kan, y ja rija' ri xuk'uan-el ri urtisanik ri xa awichin ta rat!, xcha'.

³⁶Y ri Esaú xubij: Xa roma ajk'a ri' xkibij Jacob chire, roma kan q'olonel-wi, roma ka'i' yan mul kiruq'ol, nabey xuben chuwe chi ja rija' xok kan nimalaxel pa nuk'exel y wakami xreleq'aj ri urtisanik ri xa ja ta yin xik'ulu kan. Y xubij chik k'a chire ri rutata': ¿Maneq ta chik juba' urtisanik richin naya' chuwe yin?, xcha'.

³⁷Y ri Isaac xubij chire ri ruk'ajol: Yin xinben yan k'a chire ri Jacob chi ja rija' xtik'oje' pan awi' rat y xinbij chi konojel ri rach'alal xke'ok rusamajela' y kan xkeruxim pa samaj, y xinbij chi xtuk'ul ta k'a pa ruk'iyal ri trigo y ri vino. ¿Achike chik ta k'a xtinben pan awi' rat, nuk'ajol yin?, xcha'.

³⁸Y ri Esaú kan xutej ruq'ij chuk'utuxik chire ri rutata' y xubij chire: ¿Kan man jun chik urtisanik xk'oje' kan awik'in? ¡Taya' urtisanik chuqa' pa nuwi' yin!, xcha'. Y rija' xsik'in-q'anej chi oq'ej jun bey chik.

³⁹K'ari' ri Isaac xubij chire ri Esaú: Xkak'oje' nej chire ri ruwach'ulew ri niwachin, chuqa' nej xkak'oje-wi chire ri ruwach'ulew ri akuchi niqaqa raxq'ab y job richin chila' chikaj.

⁴⁰Rik'in k'a ri a-espada xtato-awi' y xtawilij k'a ri achaq' y xtibanatej k'a chi toq xtik'oje' awuchuq'a' xtawelesaj-awi' chuxe' ri ruchuq'a' ri achaq', xcha'.

⁴¹Ri Esaú kan xretzelaj k'a ri ruchaq' roma ri urtisanik ri xya'ox chire y xubij k'a: K'o na jun q'ij ri nata' xtiken; k'ari' xtinbenkamisaj ri nuchaq' toq xtik'o-el ri qabis, xcha' ri Esaú.

⁴²Xbetzijox k'a chire ri Rebeca ri ruch'abel ri nimalaxel ral; k'ari' rija' xuteq royoxik ri chaq'laxel y xubij chire: Ri animal xukuquba-qa ruk'u'x roma xubij-qa chi yaberukamisaj.

⁴³Wakami k'a wal, tawak'axaj ri nuch'abel y tanimaj nutzij. Katanimej k'a el, y kabiyin pa rachoch ri nuxibal Labán chiri' pan Harán, y tawewaj-awi' chiri'.

⁴⁴Kak'oje' k'a chiri' rokik nik'o royowal ri animal,

⁴⁵k'a xtik'is na royowal rija' chawij, tumestaj na k'a ronojel ri xaben chire; k'ari' xtinteq awoyoxik richin yatzolin-pe roma man ninwajo' ta chi kan chi ix ka'i' yixken pa jun q'ij, xcha'.

⁴⁶Y jun q'ij ri Rebeca xapon rik'in ri rachijil y xubij chire: Janila xik'o yan nuk'u'x kik'in ri ixoqi' hitita la e rixjayil ri Esaú. Y wi ri Jacob xtik'ule' chik rik'in jun xten hitita achi'el ri ek'o wawe' pa Canaán, más utz ta wi yiken, xcha' ri Rebeca.