Read Kaqchikel Gén 28 Bible Online

Gén 28 - Kaqchikel bible

Gén 28

¹K'ari' ri Isaac xuteq royoxik ri Jacob xch'on-el rik'in y xubij chire: Tabana' utzil man kak'ule' rik'in jun xten aj wawe' pa Canaán.

²Xa kabiyin k'a chupan ri ruwach'ulew rubini'an Padán-aram pa rachoch ri amama' Betuel, rutata' ri ate', y kak'ule' rik'in jun rumi'al ri Labán ruxibal ri ate'.

³Y ri Dios ri nitikir nuben ronojel, jari' ri xturtisan awichin y xtuben k'a chi xkewinaqir ri awijatzul y koma ri awijatzul kan janila chi tinamit xke'el awik'in.

⁴Chawe k'a rat y chuqa' chike ri awijatzul xtuya-wi ri urtisanik ri rusujun kan chire ri Abraham, richin xtok awichin re ruwach'ulew akuchi ojk'o-wi, roma ri Dios kan keri' rusujun kan chire ri Abraham, xcha' ri Isaac chire ri Jacob.

⁵Keri' xuben ri Isaac richin xuteq-el ri ruk'ajol k'a pa Padán-aram pa rachoch ri Labán ruk'ajol ri Betuel arameo, ruxibal ri Rebeca, ri kite' ri Jacob y ri Esaú.

⁶Ri Esaú xutz'et toq xban ch'owen rik'in ri Jacob y xtaq-el k'a pa Padán-aram, richin chi chiri' tik'ule-wi y xrak'axaj toq xbix chire: Man takanoj awixjayil chikikojol re xtani' aj-Canaán, xuche'ex.

⁷Y ri Jacob kan xunimaj kitzij ri rute-rutata', roma ri' xbe k'a pa Padán-aram.

⁸Jari' toq ri Esaú xq'ax chuwech chi ri rutata' man ajk'a yeqa' ta chuwech ri ixoqi' aj-Canaán;

⁹y roma ri' rija' xbe rik'in ri Ismael y xk'ule' rik'in jun rumi'al rubini'an Mahalat, rana' ri Nebaiot y rije' e rumam kan ri Abraham, stape' ri Esaú xa k'ulan chik kik'in e ka'i' ixoqi' aj-Canaán.

¹⁰Xel k'a el ri Jacob chiri' pa Beerseba, xuchop-el ri bey ri nibe pan Harán.

¹¹Y xapon k'a chupan jun tinamit y chiri' xk'oje-wi kan roma xokoq'a' yan qa. Xeri' xuchop jun abej ri k'o chiri' y xuch'akatbej richin xwer-qa.

¹²Y xrachik'aj k'a chi k'o k'a jun q'a'n ri eleneq-el pan ulew y napon k'a chuchi' ri kaj y ri ángel richin ri Dios pa cholaj yexule-yejote' chupan ri q'a'n ri'.

¹³Y ri Jehová kan k'o el más pa jotol chire y nubij: Ja yin Jehová ri ki-Dios ri Abraham ri amama', in ru-Dios chuqa' ri Isaac, la ulew akuchi at kotz'ol-wi xtinya' chawe y chuqa' chike ri awijatzul.

¹⁴Roma ri awijatzul ri xkebek'oje' achi'el ri poqolaj ri kan man ajlatel ta y xtikinojisaj ri ruwach'ulew, roma xkebek'oje' pa xaman, pa xokon, pa relebel-q'ij y pa qajbel-q'ij. Y awoma rat y koma ri awijatzul xtikik'ul urtisanik ri winaqi' ri pa taq tzobaj kik'uan-ki', chi kach'alal-ki', ri junan kich'abel y junan ri kiruwach'ulew.

¹⁵Jare' ink'o awik'in y xabakuchi xkabe-wi in beneq awik'in, y xkatink'en chik pe jun bey chupan re ruwach'ulew re', man xkatinya' ta kan, k'a toq xtinben awik'in ri xinbij chawe, xcha' ri Dios chire.

¹⁶K'ari' xuna' ruwech ri Jacob y xubij: Kan qitzij na wi chi ri Jehová k'o ri akuchi ri xik'oje-wi kan y yin kan man wetaman ta k'a, xcha'.

¹⁷Y janila xuxibij-ri' y xubij: Re akuchi xik'oje-wi kan, kan k'o-wi rukiy roma jare' ri rachoch ri Dios y ri ruchi' ri kaj, xcha'.

¹⁸Nimaq'a' yan xyakatej y xuchop ri abej ri xuch'akatbej-qa, xupaba-q'anej y xuq'ej kan aceite chirij richin jun retal.

¹⁹Y xubij Betel*f26* chire ri tinamit ri', stape' ri pa nabey rubini'an Luz ri tinamit ri'.

²⁰Y ri Jacob kan xuben k'a ri xubij: Wi rat Dios xkabe wik'in y xkinachajij chupan ri nuk'aslen y wi xtaya' nuway richin yiwa' y xtaya' nutziaq richin ninkusaj,

²¹y wi xtaya' q'ij chuwe richin yitzolej rik'in uxlanibel-k'u'x pa rachoch ri nata', kan ja rat Jehová ri xkatok nu-Dios.

²²Y re abej re' xtinya' kan richin retal, xtok k'a awachoch rat. Y ronojel ri xtaya' chuwe kan xtinch'er kan jun chire ri lajuj, xcha' ri Jacob.