Read Kaqchikel Gén 29 Bible Online

Gén 29 - Kaqchikel bible

Gén 29

¹Xuchop chik k'a el bey ri Jacob y xapon pa kiruwach'ulew ri ek'o pa relebel-q'ij.

²Y xutz'et k'a apo jun pozo pa juyu' y chiri' ek'o e oxi' tzobaj karne'l e uxlawineq, roma chupan ri pozo ri' ye'uk'ya-wi konojel awej. Y ri pozo ri' rik'in jun nim abej tz'apel kan ruwi'.

³Chiri' nikimol-wi-ki' konojel tzobaj karne'l y toq xkimol yan ki', konojel ri yuq'unela' nikelesaj-el ri rutz'apebal-ruwi' y toq ye'uk'ya-el nitz'apex chik kan jun bey ruwi' ri pozo.

⁴Y ri Jacob xubij k'a chike ri yuq'unela': ¿Ix aj akuchi k'a rix?, xcha'. Y rije' xkibij: Roj oj aj wawe' pa tinamit Harán, xecha'.

⁵K'ari' xubij chik chike: ¿Iwetaman ruwech ri Labán ruk'ajol kan ri Nacor?, xcha'. Y rije' xkibij: Ja', qetaman ruwech, xecha'.

⁶Y rija' xubij chik apo chike: ¿utz kami ruwech?, xcha'. Y ri yuq'unela' xkibij, utz ruwech. Ja jun rumi'al, la peteneq kik'in rukarne'l y rubini'an Raquel, xecha' chire.

⁷Y ri Jacob xubij chike: K'a janila ruloman richin ye'ikusaj yan kan la awej pa qejoj. ¿Achike roma man niya' ta chik juba' kiya', y ye'ik'uaj chik el juba' richin ye'iyuq'uj?, xcha' chike.

⁸Y rije' xkibij: Man yojtikir ta, roma k'o chi xtikimol na ki' konojel tzobaj awej, richin junan ye'uk'ya' y ri yuq'unela' nikelesaj ri rutz'apebal-ruwi' ri pozo, xecha'.

⁹Rokik ri Jacob nitzijon kik'in ri yuq'unela', jari' toq xapon ri Raquel e ruk'uan-el rukarne'l ri rutata', roma kan ja rija' ri yuq'unel.

¹⁰Toq ri Jacob xutz'et chi ri Raquel ruk'uan-el ri rukarne'l junanin xbe richin xberelesaj ri tz'apebel-ruwi' ri pozo y xuya' kiya' ri karne'l.

¹¹Ri Jacob xuq'ejela' k'a ri Raquel y xutz'ubaj, k'ari' janila xoq'.

¹²Y xubij chire: Yin in ral ri Rebeca rana' ri atata', xcha'. Y ri Raquel junanin xbe richin xberuya' rutzijol chire ri rutata'.

¹³Toq ri Labán xrak'axaj chi xapon ri ruch'utik'ajol, junanin xberuk'ulu', xuq'etej y xutz'ubaj y xuk'uaj pa rachoch. Y ri Jacob xutzijoj chire ri Labán ronojel ri xuk'uluwachij.

¹⁴Y ri Labán xubij chire: Roj oj ka'i' kan junan qabanik, q'alaj chi kan qach'alal-qi' y junan qakik'el, xcha'. Y ri Jacob xk'oje' kik'in jun ik'.

¹⁵K'ari' ri Labán xubij chire: Man ruk'amon ta yinawilij chaq keri', stape' at nuch'utik'ajol; tabij chuwe janipe' nawajo' nach'ek, xcha' chire.

¹⁶Ri Labán ek'o e ka'i' rumi'al: Ri nimalaxel rubini'an Lea, y ri chaq'laxel rubini'an Raquel.

¹⁷Y ri Lea kan man junan ta k'a rik'in ri Raquel, roma ri Lea kan e jun wi ri runaq' taq ruwech y ri Raquel chijun ri rubanik jebejoj ok.

¹⁸Y ri Jacob kan xbe ránima chirij ri Raquel roma janila jebel ok y xubij chire ri Labán: Xkatinwilij k'a wuqu' juna' roma la chaq'laxel ami'al, xcha'.

¹⁹Y ri Labán xubij: Más utz ninya' chawe rat pa ruk'exel ninya' chire jun chik. Kak'oje' k'a wawe' qik'in, xcha'.

²⁰Y keri' ri Jacob xsamej k'a wuqu' juna' roma ri Raquel, jak'a chuwech rija' man k'iy ta juna' xsamej, roma janila nrajo'.

²¹K'ari' ri Jacob xubij chire ri Labán ri ruch'utitata': Xtz'aqet yan ri juna' richin xisamej awik'in. Taya' k'a chuwe ri Raquel richin yik'ule' rik'in, xcha'.

²²Y ri Labán xerumol k'a konojel ri winaqi' ri ek'o chupan ri tinamit ri' y xuben jun nimaq'ij roma ri k'ulubik.

²³Y xbanatej k'a chi chupan ri aq'a' ri', ri Labán ja ri Lea, ri rumi'al nimalaxel ri xujech-el chire ri Jacob; y ri Jacob kan xk'oje' rik'in.

²⁴Y ri Labán xusipaj k'a ri rusamajel rubini'an Zilpá chire ri Lea richin nrilij.

²⁵Toq xseqer-pe jari' toq xunabej ri Jacob chi xa rik'in ajk'a ri Lea xk'oje-wi, y k'ari' xubij chire ri Labán: ¿Achike k'a ri xaben chuwe? Yin xatinwilij roma ri Raquel. ¿Achike roma xinaq'ol?, xcha'.

²⁶K'ari' ri Labán xubij chire: Wawe' pa qatinamit roj, kan ja ri nimalaxel k'o chi nik'ule' nabey y man ja ta ri chaq'laxel nik'ule' nabey chuwech ri nimalaxel.

²⁷Tak'isa' re wuqu' q'ij rik'in ri Lea y xtinya' chik chawe ri Raquel, xaxe k'o chi xkinawilij na wuqu' chik juna', xcha' ri Labán chire.

²⁸Keri' k'a xuben ri Jacob y toq xtz'aqet ri wuqu' q'ij tik'oje' rik'in ri Lea, ri Labán xuya-el ri Raquel chire richin xok chuqa' rixjayil.

²⁹Y ri Labán chuqa' xusipaj k'a ri rusamajel rubini'an Bilhá chire ri Raquel richin nrilij.

³⁰Y ri Jacob xk'oje' rik'in ri Raquel y kan más k'a xrajo' chuwech ri Lea, stape' xrilij na ri Labán wuqu' chik juna'.

³¹Y ri Jehová xutz'et chi ri Lea man kan ta chik najowex, roma ri' xuben chire chi yek'oje' ral; jak'a ri Raquel man alanel ta.

³²Y ri Lea kan xyawej k'a kan chirij ak'ual y toq xk'oje' ri ak'ual xubini'aj Rubén. Y re bi'aj re' nel chi tzij titz'eta'. Y chuqa' xubij: Ri Jehová xutz'et chi yin janila xibison, y roma ri' xk'oje' re ti wal re', y wakami kan xkinajowex roma ri wachijil, xcha'.

³³Y rija' xyawej chik kan jun bey y toq xk'oje' ri ak'ual xubini'aj Simeón. Y re bi'aj re' nel chi tzij nrak'axaj, y chuqa' xubij: Ri Jehová kan xirak'axaj chi yin man kan ta yinajowex. Roma ri' xuya' chik pe jun ti wal, xcha'.

³⁴Y ri Lea xyawej chik k'a kan jun bey y toq xk'oje' ri ak'ual xubini'aj Leví. Y re bi'aj re' nel chi tzij naqaj. Y chuqa' xubij: Ri wachijil kan más k'a xtijel-pe wik'in roma xe'alex yan e oxi' ralk'ual wik'in, xcha'

³⁵Y toq ri Lea xyawej pa rukaj mul, ri ak'ual ri xalex xubini'aj Judá. Y re bi'aj re' nel chi tzij xtinya' ruq'ij. Y chuqa' xubij: Wakami xtinya' ruq'ij ri Jehová, xcha'. Y rija' xtane' chi alanik.