Read Kaqchikel Gén 31 Bible Online

Gén 31 - Kaqchikel bible

Gén 31

¹Y ri Jacob xrak'axaj k'a ri nikibila' ri ralk'ual ri Labán, y kere' k'a nikibij: Ri Jacob xumej ri rubeyomel ri qatata'. Y roma ri' xbeyomer-q'anej rija', yecha'.

²Y ri Jacob xutz'et chi ri Labán man ja ta chik achi'el ri rubanon-pe y chuqa' xujel runa'oj rik'in.

³Y ri Jehová xch'on k'a rik'in ri Jacob y xubij chire: Más utz chi yatzolin pa kiruwach'ulew ri awati't-amama' ri akuchi ek'o-wi ri awach'alal y yin kan xkibe awik'in, xcha' chire.

⁴Y ri Jacob k'o k'a pa juyu' yeruyuq'uj ri rawej y jari' toq xuteq koyoxik ri Raquel y ri Lea ri e rixjayil.

⁵Y xubij chike: Yin nintz'et chi ri itata' xujel runa'oj y man junan ta chik rik'in ri rubanon kan, jak'a ri ru-Dios ri nata' xa man in rumalin ta kan, kan k'o-wi-pe wik'in.

⁶Rix kan iwetaman k'a chi yin xinwilij-pe ri itata' rik'in ronojel wuchuq'a'.

⁷Y man rik'in ri' ri itata' janila k'iy mul kiruq'ol. Lajuj yan mul tujel ri wajel. Jak'a ri Dios man ruya'on ta q'ij chire richin nuben itzel chuwe.

⁸Y ri itata' kere' k'a nubij chuwe: Yatintoj rik'in re taq awej ri e seq y q'eq kij, nicha' chuwe, kan jari' toq konojel ri ixoqi' taq awej ye'alex taq kal seq y q'eq kij. Y toq nubij chik chuwe: Yatintoj rik'in re taq awej ri xilon q'eq kij. Jari' toq ye'alex más taq awej xilon q'eq kij.

⁹Keri' k'a ri Dios xerelesaj ri rawej ri itata' y xeruya' chuwe yin.

¹⁰Y chupan k'a ri q'ij toq ri chikopi' ye'etz'an, jari' toq yin xinwachik'aj y xintz'et k'a chupan ri wachik' chi ri achija' taq tzuntzun ri yek'oje' kik'in ri ixoqi' taq tzuntzun, k'o seq y q'eq chikij, y chuqa' taq e xilon q'eq.

¹¹Jari' toq ri ángel richin ri Dios xch'on wik'in ri pa wachik' y xubij: Jacob, xcha'. Y yin xinbij: Jare' ink'o wawe', xicha'.

¹²Y chuqa' xubij: Tatz'eta' jebel konojel ri achija' ri ye'etz'an kik'in ri ixoqi' taq tzuntzun kan ruyon k'a xilon q'eq kij, seq y q'eq kij. Roma yin kan nutz'eton ronojel ri rubanon chawe ri Labán.

¹³Ja yin ri in Dios richin Betel akuchi xaya-wi kan aceite pa ruwi' ri abej y akuchi xajikiba-wi ri ach'abel chinuwech, wakami kayakatej k'a y katel-el chupan re ruwach'ulew re'. Katzolin akuchi xatalex-wi, xcha' chuwe, xcha'.

¹⁴Ri Raquel y ri Lea xkibij k'a chire ri Jacob: Ri qatata' xa man jun chik k'o kan pa ruq'a' richin chi niqichinaj ta kan roj.

¹⁵Xa man oj rumi'al ta rubanon chiqe y xojruk'ayij chawe rat y kan xuk'is yan ronojel ri qajel.

¹⁶Roma ronojel ri rubeyomel ri qatata', xa xelesex yan chire roma ri Dios y xok k'a kan qichin roj y kichin ri qal. Wakami k'a tabana' ronojel ri nubij ri Dios chawe, xecha' ri rixjayilal chire.

¹⁷Chirij ronojel re', ri Jacob kan jari' xuben chi nibe, xeruch'okoba-el ri rixjayilal y ri e ralk'ual chikij ri camello.

¹⁸Xeruk'uaj chuqa' konojel ri rawej y ronojel ri k'o rik'in, ri ruch'akon chiri' pa Padán-aram toq xsamej rik'in ri Labán, y jari' nitzolin k'a rik'in ri Isaac, ri rutata', k'a pa ruwach'ulew Canaán.

¹⁹Jak'a ri Labán xa xberusokaj kisumal ri rukarne'l. Roma ri' ri Raquel xtikir xereleq'aj-el ri wachibel ri yek'atzin chire ri rutata' richin nuya' kiq'ij.

²⁰Ri Jacob xuq'ol k'a kan ri Labán, ri arameo, roma man xubij ta kan chire chi nibe.

²¹Xanimej k'a pe rik'in ronojel ri k'o rik'in y xuq'axaj-pe ri raqen-ya' Éufrates y choj xbe chupan ri bey ri nibe-el pa ruwa-taq'aj richin Galaad, ri k'o chuwi' taq juyu'.

²²Pa rox q'ij xbeya' k'a rutzijol chire ri Labán chi ri Jacob xanimej-el.

²³K'ari' ri Labán xerumol-el ri rach'alal richin xbekiq'i' ri Jacob, xebiyin k'a wuqu' q'ij y xeberuq'i' k'a pa taq juyu' richin Galaad.

²⁴Jak'a ri Dios xch'on rik'in ri Labán, ri arameo, pa rachik' chupan ri aq'a' ri'. Y xubij chire: Tawak'axaj, man kabech'on rik'in ri Jacob rik'in oyowal, xcha'.

²⁵Ri Labán xeruq'i' k'a ri Jacob akuchi kipabalon-q'anej ri taq kachoch ri banon rik'in tzieq y chiri' pa ruwa-taq'aj richin Galaad ri k'o el chuwi' taq juyu', chiri' xek'oje-wi-qa rik'in ri rach'alal.

²⁶Y ri Labán xubij chire ri Jacob: ¿Achike roma xinaq'ol kan, y xe'ak'en-pe ri numi'al, xaben-pe chike achi'el ri ixoqi' ri yechap-pe pa labal?

²⁷¿Achike roma xawewaj-pe-awi', xatanimej-pe y xinaq'ol kan? Roma xa ta xaya' kan rutzijol chuwe, yin xatinjech ta pe rik'in kikoten y xqaben ta jun nimaq'ij rik'in ronojel ruwech q'ojom.

²⁸Ni man xaya' ta q'ij richin xentz'ubaj ta pe ri numi'al y ri taq numam; achi'el xa ta maneq ana'oj richin kere' xaben-pe.

²⁹Yin kan k'o nuq'a' pan iwi' richin chi ninben itzel chiwe chi'iwonojel. Jak'a chupan re aq'a' re xq'ax kan, ri Dios richin ri atata' xch'on wik'in y xubij chuwe: Man kabech'on rik'in ri Jacob chi oyowal, xcha'.

³⁰Utz ri' chi nawajo' yatzolin kik'in ri ate-atata'. ¿Jak'a achike roma xe'aweleq'aj-pe ri nu-dios?, xcha' ri Labán chire ri Jacob.

³¹Y ri Jacob xubij chire ri Labán: Yin xinel-pe roma xinxibij-wi' y xinch'ob chi rik'in juba' ye'ak'en kan ri ami'al chinuwech, xcha'.

³²Y ri Jacob man retaman ta k'a chi ja ri Raquel eleq'ayon-pe ri ru-dios y roma ri' xubij: Wi k'o chiqakojol ri xeleq'an-pe ri a-dios, kan tikamisex k'a chikiwech re qach'alal re ek'o wawe'. Tach'ara-el ri awichin rat ri qak'amon-pe y tak'uaj-el, xcha' ri Jacob.

³³Y ri Labán, pa rachoch k'a ri Jacob xok-wi-apo nabey chi kikanoxik ri ru-dios; xel-pe chiri' xok-apo pa kachoch ri Bilhá y ri Zilpá y man jun xril-pe chiri', xok-apo pa rachoch ri Lea y roma kan man jun chuqa' xril-pe chiri' k'ari' xok-apo pa rachoch ri Raquel.

³⁴Y jak'a ri Raquel ri e eleq'ayon-pe ri ru-dios ri rutata' y e rewan k'a chuxe' ri ruxalma ri ru-camello y rija' ch'okol pa ruwi'; rokik ri rutata' nikurul pa rachoch y man jun xril chiri'.

³⁵Y jari' toq rija' xubij chire ri rutata': Man tipe awoyowal chuwe táta, roma man yitikir ta yiyakatej-q'anej chawech roma xa janila in yawa' rik'in ri yabil ri nikik'owisaj konojel ixoqi' ronojel ik', xcha'. Y keri' toq ri Labán xukanola' ri ru-dios y man jun xril.

³⁶Y ri Jacob janila xyakatej royowal roma ri', y xuch'ojij chire ri Labán rik'in re ch'abel re': ¿Achike numak xinben chawech, richin kan xinatzeqelibej-pe?

³⁷Y stape' xakanoj yan chukojol ronojel ri k'o wik'in, ¿k'o kami xawil-el ri kan richin pan awachoch rat? Wi keri' taya-pe wawe' chikiwech ri wach'alal yin y chikiwech ri awach'alal rat, richin keri' tikiq'ata-tzij pa qawi' achike k'o rumak chiqakojol roj oj ka'i'.

³⁸Ri kawineq juna' ri xisamej awik'in, man jun chike ri akarne'l, ni man jun chike ri atzuntzun ri xkiben ta tzaqonik, y chuqa' ni ta jun bey xintej ta jun chike ri achija' taq akarne'l o atzuntzun.

³⁹Ronojel awawej ri yekamisex kan koma ri k'uxunela' taq chikopi', xinya-apo kik'exel, roma rat kan jantape' xe'ach'ojij chuwe, stape' xbanatej paq'ij o chaq'a'.

⁴⁰Ri paq'ij xintej poqon roma janila k'aten y ri chi'aq'a' xintej poqon roma ri tew y kan xel k'a nuwaran.

⁴¹Keri' nubanon-pe kawineq juna' ri ink'o-pe chupan ri awachoch, kajlajuj juna' xatinwilij koma ri ami'al y waqi' juna' in samajineq-pe awik'in richin xinch'ek juba' taq wawej, ¿y jampe' man ta xajel wajel?

⁴²Y xa man ta k'o ri Dios richin ri Abraham wik'in, ri ru-Dios chuqa' ri nata' Isaac, ri kan jantape' xk'oje' rukiy chuwech, xa choj ta keri' xinateq-pe, y man jun ta xaya-pe chuwe. Jak'a ri Dios xutz'et chi janila xintej poqon awik'in y janila xisamej, roma ri' xch'on awik'in ri chaq'a' chi man kach'on wik'in chi oyowal, xcha' ri Jacob chire ri Labán.

⁴³K'ari' ri Labán xubij chire ri Jacob: Re ixoqi' re' kan e numi'al wi yin, y re ak'uala' re' kan e numam wi yin, chuqa' re awej re' kan e wichin wi yin. Jak'a xa man jun yitikir ninben richin chi yek'oje' ta chik kan wik'in re numi'al y re numam.

⁴⁴Roma ri' tiqabana' jun jikibel-tzij chiqakojol roj oj ka'i', y re' xtik'atzin richin q'alajirisabel richin ri tununri'il, xcha' ri Labán.

⁴⁵K'ari' ri Jacob xberuk'ama-pe jun yuquyik abej y xutik ri chiri' richin xok jun retal.

⁴⁶Y rija' xubij chuqa' chike ri achi'a' ri kan e beneq rik'in: Timolo-pe ruchi' la abej y xa jun tibana' chire re wawe', xcha'. Y rije' xkimol k'a ruchi' ri abej richin xkiben jun molaj chire, y chiri' xewa-wi chunaqaj ri molaj abej ri'.

⁴⁷Ri Labán xuya' k'a rubi' ri akuchi ek'o-wi-qa, xubij k'a Jegar Sahaduta chire, jun bi'aj richin pa ruch'abel rija'; y ri Jacob xubij Galaad chire pa ruch'abel rija'. Re ka'i' bi'aj re' ek'o pa ch'abel hebreo y arameo y ye'el chi tzij ri abej ri yeq'alajirisan ri xbanatej.

⁴⁸Y ri Labán xubij chik jun bey: Re molaj abej re' jare' ri xkeq'alajirisan ri xbanatej chiqakojol roj oj ka'i', xcha'. Y roma ri' ri chiri' xubini'aj kan Galaad k'a re wakami.

⁴⁹Y chuqa' ri chiri' xubini'aj kan Mispá, roma ri Labán xubij: Kan ja ta k'a ri Jehová xtitz'eton qichin toq man xtiqatz'et ta chik qi'.

⁵⁰Wi k'o jun q'ij xtaben poqon chike ri numi'al o wi k'o ta jun q'ij xke'akanoj ch'aqa' chik ixoqi', stape' man jun wineq xkatz'eton, kan ja ri Dios ri xtitz'eton awichin, xcha'.

⁵¹Y ri Labán xch'on chik jun bey y xubij: Re molaj abej re' jare' ri retal ri xtik'oje' kan qoma roj oj ka'i'.

⁵²Re molaj abej re' y ri jun abej ri xatik kan rat, jare' xtiq'alajirisan chi ni ta rat man xtaq'axaj ta la abej la xapaba-q'anej richin naben itzel chuwe yin y ni ta yin man xtinq'axaj ta re molaj abej re' richin xtaben itzel chuwe.

⁵³Ja ri ki-Dios ri amama' ri Abraham y ri Nacor xtiq'aton-tzij pa qawi' roj oj ka'i', xcha' ri Labán. Y ri Jacob xujikiba-rutzij chuwech ri ki-Dios ri rutata' y ru-Dios chuqa' rija'.

⁵⁴Ri Jacob xerukamisaj awej chiri' richin xuben kamelabel chiri' pa ruwi' jun juyu' y xeroyoj k'a ri Labán y ri ruwinaq richin xkitej kiway junan, y chiri' xkiq'axaj-wi ri aq'a' ri'.

⁵⁵Ri Labán nimaq'a' yan xyakatej y xerutz'ubaj kan ri rumam y ri rumi'al y xuya' kan urtisanik pa kiwi' y k'ari' xtzolin-pe akuchi k'o-wi ri rachoch.