Read Kaqchikel Gén 33 Bible Online

Gén 33 - Kaqchikel bible

Gén 33

¹Toq ri Jacob xutz'et-pe chi ri Esaú beneq-apo y e ruk'uan e 400 achi'a', rija' xeruch'er ri ak'uala', ek'o xebe rik'in ri Lea y ri Raquel y ri ch'aqa' chik ak'uala' xebe kik'in ri e ka'i' kisamajela' ixoqi' kan chikijujunal k'a rije' xekik'uaj ri taq kal.

²Y nabey xeruk'owisaj ri ixoqi' ri e kisamajela' kachibilan ri taq kal. Xeri' ri Lea y ri taq ral y pa ruk'isibel xbe ri Raquel rachibilan ri José.

³Y ri Jacob xik'o-pe chikiwech rije', y xxukuyaj k'a wuqu' mul toq xbe-apo k'a akuchi k'o-wi ri rach'alal.

⁴Jak'a ri Esaú junanin xbe chuk'ulik, xuq'etej y xutz'ubaj, y chi e ka'i' janila xe'oq'.

⁵K'ari' ri Esaú xerutz'et-apo ri ixoqi' y ri ak'uala' y xubij: ¿E achike la e peteneq awik'in?, xcha'. Y ri Jacob xubij: Ja' ak'uala' re' ri e rusipan ri Dios chuwe roma ri rutzil pa nuwi' yin ri asamajel, xcha'.

⁶K'ari' xejel-pe ri e ka'i' ixoqi' e samajela' e kachibilan ri taq kal, xexuke-qa y xkiqasaj-ki' k'a pan ulew chuwech.

⁷Xpe chuqa' ri Lea kik'in ri taq ral xexuke-qa y xkiqasaj-ki' k'a pan ulew, y pa ruk'isibel xapon-apo ri José y ri Raquel, chuqa' xexuke-qa y xkiqasaj-ki' k'a pan ulew.

⁸Y ri Esaú xuk'utuj chire ri Jacob: ¿Achike nawajo' nach'ek rik'in ri q'ataj awej ri e nuk'ulun kan pa bey?, xcha'. Y ri Jacob xubij: Richin yensipaj chawe richin ninwil utzil awik'in, xcha'.

⁹Y ri Esaú xubij: Ni, wach'alal yin. Yin k'iy k'o wik'in. Tik'oje' kan awik'in rat, la' kan e awichin wi rat, xcha'.

¹⁰Jak'a ri Jacob xubij chire: Yin nink'utuj utzil chawe chi wi kan qitzij xjunamatej-qawech, tak'ulu' re nusipanik re nuk'amon-pe chawe, roma re xqatz'et chik qawech, kan achi'el xintz'et ruwech ri Dios. Roma kan rik'in utzil xinak'ul.

¹¹Tak'ulu' k'a re jun sipanik re nuk'amon-pe chawe, roma yin kan nuk'ulun ri rutzil ri Dios y k'o wik'in ronojel ri nik'atzin chuwe, xcha'. Y k'iy k'a mul xusuj chire y k'ari' ri Esaú xuk'ul.

¹²Xeri' ri Esaú xubij k'a chire ri Jacob: Jo' qachapa' bey. Y ja yin ri xkibe pa nabey, xcha'.

¹³Jak'a ri Jacob xubij chire: Wajaw, rat awetaman chi ri ak'uala' k'a e kokoj na, y ek'o ixoqi' taq karne'l y ixoqi' taq wákix ri k'a juba' ke'alex taq kal, y wi xqojbiyin chijun q'ij xkeken konojel taq alaji'.

¹⁴Tabana' utzil, wajaw yin, katik'o-el chinuwech yin. Yin eqal-eqal xkibe kik'in ri wawej ri e ik'owineq chinuwech, y xqojbiyin ri janipe' yojtikir kik'in ri ak'uala' y keri' xqojapon k'a pa Seir y chiri' xtiqabek'ulu-wi-qi' awik'in, xcha'.

¹⁵Y ri Esaú xubij: Wi keri', taya' q'ij chuwe richin yenya' kan e ka'i-oxi' achi'a' awik'in ri e peteneq chuwij, xcha'. Jak'a ri Jacob xubij chire: Man nik'atzin ta chi naben keri'. Yin xa yiruben rik'in ri xinwil utzil awik'in rat, wajaw yin, xcha'.

¹⁶Keri' chupan ri q'ij ri' ri Esaú xuchop binen richin xtzolin pa Seir.

¹⁷Jak'a ri Jacob xa pa Sucot*f29* xbe-wi y chiri' xupaba-q'anej jun rachoch y chuqa' xeruben-q'anej kachoch ri rawej rik'in ruq'a-che'; roma ri' xubij Sucot chire ri akuchi xk'oje-wi-qa.

¹⁸Y keri' rubanik toq ri Jacob xtzolin-pe ri k'a kela' pa Padán-aram, man jun xuk'uluwachij-pe y xapon ri pa tinamit Siquem ri k'o pa Canaán y xbek'oje' chiri' chunaqaj ri tinamit.

¹⁹Y xuloq' juba' rulew chi wok'al raqen pueq, chuwi' kiq'a' ri e ruk'ajol ri Hamor y chiri' xupaba-wi-qa ri rachoch ri banon rik'in tzieq. Y re Siquem re' jun chike ri e ruk'ajol ri Hamor.

²⁰K'ari' xuben-q'anej jun porobel richin kamelabel y El-Elohé-Israel ri rubi' ri xuya'. Re bi'aj re' nel chi tzij, Dios jari' ri ru-Dios ri Israel.