Read Kaqchikel Gén 34 Bible Online

Gén 34 - Kaqchikel bible

Gén 34

¹K'o k'a jun q'ij ri Dina ri ral ri Lea, rumi'al ri Jacob, xel-el pa rachoch chi retamaxik kiwech ri xtani' aj chiri' chupan ri ruwach'ulew ri'.

²Y ri achin Hamor heveo, ri tata'al ri chiri' chupan ri ruwach'ulew ri' k'o jun ruk'ajol rubini'an Siquem, y rija' xutz'et k'a ri Dina xuchop y rik'in uchuq'a' xkotz'e' rik'in.

³Jak'a ri Siquem man xuya' ta chik kan ri Dina y xbe ránima chirij. Y xutej ruq'ij chirij ri Dina richin chi xajowex ta.

⁴Y ri Siquem xch'on k'a rik'in ri Hamor ri rutata' y xubij chire: Tak'utuj juba' re jun xten re' richin chi nok wixjayil, xcha'

⁵Y toq xapon rutzijol rik'in ri Jacob chi ri Dina ri rumi'al xqasex ruq'ij roma ri Siquem, ri e ruk'ajol xa e maneq, rije' xa e beneq k'a pa juyu' e kik'uan-el ri rawej pa yuq'unik; roma ri' ri Jacob man jun xubij k'a ja toq xetzolin na pe.

⁶Y jari' toq ri rutata' ri Siquem xbe rik'in ri Jacob richin xberuk'utuj ri rumi'al.

⁷Ri e ruk'ajol ri Jacob xetzolej-pe pa juyu', jari' toq xketamaj, y rije' janila xyakatej koyowal roma kan janila itzel xuben ri Siquem chikikojol ri e rijatzul ri Israel, roma xuqasaj ruq'ij ri rumi'al ri Jacob, ri kan man ruk'amon ta chi nibanatej keri'.

⁸Jak'a ri Hamor xbech'on k'a kik'in rije' y xubij chike: Ri nuk'ajol Siquem kan xbe ránima chirij ri iwana' rix. Roma ri' tibana' utzil tiya' q'ij richin nok rixjayil,

⁹richin keri' xtijunamatej-qawech; tiya' ri imi'al chiqe roj, y roj xtiqaya' ri qami'al chiwe rix.

¹⁰Kixk'oje' kan qik'in jumul. Ri ruwach'ulew k'o richin niqasamajij. Tibana' itiko'n chuwech. Kixk'ayin y kixloq'on, kan tibana' iwichin chire, xcha'.

¹¹Ri Siquem chuqa' xubij chire ri rutata' ri Dina, y chike ri ruxibal: Yin nink'utuj utzil chiwe richin kinik'ulu' y xtinya' chiwe ronojel ri nik'utuj rix.

¹²Man jun rubanon wi xtik'utuj k'iy sipanik chuwe. Yin xtinya' chiwe janipe' niwajo' rix, xaxe tiya' q'ij chi ri iwana' nok wixjayil, xcha'.

¹³Jak'a ri e ruk'ajol ri Jacob rik'in q'oloj xech'on rik'in ri Siquem y ri rik'in ri Hamor ri rutata'. Keri' xkiben roma ri Siquem xuqasaj ruq'ij ri Dina ri kana'.

¹⁴Y rije' xkibij k'a chike: Man yojtikir ta niqaben keri'. Wi niqaya' ri qana' chire jun achin ri man qupin ta richin ya'on jun retal, ri keri' xa kan k'ixbel chiqe roj.

¹⁵Roj kan utz k'a xtuben chiqawech xaxe wi niben ri niqak'utuj chiwe: Kan kequpix k'a konojel ri achi'a' ri ek'o chi'ikojol rix richin jun retal.

¹⁶K'ari' xtiqaya' chiwe ri qami'al, y roj xqojk'ule' kik'in ri imi'al rix, y xqojk'oje' k'a qa jumul iwik'in, y xa jun k'a tinamit xtiqaben.

¹⁷Jak'a wi man xqojiwak'axaj ta richin k'a chi yequpix konojel ri achi'a' richin jun retal xtiqak'uaj-el ri qana' y xqojbe, xecha'.

¹⁸Ri Hamor y ri Siquem ri ruk'ajol, kan utz k'a xkak'axaj re ch'abel re'.

¹⁹Y ri Siquem jak'a rija' ri k'o más ruq'ij chikikojol ri rach'alal chiri' pa rachoch ri rutata' y rija' kan man xuya' ta k'a kan k'iy q'ij richin xuqupij-ri' richin jun retal, roma janila xqa' chuwech ri rumi'al ri Jacob.

²⁰Y roma ri' ri Hamor y ri ruk'ajol xepe chuchi' ri tinamit richin xech'on kik'in konojel achi'a' ri ek'o chiri', y xkibij chike:

²¹Re achi'a' re' kan janila ch'uch'uj ri kánima qik'in roj, roma ri' tiya' q'ij richin xkek'ayin y xkeloq'on chupan re qatinamit. Re ruwach'ulew re' nim y utz richin yek'oje' qik'in y roj xqojk'ule' kik'in ri kimi'al rije', y ri qami'al roj xtiqaya' chike rije'.

²²Xaxe k'a rik'in re jun jikibel-tzij re' xkek'oje-qa ri achi'a' chiqakojol roj; kan kequpix k'a konojel achi'a' chiqakojol roj; achi'el ri kibanon rije', kan keri' chuqa' roj richin chi xa jun tinamit xtiqaben.

²³Ronojel ri kibeyomel y ri tzobaj taq awej ri k'o kik'in eqal-eqal xtok qichin roj; xaxe tiqabana' ri nikibij rije' richin xkek'oje-qa qik'in, xecha'.

²⁴Konojel k'a achi'a' richin ri tinamit ri' ri k'o kijuna' richin yebe pa labal kan xkinimaj ri xbix chike koma ri Hamor y ri Siquem, richin yequpix richin jun retal.

²⁵Y jak'a pa rox q'ij toq janila kina'on rukiy, jari' toq ri e ka'i' ruk'ajol ri Jacob, ri Simeón y ri Leví, e ruxibal ri Dina, xkik'uaj k'a el ri ki-espada, xe'apon k'a chupan ri tinamit, y xekikamisaj kan konojel ri achi'a', y ri achi'a' ri' kan man jun k'a nikimey toq xe'apon ri Simeón y ri Leví.

²⁶Rije' xkikamisaj k'a kan ri Hamor y xkikamisaj kan ri Siquem. Xekikamisaj k'a kan chi espada. K'ari' xbekelesaj-pe ri Dina pa rachoch ri Siquem y xebe.

²⁷Ri ch'aqa' chik ruk'ajol ri Jacob xe'apon k'a akuchi ek'o-wi ri kaminaqi' y xkik'uaj-el ri janipe' ri xkil-el chupan ri tinamit richin xkiben ruk'exel chike roma xkiqasaj ruq'ij ri kana'.

²⁸Xekik'uaj k'a el ri kiwákix, ri karne'l y ri kibur, y ronojel ri xkil-el chupan ri tinamit, y ronojel ri ek'o pa taq juyu' ri kitikon-qa ri aj chiri'.

²⁹Y chuqa' xkik'uaj-el ronojel ri k'o rejqalen, xekik'uaj-el ri ixoqi', ri ak'uala' y ronojel ri xekil-el pa taq jay.

³⁰Y ri Jacob xubij chike ri Simeón y ri Leví: Rix janila xiniya' pa ruk'ayewal roma xe'ikamisaj kan re rajaw re ruwach'ulew re'. Wakami xtikimol k'a pe ki' chiqij ri e rijatzul kan ri Canaán y ri Feres y roj xa man oj k'iy ta ok ri achi'a'; xkinkikamisaj k'a yin y ri e aj pa wachoch, xcha' chike.

³¹Jak'a rije' xkibij: ¿Ruk'amon kami chi ri qana' xban chire achi'el jun xten ri itzel ruk'aslen?, xecha' chire ri kitata'.