Read Kaqchikel Gén 35 Bible Online

Gén 35 - Kaqchikel bible

Gén 35

¹K'o k'a jun q'ij ri Dios xubij chire ri Jacob: Kayakatej y kabiyin-el pa Betel. Chiri' kak'oje-wi, y tabana-q'anej jun porobel richin kamelabel chuwe yin toq xink'ut-wi' chawech toq at animajineq chuwech ri awach'alal Esaú, xcha' ri Dios chire ri Jacob.

²Y roma ri' ri Jacob xubij chike ri rixjayilal, ri ruk'ajol y chike konojel ri ek'o pa rachoch: Ke'iwelesaj-el jumul chi'ikojol ri kiwachibel ri i-dios. Tich'ajch'ojirisaj-iwi' y tijala' ri itziaq.

³Y kixanpe k'a y yojbe-q'anej pa Betel. Y chiri' xtiqaben jun porobel richin ninsuj kamelabel chuwech ri Dios ri xak'axan wichin toq numalin nuk'u'x, y k'o-pe wik'in chupan ronojel ri nubey akuchi in q'axineq-wi, xcha'.

⁴Y keri' xekiyala' k'a apo chire ri Jacob, ri ruwachibel ri ki-dios ri ek'o pa taq kachoch y ri ruwi' taq kixikin; y rija' kan xerumuq chuxe' jun paten-che' ri k'o pa Siquem.

⁵Y rije' xe'el k'a el chiri', y ri Dios xuben chike ri winaqi' ri ek'o chiri' chi xqaqa jun nimalej xibinri'il pa kiwi', y jari' ri xbanon chike chi man xeyakatej ta el chikij.

⁶Ri Jacob y ri e ruwinaq, xe'apon k'a ri pa tinamit rubini'an Luz, ri xubini'aj chuqa' Betel ri k'o pa ruwach'ulew Canaán.

⁷Chiri' xuben-wi-q'anej jun porobel richin xusuj kamelabel, y xubij chire ri tinamit ri' Ri Dios Richin Ri Betel, roma chiri' xuk'ut-wi-ri' ri Dios toq animajineq-el chuwech ri runimal.

⁸Y chiri' k'a pa Betel xken-wi ri Débora, ri xk'iytisan richin ri Rebeca y xmuq chuxe-qa juba' ri Betel chuxe' jun paten-che', y ri chiri' xubini'aj kan Paten-che' richin Oq'ej.

⁹Y toq ri Jacob tzolejineq chik pe ri pa Padán-Aram, ri Dios xuk'ut chik ri' chuwech y xrurtisaj,

¹⁰y xubij chire: Rat, Jacob ri abini'an-pe, jak'a re wakami man chik xtabini'aj ta Jacob, kan xtabini'aj k'a Israel, xcha'. Y kan Israel k'a ri rubi' xuya'.

¹¹Ri Dios xubij chuqa' chire: Ja yin ri in Dios ri ronojel yitikir ninben; katalk'ualan k'a y xkewinaqir ri awijatzul, awik'in k'a rat xtel-wi jun tzobaj winaqi', richin ri ruwach'ulew, y kan e k'iy chik k'a ruwach'ulew xke'el awik'in; chuqa' xke'el rey rik'in ri awijatzul.

¹²Re ruwach'ulew re' kan nusujun chik chike ri Abraham y ri Isaac, kan xtinya' k'a chuqa' chawe rat, chuqa' chike ri awijatzul, xcha'.

¹³Xeri' ri Dios xel-el chiri' ri akuchi xtzijon wi rik'in,

¹⁴jari' toq ri Jacob xupaba-q'anej jun abej richin retal akuchi xch'on-wi ri Dios rik'in y xuya' aceite y vino pa ruwi',

¹⁵y xubij k'a Betel chire ri akuchi xch'on-wi ri Dios rik'in.

¹⁶Xeri' xe'el chik el chiri' pa Betel, y k'a k'o na k'a juba' nrajo' richin ye'apon pa ruwach'ulew Efrata; jari' toq ri Raquel xpe ri ruq'axo'n richin alanik y kan xnimatej.

¹⁷Y roma kan janila xnimatej, ri k'exelo'n xubij chire: Man taxibij-awi', roma xa kan xkach'akon chuqa' wakami, xcha'.

¹⁸Ri Raquel toq niken yan xubij kan chi Ben-oní xtubini'aj ri ak'ual y re' nel chi tzij ak'ual richin bis, jak'a ri rutata' xubij Benjamín chire y re' nel chi tzij ak'ual richin ri nurijixinen.

¹⁹Y keri' k'a toq ri Raquel xken y xkimuq kan ri chiri' toq kichapon-el bey pan Efrata, ri wakami jari' ri tinamit rubini'an Belén.

²⁰Y ri Jacob xupaba' kan jun abej retal akuchi xmuq-wi ri Raquel, y kan jari' k'o chiri' richin retal k'a re wakami.

²¹Y ri Jacob ri rubini'an chuqa' Israel xuchop chik k'a el bey y xberupaba' ri rachoch ri banon rik'in tzieq, k'a chuwech-apo ri torre kichin ri tzobaj chikopi'.

²²Rokik ri Israel k'o chupan ri ruwach'ulew ri', jari' toq ri Rubén xk'oje' rik'in ri Bilhá, ri jun chik rixjayil ri rutata'; y ri Israel xunabej k'a ri xbanatej. Y konojel ralk'ual ri Israel e kablajuj.

²³Ri e ral ri Lea ja ri Rubén ri nabey, k'ari' ri Simeón, ri Leví, ri Judá, ri Isacar y ri Zabulón.

²⁴Ri e ral ri Raquel ja ri José y ri Benjamín.

²⁵Ri e ral ri Bilhá, ri rusamajel ri Raquel, ja ri Dan y ri Neftalí.

²⁶Ri e ral ri Zilpá, ri rusamajel ri Lea, ja ri Gad y ri Aser. Jare' konojel ruk'ajol ri Jacob ri e alaxineq-pe pa Padán-Aram.

²⁷Y ri Jacob xoqaqa-el rik'in ri Isaac ri rutata' ri k'o chiri' pa Mamré, chupan ri tinamit rubini'an Arbá, ri chuqa' nibix Hebrón chire, ri akuchi xek'oje-wi ri Abraham y ri Isaac.

²⁸Ri Isaac xk'ase' 180 juna' chuwech re ruwach'ulew.

²⁹Y xken k'a roma rijixinen, y keri' xk'olotej-el chuwech re ruwach'ulew y xbemuq kan koma ri Esaú y ri Jacob ri e ruk'ajol.