Read Kaqchikel Gén 38 Bible Online

Gén 38 - Kaqchikel bible

Gén 38

¹Y xk'uluwachitej k'a chupan ri q'ij ri', chi ri Judá xuch'er-el ri' chike ri rach'alal y xbek'oje' pa rachoch jun achin rubini'an Jirá ri k'o chupan ri tinamit ri nibix Adulam chire.

²Y rija' xutzu' ruwech jun xten aj-Canaán rumi'al jun achin rubini'an Súa; xuk'uaj y xok k'a rixjayil.

³Y re ixoq re' xyawej k'a chirij ak'ual y xk'oje' jun ti ral ala' y rija' Er ri rubi' ri xuya'.

⁴Xyawej chik k'a chirij jun ak'ual y xk'oje' ri ruka'n ral y Onán ri rubi' ri xuya'.

⁵Y xyawej chik k'a jun bey y xk'oje' ri rox ral y Selá ri rubi' ri xuya'. Y ri Judá chiri' k'a pa tinamit Quezib k'o-wi toq xalex ri ak'ual ri'.

⁶Y toq ri Er ri nabey ruk'ajol ri Judá xnimer yan, ri Judá xuk'uluba' rik'in jun xten rubini'an Tamar.

⁷Xa jak'a ri Er man utz ta xuben chuwech ri Jehová y roma ri' ri Jehová xrelesaj ruk'aslen.

⁸K'ari' ri Judá xubij chire ri Onán ri ruka'n ruk'ajol: Tak'ama-qa la rixjayil kan ri animal y kak'ule' rik'in, richin keri' tik'oje' rijatzul ri animal, xcha'.

⁹Jak'a ri Onán kan retaman-wi chi wi yek'oje' rijatzul rik'in ri rixnan, man ye'ok ta richin rija' y roma ri' toq nik'oje' rik'in ri rixnan nuben chi man nijatzun ta kan rik'in, xa pan ulew nuya-wi-el.

¹⁰Y ri xuben ri Onán man xqa' ta chuwech ri Jehová y roma ri' ri Jehová xrelesaj ri ruk'aslen.

¹¹Y jari' toq ri Judá xubij chire ri rali': Tayonij na chik k'a juba' y kabek'oje' pa rachoch ri atata' rokik nik'iy-q'anej ri nuk'ajol Selá, xcha'. Keri' xubij ri Judá roma rik'in juba' niken chuqa-el ri Selá. Y ri Tamar xbek'oje' k'a pa rachoch ri rutata'.

¹²Y toq janila yan k'a k'iy q'ij tiq'ax, jari' toq xken-el ri rixjayil ri Judá. Y toq k'isineq chik el juba' ri rubis, rija' xbe-q'anej kik'in ri yesokan rusumal ri rukarne'l pa tinamit Timnat rachibilan-el ri Hira ri aj-Adulam.

¹³Y re' xbeya'ox rutzijol chire ri Tamar y xbix chire: Ri awalinan nijote-q'anej pa Timnat richin niberusokaj kij ri rukarne'l, xecha' chire.

¹⁴Roma ri' rija' xujel kan ri rutziaq ri nik'utu chi rija' jun malka'n ixoq y xuq'uj-el jun tzieq y xutz'apej-el rupalej rik'in jun tzieq richin man jun netaman ruwech. Y xbetz'uye' chuchi' ri tinamit Enaím, chuchi' ri bey ri nibe pa tinamit Timnat. Rija' rutz'eton chik k'a chi ri Selá xk'iy yan q'anej, y k'a man jani ya'on ta chire richin chi nok rachijil.

¹⁵Y toq ri Judá xutz'et, xuch'ob chi jun ixoq itzel ruk'aslen, roma rutz'apen ri rupalej.

¹⁶Y roma ri Judá man retaman ta chi xa ja ajk'a ri rali' ri pa'el ri chiri', rija' xpa'e-qa y xjel-apo rik'in ri chiri' chuchi' ri bey y xubij chire: Taya' q'ij chuwe richin yik'oje' awik'in, xcha' chire. Y ri Tamar xubij chire: ¿Achike naya' chuwe richin yak'oje' wik'in?, xcha'.

¹⁷Y ri Judá xubij: Ninteq-pe jun ti alaj tzuntzun chawe ri nincha-pe chikikojol ri wawej, xcha' chire. Y ri Tamar xubij: Taya' kan jun retal chuwe richin kan nateq-pe ri ti alaj tzuntzun chuwe, xcha'.

¹⁸K'ari' ri Judá xuk'utuj chire: ¿Achike retal nawajo' chi ninya' kan chawe?, xcha'. Y ri Tamar xubij: Taya' kan la a-sello rik'in la rutzeqebal y la ach'ame'y la ak'uan, xcha' chire. Y ri Judá xuya' ri xuk'utuj chire y xk'oje' rik'in, y ri Tamar xyawej kan;

¹⁹y ri Tamar kan xaxe xuben ri keri', man jun chik achike ta ri xroyobej xa kan jari' xbe; xberelesaj k'a ri tzieq chupalej y xberukusaj chik jun bey ri rutziaq ri nuk'ut chi kan malka'n.

²⁰Y ri Judá xuteq k'a ri alaj tzuntzun, xuteq chirij ri rachibil ri aj-Adulam, richin nitzolix-pe ri retal ri ruya'on kan chire ri ixoq; y ri rachibil ri Judá xa man xril ta ri ixoq.

²¹Ri achin ri' kan xuk'utula' k'a chike ri achi'a' ri e aj chiri', y kere' k'a ri xuk'utula' chike: ¿Akuchi k'o-wi ri ixoq*f30* ri nik'oje' chuchi' bey, ri akuchi ek'o-wi ri tiox; chuchi' bey richin ri Enaím?, xcha'. Y ri achi'a' xkibij: Ri chiri' man jun bey k'o ta jun ixoq, ri yeroyobej achi'a', xecha' chire.

²²K'ari' rija' xtzolin rik'in ri Judá y xberubij chire: Man xinwil ta kan ri ixoq; chuqa' ri achi'a' ek'o chiri' xkibij chuwe chi chiri' man jun bey k'o ta jun ixoq ri yerutz'elwachij achi'a', xecha' chuwe, xcha'.

²³Y ri Judá xubij: Tik'oje' na k'a kan rik'in ri ixoq ri xinya' kan chire richin chi man jun tich'on itzel chiqij, roma xatinteq-el richin nabeya' kan ri ti alaj tzuntzun y re ixoq re' xa man xawil ta kan, xcha'.

²⁴Oxi' yan k'a ik' tiq'ax toq xbanatej ri', jari' toq xapon rutzijol rik'in ri Judá y xbebix chire: Ri awali' Tamar xmakun rik'in achin y wakami royoben jun ak'ual, xuche'ex. Y ri Judá xubij: Tiwelesaj-pe richin tibox pa q'aq', xcha'.

²⁵Jak'a toq xbe'elesex-pe ri Tamar, rija' xuteq rubixik chire ri ralnan: Ri ak'ual ri woyoben richin ri achin ri rajaw re ronojel re ruya'on kan chuwe richin jun retal,*f31* kan to'atz'eta' k'a, achoq ichin na ri sello rik'in rutzeqebal y ri ch'ame'y ri k'o kan wik'in, xcha'.

²⁶Y ri Judá xretamaj k'a chi ronojel ri' e richin rija' y xubij: Más utz ri ruk'aslen rija' chuwech ri nuk'aslen yin, roma yin man xinya' ta ri nuk'ajol Selá chire, xcha' ri Judá y man jun bey chik k'a xk'oje' ta rik'in ri Tamar.

²⁷Toq xapon ri q'ij richin xutzir, xketamaj chi taq kua'ch ajk'a ri ak'uala'.

²⁸Toq xalex jun chike rije', xrelesaj-pe jun ti ruq'a' y ri k'exelo'n chi'anin xuxim jun betz' keq chiruq'a', retal richin jari' ri xalex nabey.

²⁹Jak'a ri ak'ual xa xujik' chik apo ri ruq'a', y xa ja chik ri rach'alal ri xalex nabey. Roma ri' ri k'exelo'n xubij chire, achike rubanik xaben richin chi xajeq-pe abey. Y roma ri' Fares xubini'aj ri ak'ual ri'.

³⁰Chirij ri' xalex ri ak'ual ri ximon chik kan betz' keq chuq'a' y rija' xubini'aj Zeráh.