Read Kaqchikel Gén 42 Bible Online

Gén 42 - Kaqchikel bible

Gén 42

¹Y toq ri Jacob xretamaj k'a chi ri ruwach'ulew Egipto k'o trigo nilitej, xubij chike ri ruk'ajol: ¿Achike roma chaq nitzula-iwi' chiri' y man nikanoj ta juba' qaway?

²Yin xinwak'axaj chi pan Egipto nik'ayix trigo. Kixbiyin-qa chiri' y tibeloq'o-pe juba' qa-trigo ri nik'atzin chiqe, richin man qojken roma wayjal, xcha'.

³Y ri e lajuj rach'alal ri José ri ek'o kan rik'in ri kitata' xebe k'a qa pan Egipto chuloq'ik trigo.

⁴Jak'a ri Jacob, ri kitata', man xuteq ta chik el ri Benjamín kik'in ri rach'alal, roma xuch'ob-qa: Rik'in juba' k'o nuk'uluwachij.

⁵Y ri e ralk'ual k'a ri Israel, xebe k'a. Rije' xebe chikikojol ri ch'aqa' chik winaqi' ri xebe chuqa' richin xbekiloq'o' ki-trigo, roma pa ruwach'ulew Canaán kan k'o chuqa' wayjal.

⁶Y ri q'atoy-tzij ri chiri' pa ruwach'ulew Egipto ja ri José, y ja rija' ri nik'ayin ri trigo chike konojel ri winaqi'. Y toq ri rach'alal xe'apon k'a qa, rije' kan xexuke-qa chuwech y xkiqasaj-qa-ki' k'a pan ulew.

⁷Y rija' kan chi'anin k'a xretamaj kiwech chi jari' ri e rach'alal; jak'a xa xuben chi achi'el man xretamaj ta kiwech y rik'in royowal xch'on kik'in y xubij: ¿Akuchi k'a kixpe-wi rix?, xcha'. Y rije' xkibij: Roj oj peteneq chupan ri ruwach'ulew Canaán, richin yojoloq'on-el wawe', xecha'.

⁸Y stape' ri José kan chi'anin xretamaj chi jeri' ri e rach'alal, rije' kan man xketamaj ta ruwech.

⁹K'ari', rija' xoqaqa k'a chuk'u'x ri rachik' ri e rubanalon chikij rije', y rija' xubij k'a chike: Rix xa ix nachanela', xa ix peteneq xaxe richin no'itz'eta' kan achike rubanon ri qaruwach'ulew, wi k'o ruchuq'a' o maneq, xcha'.

¹⁰Y rije' xkibij chire: Man keri' ta, qajaw, roj xaxe oj peteneq richin noqaloq'o-el trigo.

¹¹Qonojel roj xa jun qatata' y choj ri qak'aslen, man jun bey oj okineq ta nachanela', xecha' rije'.

¹²Jak'a rija' xuben chi man xunimaj ta y xubij chike: Ni, rix xa ix peteneq richin no'itz'eta' kan ri qaruwach'ulew wi k'o ruchuq'a' o maneq, xcha' chike.

¹³Y rije' xkibij chik apo chire jun bey: Roj oj kablajuj qach'alal-qi' y xa jun qatata' y oj peteneq kela' pa ruwach'ulew Canaán, y ri qach'alal más ko'ol chiqe roj xk'oje' kan rik'in ri qatata' y k'o jun ri xa xken yan, xecha' rije'.

¹⁴Jak'a ri José xubij chike: Yin xinbij yan chi kan ix nachanela' wi.

¹⁵Y richin ninwetamaj chi kan qitzij k'a ri yixtajin chubixik chuwe wakami, yixintejtobej k'a y yin kan ninjikiba-wi nutzij chuwech ri rey chi man xkixel ta el re wawe' k'a toq xtipe na ri ichaq' más ko'ol.

¹⁶Tibe k'a jun chiwe rix richin niberuk'ama' ri ichaq' y ri ch'aqa' chik xkixtz'ape' kan pa cárcel y rik'in ri' xtinwetamaj yin wi kan qitzij ri nibij chuwe. Y wi xa xitz'uk-tzij chinuwech, ninjikiba-nutzij chuwech ri rey chi rix xa kan ix nachanela-wi, xcha'.

¹⁷Y konojel xerutz'apej oxi' q'ij pa cárcel,

¹⁸y pa rox q'ij ri José xubij chike: Yin tikirel ta yixinkamisaj y roma ninxibij-wi' chuwech ri Dios man ninben ta keri'; roma ri' kan xkixk'ase', xaxe tibana' ri xtinbij chiwe.

¹⁹Wi kan qitzij k'a chi rix ix choj, tik'oje' kan jun chiwe rix ri pa cárcel y ri ch'aqa' kebe y tikik'uaj-el ri trigo richin nikitej ri ek'o kan pan iwachoch, richin man yeken ta qa roma wayjal.

²⁰Y man timestaj nik'en-pe ri ichaq', richin niq'alajin chi kan qitzij ri xibij y wi man keri' ta xtiben xa xkixken, xcha' chike. Y rije' kan xqa' chikiwech ri xbix chike.

²¹Y rije' xkibila' k'a qa chikiwech: Kan qitzij na wi janila oj itzel xqaben rik'in ri qachaq' José. Man xqanimaj ta rutzij toq rija' xuk'utuj utzil chiqe richin tiqajoyowaj ruwech, y kan xqatz'et chi janila nibison ri ránima, y roma ri' xoqaqa pa qawi' re jun bis re', xecha' rije'.

²²K'ari' xch'on-apo ri Rubén y xubij chike: Yin xinbij chiwe chi man jun itzel tiben chire ri ala' ri' y man xinimaj ta nutzij y k'a wakami yojtajin rutojik ri rukamik ri qachaq', xcha'.

²³Jak'a rije' man ketaman ta k'a chi ri José xa niq'ax chuwech ronojel ri nikibij chikiwech rije', roma toq ch'owineq rija' kik'in xa rukusan k'a jun ri nuq'axaj ruch'abel.

²⁴Y rija' xuch'er k'a el ri' chike ri e rach'alal y xbe'oq' juk'an chik. Chirij re', k'ari' xtzolin chik pe y xch'on kik'in y xberuk'ama-pe ri Simeón chikikojol y chikiwech rije' xuxim.

²⁵K'ari' ri José xuteq rubixik richin kenojisex ri ki-costal rik'in trigo y titzolix-el ri rajel chike chikijujunal chupan ri ki-costal y chuqa' tiya-el rukil kiway richin nikitej-el pa bey; y kan keri' xban-el kik'in.

²⁶Y rije' xkiyala-el ri trigo chirij ri kibur y xe'el-el chiri' richin xebe.

²⁷Y toq xe'apon k'a akuchi nikiq'axaj-wi ri aq'a', jun chike rije' xujeq-qa ri ru-costal richin nuya' ruway ri rubur y jari' toq xutz'et chi ri méro k'o-el chiri' pa ruchi' ri ru-costal.

²⁸Y rija' xubij k'a chike ri rach'alal: Ri nu-méro xa xtzolix-pe chuwe. Jare' k'o pa nu-costal, xcha'. Y rije' janila xuxibij-ri' ri kánima y yebaybot roma xibinri'il, y xkibila-qa chikiwech: ¿Achike k'a roma kere' nuben ri Dios qik'in?, xecha'.

²⁹Y toq xe'apon chupan ri ruwach'ulew Canaán rik'in ri kitata', xkitzijoj k'a chire ri achike ri xkik'uluwachij:

³⁰Ri achin ri niq'aton-tzij chupan ri ruwach'ulew Egipto rik'in janila royowal xch'on qik'in y xuq'abaj chiqij chi roj oj nachanela'.

³¹Jak'a roj xqabij chire, chi man jun bey oj okineq ta nachanela', chi roj oj choj taq achi'a',

³²y oj kablajuj qach'alal-qi' y ri jun qachaq' xa xken yan y ri más ko'ol k'o kan awik'in rat re wawe' pa ruwach'ulew Canaán, xojcha' chire.

³³K'ari' rija' xubij chiqe: Xtinwetamaj wi qitzij ri nibij. Tiya' kan wawe' jun iwach'alal, kixbiyin y tik'uaj-el ri trigo richin nikitej ri ek'o pan iwachoch, richin man yeken ta qa roma wayjal,

³⁴y tik'ama-pe ri ichaq' wik'in, richin xtinwetamaj chi man ix nachanela' ta. K'ari' xtinwelesaj-el ri jun chik iwach'alal y man jun k'a xkixq'aton richin yixoloq'on y yixok'ayin chupan re ruwach'ulew re', xcha' ri q'atoy-tzij chiqe, xecha' rije' chire ri kitata'.

³⁵Y toq rije' xkijamala' ri ki-costal, jari' toq xkitz'et chi chupan ri ki-costal chikijujunal, k'o-pe ri chuyaj méro chupan, ri rajel ri kiloq'oj. K'ari' rije' y ri kitata', janila xkik'en rukiy.

³⁶Y xeri' ri kitata' xubij chike: Rix xa chi taq juba' ye'ik'is-el konojel ri walk'ual chinuwech. Ri José maneq chik qik'in, ri Simeón iya'on kan kela'. Y wakami nik'uaj chik el chinuwech ri nuk'ajol Benjamín. ¡Ronojel re' xa pa nuwi' yin niqaqa-wi!, xcha' ri Jacob.

³⁷Ri Rubén xch'on k'a rik'in ri rutata' y xubij chire: Tajacha-el ri Benjamín pa nuq'a' yin y yin kan xtonjacha' chawe, y wi man xtontzolij ta el chawe, ninya' q'ij chawe richin ke'akamisaj chi e ka'i' nuk'ajol yin, xcha' ri Rubén chire ri rutata'.

³⁸Y ri rutata' xubij chire: Ri nuk'ajol man xtinya' ta el chiwij rix, roma ri José ri runimal xken yan, y xaxe chik rija' xk'oje' kan wik'in; y wi ta k'o jun nuk'uluwachij-pe chupan re taqikil re', ja rix k'o imak, wi yin xkiken roma bis chupan ri nurijixinen, xcha'.