Read Kaqchikel Gén 44 Bible Online

Gén 44 - Kaqchikel bible

Gén 44

¹Y ri José xuteq-el ri achin aj-raqen pa kiwi' ri rusamajela' ri ek'o pa rachoch y xubij-el chire: Tanojisaj-el chi trigo ri ki-costal re achi'a' re', ri janipe' yetikir nikik'uaj-el y ri kiméro taya-el chupan ri ki-costal,

²y pa ruchi' ri ru-costal ri ch'i'p naju-el ri nuqumbal y ri méro rajel ri ru-trigo, xcha' chire. Y re samajel re' xuben achi'el xbix chire roma ri José.

³Toq xseqer-q'anej, ri rach'alal ri José xejach-el richin chi xetzolin-el y xekik'en-pe ri bur.

⁴Y toq e eleneq chik el chupan ri tinamit y man jani nej ta kebiyin, jari' toq ri José xubij chire ri rusamajel: Kabiyin y kebe'aq'i' ri achi'a' y tabij chike: ¿Achike roma xiben ri man ruk'amon ta y xa utz ri xban-pe chiwe? ¿Achike roma xiweleq'aj-pe ri ruqumbal ri wajaw ri banon rik'in saqipueq?

⁵Ja qumbel re' ri nik'atzin chire ri wajaw richin niqumun y richin nitikir nutz'et ri achike nibanatej. Re xiben-pe kan man utz ta, kacha' chike, xcha-el ri José chire ri rusamajel.

⁶Y toq xeberuq'i', kan ja na wi ch'abel ri' ri xubij chike.

⁷Y rije' xkibij: ¿Achike roma nubij keri' ri qajaw? Roj man jun bey tiqaben achi'el ri nabij.

⁸Roma ri' toq roj xqatzolij k'a ri méro ri xqil chupan ri qa-costal ri pa nabey mul y kan k'a pa Canaán xqak'en chik pe richin chi xbeqatzolij kan. ¿Achike ta k'a roma niqeleq'aj-pe saqipueq o q'anapueq pa rachoch ri awajaw?

⁹Jak'a wi nawil ri qumbel chupan ri ru-costal jun chiqe roj, kan tikamisex k'a ri' y roj xtiqaya-qi' pa samaj rik'in ri awajaw y xqojxime' rik'in, xecha'.

¹⁰K'ari' ri samajel xubij: Tibanatej k'a achi'el ri xibij rix; xaxe achoq ik'in xtilitej-wi ri qumbel xtok kan pa nuq'a' yin y ri ch'aqa' chik chiwe rix xkekolotej chuwech ri itzel banobel, xcha'.

¹¹Chikijujunal chi'anin xkiqasala-qa ri ki-costal pan ulew y xkijaqala' ruwi' ri ki-costal.

¹²Y ri samajel xuchop k'a nukanoj ri qumbel chupan ri ru-costal ri nimalaxel y xapon k'a rik'in ri ch'i'p y chupan ri costal ri' xberila-pe ri qumbel.

¹³Rije' xkiretz ri kitziaq chikij roma bis, k'ari' xkiben chik pe ri rejqa'n ri kibur richin xetzolin chik pa tinamit.

¹⁴Toq ri Judá y konojel ri rach'alal xe'apon chik pa rachoch ri José, rija' k'a k'o na chiri'. K'ari' rije' xkiqasaj-qa-ki' k'a pan ulew chuwech,

¹⁵y rija' xubij chike: ¿Achike k'a ri xiben? ¿Man iwetaman ta k'a chi jun achin achi'el yin, nitikir nutz'et ri achike nibanatej?

¹⁶Ri Judá xubij chire: ¿Achike k'a xtiqabij wakami? ¿Achi'el toq xtiq'alajin chi man oj aj-maki' ta? Ri Dios xril ri qamak ri qabanon. Wakami k'a, jare' ojk'o pan aq'a', xqojok k'a asamajela' junan rik'in ri achoq ik'in xilitej-wi ri qumbel, xcha' ri Judá.

¹⁷Y ri José xubij chike: Man ruk'amon ta chi keri' ninben. Xaxe achoq ik'in xilitej-wi ri qumbel xtok kan nusamajel y xtixime' kan pa samaj wik'in. Rix kixtzolin pa rachoch ri itata' rik'in uxlanibel-k'u'x, xcha'.

¹⁸K'ari' ri Judá xjel-apo rik'in ri José y xubij chire: Táta, nink'utuj jun nimalej utzil chawe, richin chi tawak'axaj ri xtinbij chawe, roma rat kan at achi'el ri rey, ri k'o q'atbel-tzij pa ruq'a' y roma ri' tabana' utzil man tiyakatej awoyowal chuwe.

¹⁹Toq xojpe pa nabey mul, rat xak'utuj chiqe chi wi k'a k'es na ri qatata' y wi k'o jun chik qach'alal,

²⁰y roj xqabij chawe: Qajaw, k'a k'es na ri qatata', xa ja ri ti ri'j chik y k'a k'o jun ruk'ajol ri xalex pa rurijixinen y ri qatata' kan janila nrajo', chuqa' xqabij chawe chi k'o jun qach'alal ri xken y roma ri' xaxe chik re jun ruk'isibel qachaq' ri xk'oje' kan chike ri e ka'i' ri junan kite', xojcha'.

²¹Y rat xabij chiqe chi tiqak'ama-pe ri qachaq' roma nawajo' nawetamaj ruwech.

²²Jak'a roj xqabij chawe chi rija' man nitikir ta nuya' kan ri qatata' roma wi xtuya' kan, ri qatata' niken.

²³Y rat xabij chiqe chi wi ri qachaq' más ko'ol man xtipe ta chiqij man xqojak'ul ta chik.

²⁴Toq xojtzolin-el rik'in ri qatata' xbeqatzijoj chire ronojel ri abin-el chiqe.

²⁵Jak'a toq ri qatata' xubij chik chiqe chi qojpe chik jun bey chuloq'ik juba' trigo;

²⁶roj xqabij chire chi man yojpe ta roma rat kan man xqojak'ul ta wi ri qachaq' xa man nipe ta chiqij roma keri' abin-el chiqe.

²⁷Y ri qatata' xubij chiqe chi roj kan qetaman-wi chi rik'in ri Raquel ri rixjayil xek'oje' xaxe e ka'i' ruk'ajol;

²⁸ri nimalaxel chike rije' e ka'i', xa xbe yan, roma jun itzel chikop xwech'on richin y man jun bey chik xtutz'et ruwech.

²⁹Y wakami xqak'en chik pe re jun chuwech y wi k'o ta jun xtuk'uluwachij, xubij-pe chiqe chi kan ja roj k'a k'o qamak ri' wi ri qatata' xtiken roma bis.

³⁰Jak'a re wakami achike xtiqaben re xqojtzolin-el rik'in ri qatata', wi man qak'uan ta ri qachaq', roma ri qatata' kan rik'in ri qachaq' k'o-wi ri ránima roma janila nrajo'.

³¹Y toq xtutz'et chi ri qachaq' man beneq ta chik qik'in, xtiken roma bis y qoma roj xtiken-el.

³²Yin kan nuya'on kan nutzij chire ri nata', chi ja yin ri yipa'e' chuwech re' y yin k'o chi ninjech re qachaq' re' chire y chuqa' xinbij kan chire chi wi man xtinbentzolij ta chire, kan ja yin k'a in aj-mak chuwech rija' chijun ri ruk'aslen.

³³Y roma ri' nink'utuj k'a utzil chawe chi ja yin ri yinok kan awichin rat pa ruk'exel ri nuchaq' y rija' titzolin junan kik'in ri ch'aqa' chik wach'alal.

³⁴Roma ¿Achi'el ta k'a toq xkinapon chuwech ri nata' wi xa nuyon chik yin y man beneq ta ri qachaq'? Man ninwajo' ta nintz'et ri tijoj-poqonal ri xtuq'axaj ri nata', xcha' ri Judá.