Read Kaqchikel Gén 45 Bible Online

Gén 45 - Kaqchikel bible

Gén 45

¹Ri José kan man nukoch' ta chik ri roq'ej chikiwech konojel rusamajela' y xubij chike: Kixel-el chi'iwonojel wawe', xcha'. Y kan man jun k'a chike ri rusamajela' xk'oje' kan chiri' toq xuq'alajirisaj-ri' chikiwech ri rach'alal.

²K'ari' xsik'in-q'anej chi oq'ej y ri aj-Egipto xkak'axaj k'a y xbekitzijoj pa rachoch ri rey.

³Y ri José xubij k'a chike ri rach'alal: Ja yin ri in José. ¿K'a k'es ri nata'?, xcha'. Y rije' man jun xetikir xkibij chire roma janila kixibin-ki' chuwech.

⁴Y xubij k'a chike ri rach'alal chi kejel-apo rik'in. Y toq rije' xejel-apo rik'in rija' xubij chik jun bey chike chi ja rija' ri José ri kach'alal, ri xkik'ayij-pe pan Egipto.

⁵Wakami k'a, man kixbison ni man tiq'axon iwánima roma xinik'ayij-pe, roma re' kan ja ri Dios xbanon richin xiruteq-pe k'a kere', richin man yixken roma wayjal.

⁶Ka'i' yan juna' k'o-pe re wayjal chuwech re ruwach'ulew y k'a k'o wo'o' ri nikanej kan chiqij y chupan ri wo'o' juna', stape' xtiban qa tiko'n xa man xtiwachin ta.

⁷Roma ri' ri Dios xiruteq-pe re wawe', nabey chiwech rix, richin chi yek'oje' kan k'iy iwijatzul chuwech re ruwach'ulew, y richin chuqa' chi ninkol ri ik'aslen rix y man yixken ta roma wayjal.

⁸Roma ri', man ja ta rix ri xixtaqon-pe wichin wawe', kan ja ri Dios ri xitaqon-pe roma kan xirukusaj richin ninya' pixabanik chire ri rey y chuqa' richin chi xinok achi'el rajaw richin chijun ri rachoch, y xirukusaj chuqa' jun aj-raqen pa ruwi' chijun ruwach'ulew Egipto.

⁹Roma ri' ja tibek'ama' ri nata' y tibebij chire chi kere' rubin-pe ri ak'ajol José chiqe: Ri Dios xiruya' richin ninq'et-tzij pa ruwi' chijun ruwach'ulew Egipto. Wakami k'a katanpe wik'in chi'anin.

¹⁰Y xkak'oje' chupan ri ulew Gosen, richin naqaj yak'oje-wi chuwe yin, rat y konojel ri awalk'ual y ri awiy-amam, ri awawej y konojel ri ek'o awik'in.

¹¹Richin man xkixwayjan ta, xkixintzuq re wawe' y kan man jun ri achike ta xtik'atzin chiwe, roma k'a k'o na wo'o' juna' wayjal; keri' tibij chire ri nata' y keri' chuqa' tibij chike ri ek'o pan iwachoch, xcha'.

¹²Y ri José xubij k'a chuqa' chike: Wakami chi'iwonojel rix y rat chuqa' Benjamín, xitz'et chi kan ja yin ri in José y ja yin xibin-el re ch'abel re' chiwe.

¹³Ja tibetzijoj k'a chire ri nata' ronojel ri nuq'ij ri ya'on wawe' pan Egipto y titzijoj chire ronojel ri xitz'et kan rix re wawe'. Anineq k'a kixbiyin richin nibek'ama' ri nata', xcha' ri José.

¹⁴K'ari' ri José xuq'etej k'a ri Benjamín y janila xoq'; chuqa' ri Benjamín xuq'etej ri José y janila xoq' rik'in.

¹⁵K'ari' xerutz'ubaj konojel ri rach'alal, y toq xeruq'etej, janila xoq'. Chirij re', k'ari' xetikir xech'on ri rach'alal rik'in.

¹⁶Y xapon k'a rutzijol pa rachoch ri rey chi ri José xe'apon ri rach'alal rik'in. Ri rey y konojel ri rusamajela' ri e ximil pa samaj janila xekikot, y kan xqa' chikiwech chi xe'apon.

¹⁷Y ri rey xubij k'a chire ri José: Tabij chike ri awach'alal chi tikiya-el ejqa'n chikij ri kiej y ketzolin pa Canaán.

¹⁸Tikik'ama-pe ri atata' y konojel ri awach'alal richin yepe wawe' wik'in y xtinya' ri ulew más utz chike ri k'o wawe' pan Egipto y kan pa ruk'iyal k'a xtibekitija' ri más utz ri yewachin wawe'.

¹⁹Y ri rey xubij k'a chire ri José: Tabij-el chike chi tikik'uaj-el ri carruaje ri ek'o wawe', richin yekik'en-pe ri kixjayilal y ri kalk'ual y chuqa' ri itata' richin yepe re wawe'.

²⁰Y man tikich'ob kan rij ri nik'oje' kan chila', roma ri beyomel richin re ruwach'ulew Egipto kan xtok chuqa' kichin rije', xcha' ri rey chire ri José.

²¹Y ri e ruk'ajol ri Israel kan xqa' wi k'a chikiwech ri xbix chike y keri' xkiben. Y ri José kan xuya' k'a el ri carruaje chike y xuben achi'el xbix chire roma ri rey, xuya-el kiway richin nikitej-el pa bey.

²²Y ri José xuya-el jujun jal kitziaq chikijujunal ri rach'alal, jak'a chire ri Benjamín xuya-el wo'o' jal rutziaq y 300 raqen saqipueq.

²³Y chire ri rutata' xuteq-el lajuj bur ri kik'uan-el jalajoj ruwech beyomel ri ek'o chiri' pan Egipto y lajuj chik bur ri kik'uan-el trigo y wey richin nutej-pe pa bey ri rutata'.

²⁴Toq xerujech-el ri rach'alal xuchilabej-el chike chi man tikibanala-el oyowal pa bey. Y rije' xkichop k'a bey.

²⁵Xe'el k'a pe ri chiri' pan Egipto, richin xebe-q'anej pa kiruwach'ulew Canaán rik'in ri kitata'.

²⁶Y xkiya' k'a ri utzilej rutzijol chire ri kitata' y xkibij chire: Ri José xa k'a k'es na y ja rija' ri okineq q'atoy-tzij pa ruwi' chijun ruwach'ulew Egipto, xecha'. Jak'a ri Jacob toq xrak'axaj ri' xpax ránima roma kan man nunimaj ta ri xkibij chire.

²⁷Y rije' xkitzijoj chire ri kitata' ronojel ri rubin-el ri José chike; jak'a ri Jacob k'a toq xutz'et na ri carruaje ri e taqon-el roma ri José richin nibek'amer-pe, k'ari' janila xkikot ri ránima.

²⁸Y jari' toq xubij: Man ruk'amon ta k'a chi xaxe xinwetamaj-qa chi ri nuk'ajol k'a k'es, kan yibe na chutz'etik, rokik k'a in k'es, xcha'.