Read Kaqchikel Gén 50 Bible Online

Gén 50 - Kaqchikel bible

Gén 50

¹Y ri José xuq'etej k'a ri rutata', janila xoq' y xutz'ubaj.

²Chirij ri' xubij chike ri aq'omanela' ri yesamej rik'in, chi tikaq'omaj ri ruch'akul ri rutata' richin man chi'anin ta niq'ey; y ri aq'omanela' kan keri' wi xkiben chire ri ruch'akul ri Israel.

³Y richin xkaq'omaj xk'atzin k'a kawineq q'ij chike. Roma kan ja q'ij ri' nik'atzin richin niban rutzil jun ch'akulaj. Ri aj-Egipto xkichajij k'a oxk'al lajuj q'ij richin bis roma ri Israel.

⁴Y toq xq'ax kan ri q'ij ri', ri José xbech'on kik'in ri e nima'q taq achi'a' ri ek'o pa rachoch ri rey, y xubij chike chi tikibana' utzil chire chi kebech'on rik'in ri rey y kere' tibekibij chire:

⁵Toq ri nata' niken yan, xuben chuwe richin xinjikiba-nutzij chuwech y xubij chuwe chi rija' nrajo' chi toq xtiken ninbenmuqu' k'a chupan ri jul ri kan k'oton kan richin rija', ri k'o k'a pa Canaán, y chiri' ninbenmuqu-wi. Roma ri' wakami nink'utuj k'a utzil chawe richin taya' q'ij chuwe richin ninbenmuqu' kan ri nata'. Y toq xtimuqutej kan, k'ari' xkitzolin-pe, xcha' ri José chike ri achi'a' ri' richin nikibij chire ri rey.

⁶Y ri rey xubij-pe: Kabiyin k'a el, ja tabemuqu' kan ri atata' achi'el ri rubin kan chawe, xcha-pe.

⁷K'ari' ri José xbe k'a el k'a pa Canaán richin xberumuqu' kan ri rutata' y xtzeqelibex-el koma ri rusamajela' ri rey y ri aj-raqen; nel chi tzij, ri aj pa rachoch y konojel ri aj-raqen richin ri ruwach'ulew Egipto,

⁸konojel k'a ri aj pa rachoch ri José y ri aj pa rachoch ri rutata', xebe chumuqik ri Jacob. Xaxe k'a ri ak'uala' y ri kawej xek'oje' kan pa ruwach'ulew Gosen.

⁹Chuqa' ri winaqi' ri k'o ki-carruaje y ri k'o kikiej xkitzeqelibej-el ri José; e janila e k'iy xkimol-el-ki' richin xbekimuqu' kan ri Jacob.

¹⁰Y toq xe'apon k'a pa ruwach'ulew Goren-ha-atad ri k'o pa relebel-q'ij chire ri raqen-ya' Jordán, chiri' xkiben k'a jun nimalej oq'ej, y ri José kan xuchajij k'a wuqu' q'ij roma ri rukamik ri rutata'.

¹¹Y toq ri winaqi' aj-Canaán ri ek'o chiri', xkitz'et ri nibanatej, xkibij: Janila nim la bis la k'o kik'in la aj-Egipto roma la kikaminaq, xecha'. Y roma ri' ri chiri' xubini'aj Abel-mizraim, ri k'o pa relebel-q'ij chire ri Jordán y re' nel chi tzij, ri oq'ej richin ri Egipto.

¹²Ri ralk'ual ri Jacob kan xkiben k'a achi'el ri rubin kan ri kitata' chike,

¹³xkik'uaj k'a el k'a pa ruwach'ulew Canaán, richin xbekimuqu' kan chupan ri jul ri k'o pa rulew ri Macpelá ri ruloq'on kan ri Abraham rik'in ri Efrón hitita, ri k'o pa relebel-q'ij chire ri Mamré, ri akuchi yemuq-wi konojel rije' toq yeken.

¹⁴Toq xmuqutej k'a kan ri Jacob, ri José xtzolin-qa pan Egipto e rachibilan-el ri rach'alal y konojel ri e tzeqelibeyon kichin.

¹⁵Toq kamineq chik k'a ri Jacob, ri e rach'alal ri José xkich'ob: Rik'in juba' ri José k'a k'o chuk'u'x ri xqaben chire y wakami xtuben ruk'exel chiqe, xecha-qa.

¹⁶Y roma ri' xkiteq-el rubixik chire ri José: Toq k'a k'es na ri qatata' xubij kan chiqe:

¹⁷Kere' tibij chire ri José: Nink'utuj utzil chawe, José, chi takuyu' kimak ri awach'alal, roma kan janila itzel xkiben chawe, chayineq kan. Roma ri' roj re wakami niqak'utuj utzil chawe chi takuyu' qamak roj ri oj rusamajela' ri ru-Dios ri qatata', xecha-el chire ri xkiteq-el. Y toq ri José najin k'a chirak'axaxik ri kitaqon-el rubixik ri rach'alal, ri José janila k'a noq'.

¹⁸Y xe'apon k'a ri rach'alal rik'in, xebexuke' chuwech y xkiqasaj-ki' k'a pan ulew y xkibij chire: Jare' ojk'o pan aq'a', niqayuquba-qi' pa samaj awik'in, xecha' chire.

¹⁹Jak'a ri José xubij chike: Man tixibij-iwi'. Yin man in Dios ta richin ninya' rutojbalil pan iwi'.

²⁰Rix xich'ob chi niben itzel chuwe yin, jak'a ri Dios xixrukusaj richin utz, richin chi nitz'et chi xinkol kik'aslen janila chi winaqi'.

²¹Roma ri' man tixibij-iwi'. Yin kan k'a xkixintzuq na, rix y ri iwalk'ual, xcha'. Keri' k'a xubij ri José richin chi xukuquba' kik'u'x ri rach'alal, y kan rik'in janila ajowabel xch'on kik'in.

²²Ri José y konojel ri e aj pa rachoch kan ri rutata', chiri' k'a pan Egipto xek'oje-wi kan. Ri José xk'ase' 110 juna',

²³y kan k'a xerutz'et na kan ri e ruxikin-mam ri Efraín y chuqa' kan k'a xerutz'et na kan ri ralk'ual ri rumam rubini'an Maquir, ri ruk'ajol ri Manasés. Kan k'a xeruch'elej na k'a ri ak'uala' ri'.

²⁴Xapon k'a jun q'ij toq ri José xubij chike ri rach'alal: Yin xa juba' chik ok in k'es, jak'a ri Dios xtipe richin yixruto' y xkixrelesaj-el re wawe' chupan re ruwach'ulew re' y xkixberuya-q'anej chupan ri ruwach'ulew ri sujun kan chike ri qate-qatata' Abraham, Isaac y ri Jacob, xcha' chike.

²⁵Xujikiba-rutzij ri José chikiwech ri e rijatzul kan ri Israel y xubij chike: Kan qitzij na wi chi ri Dios xtipe richin yixruto' y yixruk'uaj-el y toq xtibanatej re', tik'uaj-el ri nubaqil, xcha' chike.

²⁶Y xken k'a ri José toq k'o chik 110 rujuna'; y xkaq'omaj k'a richin man chi'anin ta niq'ey. K'ari' xkiya' pa jun káxa*f33* ri chiri' pan Egipto.