Read Kaqchikel Gén 6 Bible Online

Gén 6 - Kaqchikel bible

Gén 6

¹Y toq ri winaqi' xek'iyer pa ruwi' ri ruwach'ulew, xek'oje' k'a kimi'al,

²jari' toq ri e ralk'ual ri Dios, xekitz'et chi ri xtani' ri', kan e jebejoj ok y roma ri' xekicha' richin xek'ule' kik'in.*f7*

³Y ri Jehová xubij: Man richin ta jantape' xtik'oje' ri k'aslen rik'in ri wineq ri xinya' chire pa nabey, roma ja ri rurayibel ri ch'akulaj ri uk'uayon kichin. Xaxe chik 120 juna' xke'apon-wi chuwech re ruwach'ulew, xcha'.

⁴Chupan ri q'ij ri', toq ri e ralk'ual ri Dios xek'ule' kik'in ri xtani' ri', y xe'alk'ualan k'a, ek'o k'a achi'a' ri nima'q kipalen*f8* chuwech ri ruwach'ulew ri yekiya' pa k'ayew ri ch'aqa' chik. Y chikij k'a rije' ek'o k'a chuqa' ch'aqa' chik itzel taq achi'a' ri kan e achi'el ri xeq'ax yan ri xek'uluyaj-pe. Jare' ri itzel taq achi'a' ri maneq xibinri'il chikiwech ri yalan xenatex ri ojer kan.

⁵Y ri Jehová xutz'et ronojel ketzelal ri winaqi' chi kan man utz ta ri kibanobal y ri kich'obonik, ri nalex-pe pa taq kánima, kan beneq ruwech janila itzel,

⁶y ri Jehová janila xbison y xq'axon ránima chi xeruk'iytisaj ri winaqi' chuwech re ruwach'ulew.

⁷Y xubij k'a rija': Xkenmes k'a el chuwech re ruwach'ulew ri winaqi' ri xenben y chuqa' ronojel kiwech chikopi' ri ek'o chuwech re ruwach'ulew y ri aj-xik' taq chikopi'; roma kan janila niq'axon ri wánima achike roma xenben, xcha'.

⁸Jak'a ri Noé utz xtz'et roma ri Jehová.

⁹Jare' ri rubanik ri ruk'aslen ri Noé. Rija' jun achin choj ruk'aslen chuwech ri Dios chikikojol ri sol winaqi' chupan ri q'ij ri'. Xa kan xaxe rija' ri xk'ase' achi'el ri xrajo' ri Dios.

¹⁰Y rija' xeralk'ualaj k'a e oxi' ruk'ajol ri xkibini'aj: Sem, Cam y Jafet.

¹¹Jak'a ri winaqi' chuwech re ruwach'ulew kan yojtajineq chik k'a ri kibanobal, kan e jaqatajineq k'a ri winaqi' e banoy ch'a'oj.

¹²Y toq ri Dios xutz'et ronojel re', chi xaxe ri etzelal nikiben chuwech ri ruwach'ulew,

¹³jari' toq rija' xubij chire ri Noé: Xinch'ob chi yenk'is konojel ri k'o kik'aslen chuwech ri ruwach'ulew, roma ri ruwach'ulew k'isineq pa ruk'ayewal, roma ri itzel taq kirayibel y roma ri' xkenmes k'a el konojel chuwech re ruwach'ulew.

¹⁴Jak'a rat tabana' k'a jun nima-barco rik'in che' ri jebel keq; y xtabanala' rutaslen chupan. Y ronojel ri kikojol ri che' xtaq'olij jebel, chirij y chupan.

¹⁵Y kere' k'a rubanik ri xtaben: jumuch' jaj ri raqen, oxk'al jaj rik'in nik'aj ri ruwech, y waqxaqi' jaj rujotolen.

¹⁶Tabana' oxi' wiq*f9* chire y toq xaxe chik ka'i' q'a'aj rik'in nik'aj nrajo' richin man nak'is-q'anej, jari' toq xtiteq'e' kan ri chuxe-ok ri ruwi' y chuqa' xeruxikin ri nima-barco naya' kan jun ruchi'.

¹⁷Yin kan xkenbenjaqa' k'a pe ya' pa ruwi' re ruwach'ulew, y ri ya' kan xkerumuq k'a konojel ri nikijiq'aj kaq'iq' ri ek'o chuxe' ri kaj. Konojel re' xkebek'is.

¹⁸Y awik'in rat ninjikiba-wi ri nutzij, y xkixok k'a chupan ri nima-barco, rat y ri awixjayil; y chi e oxi' ak'ajol, y ri kixjayilal chuqa' rije' xke'ok chupan.

¹⁹Y ronojel k'a ruwech chikopi', pa k'ulaj k'a xke'ok chupan ri nima-barco richin yek'ase' kan awik'in rat.

²⁰Y ronojel k'a kiwech chikopi' xke'ok pa k'ulaj awik'in chupan ri nima-barco, ri aj-xik' taq chikopi' y ronojel kiwech chikopi' ri ek'o chuwech re ruwach'ulew, richin chi man nik'is ta qa ri kijatzul.

²¹Y tayaka' k'a kan ronojel ruwech ri achike xtibek'atzin chiwe richin xtitej y tayaka' k'a kan k'iy chupan ri nima-barco y jari' xtibetija' rix y ri chikopi', xcha' ri Dios.

²²Y ri Noé kan keri' k'a xuben achi'el xubij ri Dios chire.