Read Kaqchikel Gén 7 Bible Online

Gén 7 - Kaqchikel bible

Gén 7

¹K'ari' ri Jehová xubij chire ri Noé: Rat, ri awixjayil, ri e ak'ajol, ri e awali' kixok chupan ri nima-barco; roma xa kan xaxe rat ri choj ri abanobal chinuwech yin chikikojol re sol winaqi' re ek'o wakami.

²Xke'akusaj k'a kan wuqu' k'ulaj chikopi' ri e utz richin kamelabel, jak'a ri ch'aqa' chik ri man e utz ta richin kamelabel, xaxe jujun k'ulaj chi achij chi ixoq xke'akusaj kan.

³Chuqa' ri aj-xik' taq chikopi' e wuqu' k'ulaj chi achij chi ixoq xke'akusaj kan richin man yek'is ta ri kijatzul chuwech re ruwach'ulew.

⁴Roma ri wuqubix-apo, yin xtinbenya-pe ya' kawineq q'ij y kawineq aq'a' y re' kan xtumuq ri ruwach'ulew, y xkenk'is k'a konojel ri k'o kik'aslen y xkenmes k'a el konojel ri e nubanon, ri ek'o chuwech re ruwach'ulew, xcha'.

⁵Y ri Noé kan xuben k'a ronojel ri xbix chire roma ri Jehová.

⁶Y chupan ri q'ij ri' ri Noé k'o chik k'a 600 rujuna', jari' toq xpe ri ya' ri xtumuq ri ruwach'ulew.

⁷Ri Noé, ri rixjayil, ri e ruk'ajol y ri kixjayilal rije' xe'ok k'a chupan ri nima-barco richin yekolotej chuwech ri ya' ri xtumuq ri ruwach'ulew.

⁸Chuqa' xe'ok ri aj-xik' taq chikopi' y ronojel kiwech chikopi' ri ek'o chuwech re ruwach'ulew; ri e utz richin ri kamelabel y chuqa' ri man e utz ta richin kamelabel;

⁹ri chikopi' chi achij chi ixoq xe'ok-apo chupan ri barco ri' rik'in ri Noé, achi'el xubij kan ri Dios chire rija'.

¹⁰Y toq xapon k'a ri wuqu' q'ij, jari' toq xpe ri ya' ri xtimuqun ri ruwach'ulew.

¹¹Y toq ri Noé 600 rujuna', pa ruka'n ik' chire ri juna' ri', ri q'ij wuqlajuj, ja k'a q'ij ri' toq ri ralaxbel-ya' xebebos-pe chuwech re ruwach'ulew, y ri chila' chikaj kan niq'ejej-pe ri ya'.

¹²Y ri job xuben k'a kawineq q'ij y kawineq aq'a'.

¹³Y ri q'ij toq k'o chi nipe ri ya' ri xtimuqun ri ruwach'ulew, jari' toq ri Noé y ri rixjayil, y ri Sem, ri Cam, ri Jafet, y ri kixjayilal rije' xe'ok chupan ri achi'el nima-barco.

¹⁴Chuqa' konojel ri jalajoj kiwech chikopi' ri e richin k'echelaj, ri e richin chuwa-jay, ri e jepejeq y konojel ri jalajoj kiwech aj-xik' taq chikopi'.

¹⁵Konojel re' xe'ok rik'in ri Noé chupan ri achi'el nima-barco ri', y pa k'ulaj k'a xe'ok konojel ri chikopi' ri nikijiq'aj kaq'iq'.

¹⁶Chi achij chi ixoq k'a xe'ok-apo, achi'el rubin kan ri Dios chire ri Noé, y kan ja ri Jehová xtz'apen kan ri ruchi' ri nima-barco ri'.

¹⁷Y ri ya' ri xq'ejej-pe chikaj y ri ya' ri xebebos-pe chuwech ri ruwach'ulew, kan keri' xuben kawineq q'ij chuwech ri ruwach'ulew; y ri ya' xnimer y xutelej-el ri nima-barco ri' chuwech ri ruwach'ulew.

¹⁸Ri ya' kan janila k'a xnimer pa ruwi' re ruwach'ulew y xutelej ri nima-barco y keri' beneq k'a pa ruwi' ri ya'.

¹⁹Kan xnimer janila, roma ri' ronojel ri nima'q taq juyu' ri ek'o chuxe' ri kaj xerumuq kan.

²⁰Chike ri juyu' ri' xjote' chik kaji' jaj rik'in jun q'a'aj pa jotol.

²¹Y xeken k'a konojel ri k'o kik'aslen chuwech ri ruwach'ulew; ri aj-xik' taq chikopi', ri ye'awajix, ri chikopi' richin pa k'echelaj, y konojel ri chikopi' ri e jepejeq, y konojel ri winaqi'.

²²Y keri', konojel ri nikijiq'aj kaq'iq' chuwech re ruwach'ulew xeken.

²³Keri' k'a xbanatej toq xek'is konojel chuwech re ruwach'ulew, nitiker-el rik'in ri wineq y napon k'a rik'in ronojel kiwech taq chikopi', ri nikiqirirej-ki' y ri aj-xik' taq chikopi'; konojel re' xerumes k'a el. Xaxe chik ri Noé y ri ek'o rik'in chupan ri nima-barco ri xek'ase' kan.

²⁴Ri ya' wo'o' ik' k'a xumuq ri ruwach'ulew, toq najlex-pe rik'in ri nabey q'ij toq xbeqaqa-pe ri ya' chikaj y xebebos-pe ri ya' chuwach'ulew.