Read Kaqchikel Gén 8 Bible Online

Gén 8 - Kaqchikel bible

Gén 8

¹Jak'a ri Dios kan xuya-wi ri rutzil pa ruwi' ri Noé y ronojel kiwech chikopi' ri ek'o chupan ri nima-barco ri'; y roma ri' ri Dios xuben k'a chi xq'ax jun kaq'iq' pa ruwi' ri ruwach'ulew y ri ya' xuchop-qa ruqajinen.

²Y ri ralaxbel taq ya' ri xebebos-pe chuwech ri ruwach'ulew xetz'apetej yan k'a chiri', y chuqa' ri ya' ri niq'ejej-pe chikaj xtane' yan, y ri job maneq chik.

³Y ri ya' beneq-qa ruqajinen. Y toq xapon ri wo'o' ik' tumuq ya' ri ruwach'ulew,

⁴chupan ri q'ij wuqlajuj richin ri ik' wuqu' richin ri juna', jari' toq ri nima-barco ri' xbech'oke' pa ruwi' jun rutza'n ri nimalej raqen juyu' Ararat.

⁵Ri ya' beneq k'a qa ruqajinen y k'a chupan ri nabey q'ij chire ri ik' lajuj, richin ri juna' ri' k'ari' xebeq'alajin-pe juba' kitza'n ri nima'q taq juyu'.

⁶Y toq q'axineq chik kawineq q'ij, jari' toq ri Noé xujeq ri ventana richin ri nima-barco ri'.

⁷Xrisq'opej k'a el jun qo'ch y re qo'ch re' nibe-nipe nibe-nipe rokik royoben chi nichaqer ri ruwach'ulew.

⁸K'ari' xuteq-el jun paloma, richin niberutz'eta' kan wi xk'is yan qa ri ya' chuwech ri ruwach'ulew.

⁹Y ri ti paloma ri' kan man xril ta akuchi xpa'e-wi y k'ari' xtzolin-pe chupan ri nima-barco ri', roma ri ya' k'a k'o na pa ruwi' ri ruwach'ulew. K'ari' ri Noé xukusaj chik apo ri ti paloma rik'in.

¹⁰Y toq xapon k'a ri ruwuq q'ij, ri Noé xuteq chik jun bey ri ti paloma.

¹¹Y ri ti paloma ri' xtzolin k'a tiqaq'ij y rutzuken-el jun ruxaq olivo; y rik'in ri' ri Noé xretamaj chi maneq chik ya'.

¹²Y rija' kan k'a xroyobej na jun chik wuqu' q'ij, k'ari' xuteq chik el ri ti paloma y ri' kan man xtzolin ta chik pe rik'in.

¹³Y ri Noé 601 chik k'a rujuna', chupan ri nabey q'ij chire ri nabey ik', jari' toq ri ya' xk'is-qa chuwech ri ruwach'ulew. Y ri Noé xrelesaj-el ri ruwi' ri nima-barco y xutz'et chi ri ruwach'ulew peteneq ruchaqirinen.

¹⁴Chupan ri q'ij juwineq wuqu' chire ri ruka'n ik', jari' toq jebel chaqi'j chik ri ruwach'ulew.

¹⁵K'ari' xch'on ri Dios rik'in ri Noé y xubij chire:

¹⁶Noé, katel-pe chupan ri nima-barco, chuqa' ri awixjayil, ri e ak'ajol, y ri kixjayilal rije'.

¹⁷Chuqa' ke'awelesaj k'a pe konojel ri chikopi' ri ek'o awik'in, ri aj-xik' taq chikopi', ri nima'q taq chikopi' y ri e jepejeq, richin yebe chuwech re ruwach'ulew; y ke'alan k'a y kek'iyer k'a chuwech re ruwach'ulew, xcha' ri Dios chire ri Noé.

¹⁸K'ari' xel-pe ri Noé y ri rixjayil, y chi e oxi' ruk'ajol y ri kixjayilal rije'.

¹⁹Y chikij rije' xe'el-pe pa taq tzobaj konojel ri jalajoj kiwech taq chikopi', ri e jepejeq, ri aj-xik' taq chikopi'. Konojel k'a xe'el-pe chupan ri nima-barco.

²⁰Y ri Noé xuben k'a q'anej jun porobel richin xusuj kamelabel chire ri Jehová y xeberuk'ama-pe chikikojol ri aj-xik' taq chikopi' y ri ch'aqa' chik ri e utz richin kamelabel y xeruporoj chuwech rija'.

²¹Y ri Jehová kan xqa' chuwech y kan nijubulin ri ruxla' ri kamelabel, y xubij pa ránima: Man jun bey chik xtinya' ruk'ayewal pa ruwi' re ruwach'ulew roma ri rumak ri wineq; stape' ri wineq xaxe nuch'ob nimakun ri k'a pa ralaxik-pe; kan man k'a xkenkamisaj ta chik konojel ri k'o kik'aslen, achi'el re xinben wakami.

²²Rokik nik'oje' re ruwach'ulew xtik'oje' tiko'n y kan xtiwachin. Y man jun bey k'a xtik'is ri tew, ni ri k'aten, ri job y ri saq'ij, ni ta ri paq'ij y ni ta ri aq'a', xcha' ri Dios.