Read Kaqchikel Gén 9 Bible Online

Gén 9 - Kaqchikel bible

Gén 9

¹Ri Dios xerurtisaj ri Noé y ri e oxi' ruk'ajol y xubij chike: Kixalk'ualan y kixk'iyer y kan tinojisaj k'a ruwech chijun ruwach'ulew.

²Ronojel kiwech chikopi' richin ri ruwach'ulew xkebaybot k'a roma xibinri'il y kan xtik'oje' k'a ikiy chikiwech: Konojel ri aj-xik' taq chikopi', ri chikopi' ri ek'o pa ya' y konojel ri k'o kik'aslen kek'oje' pan iq'a'.

³Chuqa' utz ye'itej ri kitijul ri chikopi'; chuqa' ninya' q'ij chiwe richin nitej ronojel ruwech ichaj.

⁴Y ja k'a ri ti'ij ri k'a k'o na kik' ruk'uan man titej, roma chiri' k'o-wi ri k'aslen.

⁵Roma kan qitzij ninbij chiwe, chi wi k'o jun chikop nukamisaj jun chiwe rix, k'o chi xtinch'ojij ri ik'aslen chire; y wi jun chiwe rix nukamisaj jun chik wineq, chuqa' xtinch'ojij ri ruk'aslen chire.

⁶Jun wineq kan achi'el nubanik yin, y wi k'o ta jun xtikamisan jun wineq, ri xtibanon xa kan xtiqaqa chuqa' pa ruq'a' jun chik wineq.

⁷Y rix kan xkek'oje' e k'iy iwijatzul y kan xkixwinaqir y kan xtinojisaj re ruwach'ulew, xcha'.

⁸Y ri Dios xch'on k'a rik'in ri Noé y ri ralk'ual y xubij chike:

⁹Yin xtinjikiba-nutzij iwik'in rix, y toq rix xa ix maneq chik, xa kik'in chik k'a ri iwijatzul.

¹⁰Y chuqa' xtinjikiba' ri nutzij kik'in konojel ri chikopi' ri xe'el-pe chupan ri nima-barco: Ri aj-xik' taq chikopi', ri chikopi' e richin k'echelaj y konojel ri ek'o chuwech re ruwach'ulew.

¹¹Kan ninjikiba' k'a nutzij iwik'in rix chi man jun bey chik xkenkamisaj konojel ri winaqi' y ri chikopi' rik'in ri ya' ri xumuq re ruwach'ulew. Kan man jun bey chik xtink'is re ruwach'ulew rik'in re ruk'ayewal re', xcha'.

¹²Y chuqa' ri Dios xubij k'a: Jare' ri retal ri jikibel-tzij ri ninben iwik'in y kik'in konojel kiwech chikopi' ri ek'o chi'ikojol, y keri' kik'in ri ch'aqa' chik sol winaqi':

¹³Ri kotoq'a' ri xinya' pa sutz' jari' ri retal ri jikibel-tzij chiqakojol roj, yin y ri ruwach'ulew.

¹⁴Y ronojel bey toq yin xtinben richin nipe jun molaj sutz' pa ruwi' re ruwach'ulew y xtitz'etetej ri kotoq'a' chupan ri sutz',

¹⁵jari' toq xtinnataj chik ri nujikibel-tzij ri xinben yin iwik'in rix, y kik'in ronojel kiwech chikopi' ri k'o kik'aslen. Y man jun bey chik xtinya-pe ri ya' ri xmuqun ri ruwach'ulew pa kiwi' ri ek'o chuwech re ruwach'ulew.

¹⁶Xtik'oje' ri kotoq'a' pa sutz', y ri' xtunataj chuwe ri jikibel-tzij richin q'asen ri nubanon yin kik'in konojel winaqi' y ri chikopi' ri ek'o chuwech ri ruwach'ulew, xcha'.

¹⁷Y keri' ri Dios xubij chire ri Noé: Ja k'a retal re' ri jikibel-tzij ri xinya' kan chike konojel winaqi' y ri chikopi', xcha' ri Dios.

¹⁸Ri ralk'ual ri Noé ri xe'el-pe chupan ri nima-barco, ja ri Sem, ri Cam y ri Jafet. Ri Cam jari' ri rutata' ri Canaán.

¹⁹Re e oxi' achi'a' re' jare' ri e ruk'ajol ri Noé y koma rije' xek'iyer chik winaqi' chuwech chijun ruwach'ulew.

²⁰Y toq q'axineq chik ronojel re', ri Noé roma jun tikonel, xusamajij-qa ri ulew y xerutik-qa uva;

²¹Y toq rija' xutej k'a vino, xq'aber-qa y xpune' chiri' pa nik'aj rachoch ri banon rik'in tzieq y maneq k'a rutziaq chirij.

²²Y ri Cam, ri rutata' ri Canaán, xa xutz'et k'a kan chi ri rutata' maneq rutziaq; jak'a rija' xa xuchop rutzijoxik chike ri e ka'i' runimal ri ek'o kan chuwa-jay.

²³K'ari' ri Sem y ri Jafet xkik'uaj-apo jun tzieq y xkiya-el chuwi-kitele'n y chikij xebiyin-apo richin chi xkikuch kan ri kitata' richin man xkitz'et ta chi maneq rutziaq.

²⁴Y toq xq'ax yan el ri q'abarik chuwech ri Noé, jari' toq xretamaj chi ri Cam, ri ruch'i'p, xutzijoj ri xuben rija'.

²⁵Y ri Noé xubij k'a: Kan tiqaqa k'a ri itzel pa ruwi' ri Canaán, rija' xtok jun wineq ri xtiyuqe' pa samaj, kan xtok k'a jun chaq relik samajel kichin ri rach'alal.

²⁶Y chuqa' xubij: Nim ruwa-ruq'ij ri Jehová ri qa-Dios, ri ru-Dios ri Sem, y ja ri Canaán jari' ri xtiyuqe' pa samaj rik'in.

²⁷Y ri Dios kan xtunimirisaj ta ri Jafet, y xtik'oje' ta pa taq rachoch ri Sem, y ri e rijatzul ri Canaán xkeyuqe' pa samaj rik'in, xcha'.

²⁸Toq q'axineq chik k'a ri ya' ri xmuqun ri ruwach'ulew, ri Noé k'a xk'ase' na 350 juna'.

²⁹Y ri Noé xk'ase' k'a el chuwech re ruwach'ulew 950 juna'; y k'ari' xken.