Read Kaqchikel 2 Sam 10 Bible Online

2 Sam 10 - Kaqchikel bible

2 Sam 10

¹Chirij k'a ronojel re' xken ri Nahas, ri ki-rey ri amonita y pa ruk'exel rija' xk'oje' kan ri ruk'ajol rubini'an Hanún.

²K'ari' ri David xuch'ob chi xtujoyowaj ruwech ri Hanún, achi'el xuben rik'in ri rutata'. Y xeruteq k'a el ka'i-oxi' tata'al richin nibekikuquba' ruk'u'x roma xken ri rutata'. Jak'a toq xe'apon pa kiruwach'ulew ri amonita,

³ri e tata'al chikikojol ri amonita xkibij chire ri ki-rey: ¿Nanimaj rat chi ri rey David roma xuya' ruq'ij ri atata', roma ri' xeruteq-pe tata'al richin nokikuquba' kan ak'u'x? ¿Man e rutaqon ta kami pe xaxe richin noketamaj kan jebel re tinamit richin xqojkik'is?, xecha'.

⁴Roma ri' ri Hanún xeruchop ri tata'al ri e rutaqon-el ri David, y xusokaj-el nik'aj chire ri rusumal-kichi' ri k'o juk'an chire ri kichi'; y xutzak'ij-el ri kitziaq richin pa xulan y xapon-q'anej k'a tzan-kacheq. Y k'ari' xeruteq-el.

⁵Y ri tata'al ri' kan janila k'a xek'ixbitej. Y toq xrak'axaj ri David, xeruteq-el uk'uey rutzijol kik'in richin xbekibij chike chi kek'oje' kan pa Jericó, k'a toq xtik'iy na pe ri rusumal-kichi' k'ari' xketzolin pa Jerusalem.

⁶Y toq ri amonita xkinabej chi ri David janila chik itzel yerutz'et, jari' toq xekitoj e 20,000 aj-labal ri yebe chikaqen ri e aj-Siria ri ek'o pa tinamit Bet-rehob y ri ek'o pa tinamit Sobá. Chuqa' xekitoj-el e 1,000 achi'a' ri e aj-Maacá, y 12,000 achi'a' e aj-Is-tob.

⁷Toq ri rey David xrak'axaj re', xuteq-el ri Joab y xerucha-el ri aj-labal ri más e utz richin yebe rik'in.

⁸Y xe'el k'a pe ri amonita, y xkicholajij-ki' chuchi' ri tinamit richin yebe pan oyowal. Jak'a ri aj-Siria, ri aj-Sobá, ri aj-Rehob, ri aj-Is-tob y ri aj-Maacá; rije' xkicholajij-ki' juk'an chik ri chiri' pa juyu'.

⁹Toq xutz'et ri Joab chi ri e etzelanel kichin ek'o chikij y chikiwech, jari' toq xeruteq ri achi'a' ri e cha'on-pe ri e richin ri ruwach'ulew Israel, y xkicholajij-ki' richin nikiben oyowal kik'in ri aj-Siria y ri ch'aqa' chik ri ek'o kik'in.

¹⁰Y xerujech k'a ch'aqa' achi'a' pa ruq'a' ri Abisai ri rach'alal, richin xkicholajij-ki' richin yekik'ul ri amonita chi oyowal.

¹¹Y xubij chire ri Abisai chi wi ri aj-Siria yetikir más chuwech rija', ri Abisai k'o chi nuto'. Y wi ja ri amonita más yetikir chuwech ri Abisai, ri Joab k'o chi nuto'.

¹²Y xubij chik ri Joab: Man qojmayamo-qa; xa kan tiqatija' qaq'ij, koma ri qawinaq ri chuqa' e ruwinaq ri Dios. Y ja rija' xtibin ri achike ruk'amon chi niqaben, xcha'.

¹³K'ari' ri Joab y ri aj-labal ri e beneq chirij, xekichop chi oyowal ri aj-Siria y ri ch'aqa' chik. Jak'a ri aj-Siria xa xe'animej-el chikiwech rije'.

¹⁴Toq xkitz'et ri amonita chi xa xe'animej-el ri e kachibil chikiwech ri aj-Israel, chuqa' rije' xe'animej chuwech ri Abisai y kan xe'ok chupan ri kitinamit. K'ari' ri Joab y ri aj-labal man xekitzeqelibej ta chik, y xa xetzolin pa Jerusalem.

¹⁵Toq ri aj-Siria xkina' chi xa xech'akatej koma ri aj-Israel, kan xkimol chik k'a ki' jun bey.

¹⁶Y ri Hadad-ézer xuteq kik'amik ch'aqa' chik aj-Siria ri ek'o juk'an chik chire ri raqen-ya' Éufrates. Y re' xe'apon pa tinamit Helam. Y ri aj-raqen pa kiwi' rije', ja ri Sobac.

¹⁷Jak'a toq ri David xrak'axaj re', rija' xerumol k'a ri aj-labal richin Israel, y kan jari' xkichop-el bey. Xkiq'axaj ri raqen-ya' Jordán, y xe'apon chunaqaj ri tinamit Helam. Jari' toq ri aj-Siria xkicholajij-ki' richin xkiben oyowal rik'in ri David.

¹⁸Jak'a ri aj-Siria xa xe'animej chik chikiwech ri aj-Israel. Y rije' xekikamisaj kan e 40,000 achi'a' aj-Siria ri yech'oke' chirij kiej y 700 achi'a' ri e beneq pa carruaje.

¹⁹Toq xkitz'et konojel ri rey, ri yeto'on richin ri Hadad-ézer chi ri israelita xech'akon, jari' xkitun-apo-ki' kik'in ri aj-Israel richin xekisamajij. Y kan jari' toq ri aj-Siria man xekito' ta chik ri amonita roma xibinri'il.