Read Kaqchikel 2 Sam 11 Bible Online

2 Sam 11 - Kaqchikel bible

2 Sam 11

¹Xbanatej k'a chi chupan ri ruq'ijul ri saq'ij, toq ri rey ye'el-el richin yebe pan oyowal, jari' toq ri David xuteq-el ri Joab, konojel ri aj-labal y ri e aj-raqen pa kiwi'. Richin xekik'is konojel ri amonita, y xkisutij-rij ri tinamit Rabá. Jak'a ri David man xbe ta kik'in, xa xk'oje' kan pa Jerusalem.

²Y k'o k'a jun q'ij, toq xqaq'ij-qa, ri David xyakatej-el pa ruwarabel y xbek'astan-q'anej pa ruwi' ri rachoch. Y k'a chiri' xutz'et-qa jun ixoq ri natin y kan janila jebel ok.

³Ri ixoq ri' natin richin nuch'ajch'ojirisaj ri' roma xq'ax kan ri ruyabil richin chi ik'. K'ari' ri David xuteq-el jun rusamajel richin xberuk'utuj achike ixoq ri'. Y toq xtzolej ri samajel, xubij chi ri ixoq ri' rubini'an Betsabé rumi'al ri Eliam, y rixjayil ri Urías ri hitita. K'ari' xeruteq-el rusamajela' richin xbekik'ama' ri Betsabé. Y rija' xuk'en-qa ri ixoq y xk'oje' rik'in. Chirij ri' ri ixoq xtzolin chik chirachoch.

⁵Toq xq'ax yan juba' q'ij, ri ixoq xunabej chi royoben jun ak'ual. Y re' xuteq rubixik chire ri David.

⁶K'ari' ri David xuteq rubixik chire ri Joab chi tutaqa-pe ri Urías ri hitita. Y ri Joab kan xuteq k'a pe ri Urías rik'in ri David.

⁷Toq ri Urías xapon, ri rey David xuk'utuj rutzil ruwech ri Joab y rutzil kiwech konojel ri aj-labal. Y xuk'utuj chuqa' achike beneq ri labal.

⁸Chirij ri' ri David xubij chire chi tibe chirachoch y tuch'ajch'ojirisaj-ri'. Xel k'a el ri Urías chiri' pa rachoch ri rey richin nibe ta chirachoch. Y ri David xuteq-el q'utun richin nusipaj chire.

⁹Jak'a ri Urías xa man xbewer ta pa rachoch, xa xwer-qa chiri' chuchi' ri rachoch ri rey kik'in konojel ri samajela'.

¹⁰Y toq ri David xunabej chi ri Urías xa man xbe ta pa rachoch, xuk'utuj k'a chire: ¿Achike roma man xabe ta pan awachoch toq xa janila nej at peteneq-wi?, xcha'.

¹¹Jak'a ri Urías xubij chire ri David: Ri káxa richin ri rujikibel-tzij ri Jehová xa pa juyu' k'o-wi kan. Keri' chuqa' konojel ri aj-labal, ri aj-raqen pa kiwi' y ri wajaw Joab xa pa juyu' ek'o-wi kan. ¿K'a ta ri' yin xkiwa' xkinuk'ya' y xkiwer ta rik'in ri wixjayil pa wachoch? Kan qitzij ninbij chawe chi rokik at k'es rat, yin man xtinben ta keri', xcha'.

¹²K'ari' ri David xubij chire chi tik'oje' chik qa chiri' pa Jerusalem ri aq'a' ri', y k'a ja ri ruka'n q'ij ri xtuteq chik el pan oyowal. Y ri Urías xk'oje' chik k'a qa chiri' ri aq'a' ri'.

¹³Ri David xroyoj chik k'a ri Urías richin niwa-nuk'ya' rik'in. Y xuben chire chi janila xq'aber. Man rik'in ri' man xbe ta chik pa rachoch, xa xwer chik kan kik'in ri samajela' chiri'.

¹⁴Toq xseqer-q'anej ri rey xutz'ibaj-el jun wuj chire ri Joab, y xuya' el pa ruq'a' ri Urías.

¹⁵Ri wuj ri' nubij chire ri Joab chi tuya' ri Urías chuwech ri oyowal akuchi k'o-wi más ruk'ayewal, y tikijech'ej-el-ki' rik'in richin niken.

¹⁶Ri Joab kan xuben k'a ri xbix-el chire. Y toq xkisutij ri tinamit, jari' toq xuya' ri Urías ri akuchi más k'ayew rubanon ri oyowal.

¹⁷Y toq ri aj-Rabá xe'el-pe pa tinamit richin xkiben oyowal kik'in ri israelita, xekikamisaj k'a jujun chike ri israelita. Y xken chuqa' ri Urías.

¹⁸K'ari' ri Joab xuteq rutzijol chire ri David ronojel ri najin pan oyowal.

¹⁹Y chuqa' xubij-el chire ri uk'uey rutzijol: Toq xkatane-qa chutzijoxik chire ri rey ronojel achike rubanon ri oyowal,

²⁰rik'in juba' rija' xtiyakatej royowal, y xtuk'utuj chawe achike roma xojel-apo chunaqaj ri tinamit, roma kan qetaman chi xa ek'o ta ri xek'aqon-pe pa ruwi' ri tz'aq.

²¹Y xtunataj ta chawe ri rukamik ri Abimélec ruk'ajol ri Jerubaal, chi rija' xa jun ixoq aj-Tebés ri xk'aqon-pe jun abej chirij k'a chiri' pa ruwi' ri tz'aq. Y chirij ri' xtuk'utuj chik chawe ri achike roma janila xojel-apo chunaqaj ri tz'aq. K'ari' toq rat xtabij chire chi chuqa' ri Urías ri heteo xken, xcha'.

²²Xbe k'a ri uk'uey rutzijol, y ronojel ri xbix-el chire roma ri Joab xberubij chire ri David.

²³Y kere' k'a xubij: Ri e etzelanel qichin xe'el-pe pa tinamit richin nikiben oyowal qik'in y kan oj kich'akon k'a. Jak'a roj xqaben chike chi xetzolin k'a chuchi' ri kitinamit.

²⁴Jak'a ri ch'abnela' richin chiri' ri ek'o pa ruwi' ri tz'aq xekik'eq-pe chi ch'ab ri qachibil, y xeken e ka'i-oxi'. Y chikikojol rije' xken chuqa' ri Urías ri heteo, xcha'.

²⁵Y ri David kere' xubij chire ri ya'ol rutzijol richin nubij chire ri Joab: Man taxibij-awi' roma re', roma ri pa labal xa kan kere' nibanatej; y kan ek'o-wi ri yeken. Kan tatija' k'a aq'ij richin nichop ri tinamit, y nik'is jumul, xcha-el.

²⁶Toq ri Betsabé xrak'axaj chi xken ri rachijil, kan xbison y xuchajij ri rubis.

²⁷Toq xq'ax yan ri q'ij richin bis, jari' toq ri David xuteq ruk'amik ri Betsabé richin xbek'oje' pa rachoch. Xok k'a rixjayil y xalex jun kalk'ual. Jak'a ri xuben ri David, kan itzel xutz'et ri Jehová.