Read Kaqchikel 2 Sam 12 Bible Online

2 Sam 12 - Kaqchikel bible

2 Sam 12

¹Ri Jehová xuteq-el jun q'alajirisey ruch'abel rik'in ri David ri rubini'an Natán y xubij chire: Ek'o k'a e ka'i' achi'a' pa jun tinamit; ri jun beyom y ri jun chik man jun k'o rik'in.

²Ri beyom k'o k'a janila chi kokoj y nima'q taq awej rik'in.

³Jak'a ri jun xa kan man jun chik k'o rik'in, xa kan xaxe jun ti rukarne'l ri ruloq'on y ruk'iytisan-q'anej y ri ti karne'l ri', jantape' k'a k'o rik'in rija' y kik'in ri taq ralk'ual. Kan junan yewa', junan ye'uk'ya' y junan yewer. Y ri ti rukarne'l ri' kan achi'el k'a jun ti rumi'al rubanon chire.

⁴K'o k'a jun q'ij, xapon jun achin rik'in richin niberuq'ejela'. Jak'a ri beyom kan xupoqonaj xukamisaj jun chike ri rawej richin xuben q'utun chire richin xuya' chire ri xapon chuq'ejeloxik. Jak'a xa xberumaja-pe ri ti rukarne'l ri achin ri xa kan xaxe ri jun ti karne'l ri k'o rik'in. Xukamisaj k'a y xuben q'utun chire, xcha' ri Natán.

⁵Toq ri David xrak'axaj ri', xyakatej janila royowal chirij ri xbanon keri', y xubij chire ri Natán: Ninya' nutzij chuwech ri Jehová, chi ri xbanon keri' kan ruk'amon richin nikamisex.

⁶Nabey chuwech ri' k'o chi nutoj ri ti karne'l kaji' mul, roma keri' xuben y man xujoyowaj ta ruwech ri man jun k'o rik'in, xcha' ri David.

⁷K'ari' ri Natán xubij chire ri David: Ja rat ri' ri xabanon keri'. Roma ri' kan tawak'axaj k'a ri nubij ri Jehová, ri qa-Dios chawe: Yin xinqasaj aceite pan awi' richin xatok rey pa ruwi' ri tinamit Israel, y xatinkol pa ruq'a' ri Saúl.

⁸Xinya' ri rachoch pan aq'a', chuqa' ri ixoqi' ri e richin kan rija'. Chuqa' xinya' chawe ri ajawaren richin ri Israel y ri Judá. Y wi ta ti juba' ok re', yin kan xinya' ta chik más chawe.

⁹¿Achike roma man xaya' ta rejqalen ri nuch'abel, y xa xaben itzel chinuwech? Xakamisaj k'a chi espada ri Urías ri heteo, y kan xok-qa awixjayil ri rixjayil rija'. Roma xakamisaj ri Urías rik'in ri ki-espada ri amonita,

¹⁰xinawetzelaj yin y xak'en-qa ri rixjayil ri Urías. roma ri' kan jantape' k'a xkeken ri e aj pan awachoch.

¹¹Re ruk'ayewal re' xtipe pan awi' y kan ja ri e aj pan awachoch ri xkek'amon-pe pan awi'. Kan chawech rat xkenk'uaj-el ri awixjayilal y xkenjech chire jun chike ri aj pan awachoch, richin xtik'oje' kik'in. Y re' man pan ewel ta xtibanatej-wi, roma xa kan chijun re tinamit xtitz'eton. Rat abanon-pe ri mak ri' pan ewel, jak'a yin xtinben richin xtiq'alajin chuwech chijun re ruwach'ulew Israel. Yin Jehová ri yibin, xcha' ri Natán.

¹³K'ari' ri David xuq'alajirisaj chuwech ri Natán chi kan makuwineq-wi chuwech ri Jehová. K'ari' ri Natán xubij chire ri David chi ri Jehová kan xukuy yan ri rumak, y man xtrelesaj ta ri ruk'aslen.

¹⁴Y roma xaben ri mak ri', chuqa' xaben chire ri Jehová chi maneq rejqalen chikiwech ri e etzelanel richin, roma ri' ri ak'ual ri k'a juba' talex, xa xtibeken, xcha'.

¹⁵Chirij ri' ri Natán xtzolin chirachoch. Y jari' toq ri Jehová xuya-pe jun nimalej yabil pa ruwi' ri ak'ual ri'.

¹⁶K'ari' ri David xmewayin y xuk'utuj chire ri Dios chi man ta niken ri ak'ual. Y ri pa taq chaq'a' toq nitzolej pa rachoch, kan pan ulew k'a nikotz'e-wi kan.

¹⁷Y ri achi'a' ri k'o kiq'ij ri ek'o pa rachoch, xebe rik'in richin nikiyek-q'anej pan ulew. Jak'a rija' man xrajo' ta, y man xutej ta ruway kik'in.

¹⁸Y chupan ri ruwuq q'ij chi tuchop yabil ri ak'ual, xa xken. Jari' toq ri rusamajela' ri David nikixibij-ki' nikibij-apo chire chi xken ri ak'ual. Y nikibila' chikiwech: Toq k'a k'es ri ak'ual, yojch'on rik'in y man nrajo' ta yojrak'axaj; ¿K'a ta la' chik re wakami chi xtiqabij-apo chire chi xa xken ri ak'ual?, yecha'.

¹⁹Ri David e rutzuliben-apo ri rusamajela' toq pan ewel yech'on chikiwech, y xq'ax chuwech chi ri ak'ual xa xken yan. Roma ri' xuk'utuj k'a apo chike wi xken ri ak'ual. Y rije' xkibij chi ja'.

²⁰K'ari' ri David xyakatej-q'anej pan ulew, xatin, xuyala-el jubulej taq aq'om chirij y xukusaj-el ri rutziaq. K'ari' xbe pa rachoch ri Jehová richin xuya' ruq'ij. Toq xtzolin chirachoch, xuk'utuj ruway y xwa-xuk'ya'.

²¹Y ri rusamajela' xkibij chire: ¿Achike roma toq k'a k'es na ri ak'ual, man jun nawajo' richin natej y k'a xken na, k'ari' xayakatej-pe y xatej away?, xecha' chire.

²²Y rija' xubij: Toq k'a k'es na ri ak'ual, yin man xiwa' ta y janila xinoq' y xinbij chi rik'in ta juba' ri Dios nujoyowaj nuwech richin man niken ta el ri ak'ual.

²³Jak'a re wakami xa xken. ¿Achike ta chik k'a roma man yiwa' ta? ¿Yitikir kami yin xtinben ta chire richin xtik'astej chik pe jun bey? Ja yin ri yibe rik'in rija', jak'a rija' man xtitzolin ta chik pe wik'in yin, xcha'.

²⁴Chirij re' ri David xukuquba' ruk'u'x ri Betsabé ri rixjayil. Xk'oje' chik k'a jun bey rik'in, y rija' xk'oje' k'a jun chik ti ral. Y re ak'ual re' xubini'aj Salomón, y re' kan janila k'a xajowex roma ri Jehová.

²⁵Y roma ri' ri Jehová xuteq k'a el ri Natán rik'in ri David richin xberubij chi ri ak'ual ri' chuqa' xtubini'aj Jedidías.*f7*

²⁶Rokik xbanatej ronojel re', ri Joab ruchapon k'a oyowal rik'in ri tinamit Rabá kichin ri amonita. Y xuchop yan k'a ri chajibel richin ri yakbel-ya'. Y xuteq rutzijol rik'in ri David pa ruwi' ronojel re'.

²⁸Y xubij-el: Ke'amolo' ri ch'aqa' chik aj-labal richin yixpe y nisutij-rij ri tinamit, y tichapa' chi oyowal richin keri' ri tinamit man xtok ta kan pa nubi' yin, xcha-el.

²⁹K'ari' ri David xerumol k'a ri aj-labal, y xkichop oyowal rik'in ri tinamit Rabá, y kan xkich'ek.

³⁰Ri David xrelesaj k'a ri ru-corona ri rey richin ri Rabá. Y ri corona ri' xya'ox pa rujolon rija'. Ri ralal jubama oxk'al wolajuj libra y banon rik'in q'anapueq y kan k'o k'a jebelej taq abej chirij. Chuqa' xumej-el chuwi-kiq'a' ri amonita ronojel ri k'o rejqalen.

³¹Y ri winaqi' ri man xeken ta, xeruya' pa samaj. Xesamej k'a rik'in qupibel-che' y rik'in ikej, y chuqa' xkisamajij ri ulew. Chuqa' xuben chike chi xkiben xan. Y kan keri' k'a xuben chike ri ch'aqa' chik kitinamit ri amonita. Chirij re' ri David y konojel ri aj-labal xetzolin pa kitinamit Jerusalem.