Read Kaqchikel 2 Sam 14 Bible Online

2 Sam 14 - Kaqchikel bible

2 Sam 14

¹Ri Joab ral ri Seruiá, toq xunabej chi ri ránima ri rey David nibison roma ri Absalón,

²jari' toq xuteq ruk'amik jun ixoq aj-Tecoa ri kan janila nowineq. Y xuk'utuj utzil chire chi tubana-el achi'el xa ta janila nibison, y tukusaj-el tzieq richin bis, y man tuya-el jubulej aq'om chirij. Chuqa' xubij chi chirij ri' tapon rik'in ri rey, y tubana' chi achi'el xa ta k'iy yan juna' k'o-pe pa bis roma k'o jun ri xken rik'in.

³Y xubij k'a el chire ri ch'abel ri k'o chi xtubij chire ri rey toq xtapon rik'in.

⁴Xok k'a apo ri ixoq ri' rik'in ri rey, xulukuba-qa ri' k'a pan ulew, retal richin xuqasaj-ri' chuwech, y xuk'utuj utzil chire.

⁵Y ri rey xuk'utuj chire ri achike xuk'uluwachij. K'ari' rija' xubij: Kan qitzij ninbij chawe chi yin in malka'n.

⁶Y ek'o k'a e ka'i' wal alaboni'. Y rije' xech'ayon-ki' pa juyu'; y kan man jun k'o chiri' richin xch'aron kichin. Roma ri' ri jun xukamisaj ri rach'alal.

⁷Y wakami konojel ri qach'alal e yakatajineq chuwij, y nikibij chi tinjacha-el chike ri xkamisan ri rach'alal richin chi nikikamisaj. Re' xa roma k'a nikajo' chi nikik'en kan ri k'o chi nrichinaj kan ri wal ri k'es. Y wi xtikiben keri', kan xtikichup k'a qa ri ruk'isibel ruxaq-q'aq' ri k'a k'o kan wik'in, y keri' xtik'is-qa ri rijatzul ri wachijil y man jun xtinatan richin chuwech re ruwach'ulew, xcha'.

⁸K'ari' ri rey xubij chire ri ixoq chi titzolin chirachoch, y ja rija' xtichojmirisan ronojel.

⁹Jak'a ri ixoq xubij: Ni, wajaw yin. Taya' q'ij chuwe chi yin xtinchojmirisaj re' richin keri' ja yin xkinejqalen ronojel re', y man jun xtawejqalej rat, ni ri aq'atbel-tzij, xcha'.

¹⁰K'ari' ri David xuya' rutzij chi wi k'o jun ri xtich'on chik itzel chirij ri ixoq ri', k'o chi nuk'uex chuwech rija', richin keri' man jun chik tuben.

¹¹K'ari' ri ixoq xuk'utuj utzil chire chi tujikiba-rutzij chuwech ri Jehová chi wi k'o ta jun ri najowan nikamisan richin ri ral, kan tubana' chire chi man chik tuben keri'. Toq ri David xrak'axaj keri', kan xujikiba' k'a chuwech ri Jehová chi kan man jun rusumal-ruwi' ri ral, xtitzaq pan ulew.

¹²Chirij ri' ri ixoq xuk'utuj chik utzil chire ri rey richin tuya' q'ij chire chi nich'on chik juba'. Y ri rey kan xuya' q'ij chire.

¹³Y ri ixoq xubij: ¿Achike k'a roma abanon jun ch'a'oj qik'in roj ri rutinamit ri Dios? Roma rik'in ri xabij chuwe, nel chi tzij chi rat at aj-mak, roma man nawajo' ta richin nitzolin-pe ri ak'ajol ri animajineq-el.

¹⁴Kan qitzij wi chi qonojel k'o chi yojken, roma roj xa oj achi'el ya' ri nitix pan ulew, ri xa nichaqi'j-qa. Jak'a ri Dios man nrajo' ta nrelesaj ruk'aslen jun wineq. Xa kan nukanoj rubanik richin nitzolej jun ri animajineq-el richin nik'oje' chik kik'in ri rach'alal.

¹⁵Y wakami xipe yin richin nonbij re' chawe rat rey, roma ri winaqi' xkiben chuwe richin xinxibij-wi'. Y yin xinbij chi más utz yich'on awik'in rat, roma rik'in juba' naben ri xinbij chawe.

¹⁶Rat nu-rey kan xawak'axaj k'a ri nuch'abel, y xajikiba' atzij chi kan xqojakol-wi y man jun xtelesan ri k'o chi nrichinaj ri wal.

¹⁷Ri xabij wakami kan xuben chuwe richin xkuqer-el nuk'u'x, roma rat rey kan awetaman naya' rukojol ri utz y ri man utz ta achi'el nuben jun ángel richin ri Dios. Ri Jehová ri qa-Dios xkato'on k'a richin naben ri k'atzinel chi naben, xcha' ri ixoq.

¹⁸K'ari' ri David xubij chire ri ixoq: Nink'utuj utzil chawe richin man jun tawewaj chinuwech ri achike xtink'utuj-apo chawe, xcha'. K'ari' ri ixoq xubij chi tich'on k'a ri rey.

¹⁹Ri rey xuk'utuj k'a wi ja ri Joab ri biyon-el ronojel re' chire. Y ri ixoq xubij: Kan qitzij na wi chi kan man jun ri ewatel ta chawech rat wajaw, roma kan ja na wi ri Joab ri asamajel, ri xitaqon-pe. Y xubij k'a pe chuwe ronojel re ch'abel re xinbij chawe.

²⁰Jak'a ri Joab xuben ronojel re' richin ta nijalatej ri ach'obonik rat. Rat kan at aj-na'oj-wi, kan achi'el ri na'oj ri k'o kik'in ri ángel ri ek'o rik'in ri Dios. Rat kan ronojel k'a awetaman ri achike yebanatej chuwech re ruwach'ulew, xcha'.

²¹Chirij re' ri David xubij chire ri Joab chi rija' xuch'ob yan rij ri xubij chire, y roma ri' tiberuk'ama' k'a ri Absalón.

²²K'ari' ri Joab xuqasaj-qa ri' k'a pan ulew chuwech ri rey, y xubij: Wakami xq'ax chinuwech chi xinwil utzil awik'in rat rey, roma xanimaj nutzij yin ri xa in asamajel, xcha'.

²³Kan jari' xbe ri Joab pa tinamit Guesur richin xberuk'ama' ri Absalón. Keri' ri Absalón xapon chik jun bey pa Jerusalem.

²⁴Jak'a ri rey xubij-el chi ri Absalón tibek'oje' chupan ri rachoch rija', y man pa rachoch ta ri rey. Keri' xtzolin k'a ri Absalón chirachoch, jak'a man xutz'et ta ruwech ri rutata'.

²⁵Ri Absalón kan janila k'a jebel ok. Y kan man jun k'a chikikojol ri israelita ri achi'el ta rija'. Kan chijun ri rubanik kan jebel nitzu'un. Y roma ri' ri winaqi' kan xaxe rija' ri nikinataj.

²⁶Rija', k'a chi juna' k'a nusokaj rusumal-ruwi' roma janila chik ralal. Ri rusumal-ruwi' ri nusokaj-el nipajon jun la'eq wo'o' libra.

²⁷Y ri Absalón xek'oje' k'a e oxi' ruk'ajol y jun rumi'al xubini'aj Tamar. Y ri Tamar kan jun k'a ixoq ri janila jebel ok.

²⁸Ka'i' k'a juna' k'o-pe ri Absalón pa Jerusalem, y kan man rutz'eton ta k'a ruwech ri rey.

²⁹Roma ri' xuteq royoxik ri Joab, richin nuteq-el rik'in ri rey. Jak'a ri Joab man xrajo' ta xapon rik'in ri Absalón. Y xuteq chik k'a royoxik pa ruka'n mul, y chuqa' man xapon ta.

³⁰K'ari' ri Absalón xubij chike ri rusamajela' chi tikiya' ruq'aq'al ri rutiko'n richin cebada ri Joab ri k'o chunaqaj ri richin rija'. Y ri samajela' ri' kan xbekiya' k'a kan ruq'aq'al.

³¹K'ari' ri Joab xbe chirachoch ri Absalón, y xuk'utuj chire ri achike roma ri rusamajela' xkiporoj kan ri rutiko'n.

³²Y ri Absalón xubij chire ri Joab: Yin xinteq awoyoxik richin xape ta, roma ninwajo' chi nabebij chire ri rey ri achike roma xirelesaj-pe pa Guesur. Roma xa más ta utz ink'o kela'. Wakami ninwajo' nintz'et ruwech ri rey. Y wi ta k'o mak nubanon chuwech, kan kirukamisaj k'a, xcha'.

³³Ri Joab xapon k'a chuwech ri rey, y xberuya' re rutzijol re' chire. K'ari' ri David xuteq royoxik ri Absalón. Y toq xapon rik'in, xuqasaj-qa ri' pan ulew chuwech. Y ri rey xtz'ubaj k'a rupalej ri Absalón.